Cerpen Aliman Syahrani: Nang di Bawah Pusat

19.03 Zian 0 Comments

PALUI itu urangnya lamun pintar kada, tapi lamun disambat bungul kada pas jua, unjukiha kuran masuk disa hakun karik sampai ka iklan-iklan tupang dibacanya. Disambat kada langkar luput, disambat bungas jauh banar, tapi sasalah kana digadabakinya batis gin bibinian bisa karindangan. Ditangguh jagau kada baputungan, dianggap burisit katia tacut, garumutiha badua batalu hakun barupuyan tupang gigi, lamun kada bisa bungsal bigi mata. Pukuknya ngalih tupang maindaakan pamarum Palui itu.
Kanapa Palui kada kawa disambat pintar tapi disambat bungul kada pas jua, sabab saban baisukan sabalum tulak bagawi inya pasti mambaca kuran. Nang kaya baisukan itunah, inya duduk mahangkang di muhara lawang sambil maingkuti kuran B Post. Palui takarisut dahi mambaca barita masalah pulimik RUU Anti Purnugrapi wan Purnuaksi nang lagi rami dibahas bubuhan DPR di Jakarta. Inya garigitan banar lawan urang nang kada katuju lawan RUU itu, karna inya tamasuk urang nang mandukung saratus parsin. Takarisut jua dahi Palui pas mambaca barita manganai kakanakan sakulah nang banyak banar kada lulus Ujian Nasiunal karna nilainya kada sampai satandar. Pas lagi rami-raminya mambaca, anaknya nang sakulah SD kalas lima bangsul basapida Puligun.

“Kanapa nak jadi ikam sawat banar bulik, kada turunankah sakulah?” ujar Palui batakun sambil maandak kuran ka higa.
“Sakulah turunan haja bahai, tapi hari ini bubuhan bapa di sakulahan handak rapat cagar manyiapakan ulangan umum,” ujar anak Palui manjalasakan.
“Baya rapat haja maka buhan ikam disuruh bulikanlah, kada disuruh balajar saurangkah? Kaya apa kakanakan handak lakas pintar lawan lulus ujian lamun gurunya haja kulir maajar,” ujar Palui garigitan manyalahakan.
“Ulun kada tahu jua bahai, tapi kami dibari bapa Ruslan PR gasan digawi di rumah, sidin guru wali kalas kami bahai,” ujar anak Palui mamadahakan.
“Kaya apa PR–nya nak, kawa juakah ikam manjawap?” ujar Palui manggamati.
“PR-nya kaya ini bahai: ‘Napa ngarannya nang di bawah pusat? Hurup panambayannya P, hurup pahabisannya I.’ Ujar bapa Ruslan bila kami kada tahu jawapannya bulih haja batakun lawan kuitan,” ujar anak Palui sambil malihatakan buku PR-nya.
“Bungul lawan bangsat-bangsatnya guru ikam mambari PR kaya ini. Pantas haja kakanakan sakulah banyak banar kada lulus ujian tahun ini, sakalinya mulai lagi halus sudah dilajari urusan urang tuha,” ujar Palui sangit imbah malihati buku PR anaknya.
“Kanapa pian mamadahakan guru kami bungul lawan bangsat-bangsatnya bah?” ujar anak Palui batakun kada mangarti.
“Guru ikam itu manyuruh buhan ikam balanji nakai. Ini ngarannya purnugrapi wan purnuaksi,” ujar Palui sasain sangit.
Kada bahalat jam Palui langsung tulak mangincang mandatangi sakulahan anaknya sambil manajak pipisawan ka pinggang. Palui kada maingat manyalingar sapida mutur sampai parak tagipaki urang. Saking lajunya, mutur trak bagana gin disalipnya.
Bubuhan guru nang paharatannya rapat di ruang guru takajut kada sakira mandangar bunyi lawang maribau ditunjul saling gancangan. Palui cungul di muhara lawang lawan muha nang kaya hundang tahaling ka api.
“Aku Palui! Anakku sakulah di sini! Siapa guru wali kalas lima? Mana urangnya nang bangaran Ruslan? Kanapa mambari PR lanji lawan kakanakan? Kanapa kakanakan dilajari purnugrapi wan purnuaksi?” ujar Palui langsung batakun kada kasintakan hinak sambil bakacak pinggang mancakuti gagaman.
“Aku guru wali kalas lima, aku nang mambari PR lawan kakanakan. Tapi aku kada mambari PR lanji bapa Palui-ai,” ujar guru Ruslan maangkat tangan sambil badiri.
“Ikam jangan bakulim Ruslanai, ikam mambari PR kaya ini kalu: ‘Napa ngarannya nang di bawah pusat? Hurup panambayannya P, hurup paampihannya I.’ Jawapannya pasti kada lain lagi pada luka nang kada saling warasan ampun bibinian. Ikam kira nang kaya ini kada lanjikah?” ujar Palui bakarikut gigi kasasarikan.
“Maksudnya kada kaya itu pang bapa Palui-ai, di bawah pusat itu ngarannya Parupinsi. Pas haja kalu hurup panambayannya P hurup paampihannya I? Jadi kadada hubungannya lawan purnugrapi wan purnuaksi,” ujar guru Ruslan manjalasakan.
“Uh lamun kaya itu aku nang luput mamaham bapak guru-ai. Maaf ampun sabarataan, aku paramisi,” ujar Palui langsung bulik karna kasupanan kada sakira.
Kalakuan Palui mandatangi guru di sakulahakan ananya itu tahabar ka mana-mana sampai ka ujuk kampung. Pas tatamu lawan kakawanannya, Palui pasti diurahakan tarus ulih buhannya. “Ikam itu Lui-ai bungul haja balum maka handak bapiragah pintar,” ujar Garbus maulu-ulu sambil mandaradai tatawa.[]

Sumber:
Banjarmasin Post
https://www.facebook.com/notes/aliman-syahrani/nang-di-bawah-pusat/210853497751