Cerpen Aliman Syahrani: Daging Nyaman

19.01 Zian 0 Comments

PALUI tamasuk urang nang lancau bahuhurun, makanya inya banyak banar baisi kawan, baik lalakian atawa bibinian, tuha atawa anum, pajabat atawa urang biasa. Saking banyaknya kawan, Palui ada jua baisi kawan nang babida agama. Palui dikatujui kakawanannya karna inya kada mambida-bidaakan kaya apa haja kahidupan atawa kaadaan kakawanannya.
Sabujurannya kada ngalih mangawani Palui, karna Palui urangnya dasar katuju bakawan, asal jangan mangaramputi atawa manguyai nang kada baik haja, pasti awit bakawan lawan palui. Amun sudah rasuk bakawan awan Palui, ipuk di kantung gin bisa dijurungnya, amun ada tahual lawan urang, Palui hakun dibawai bakalahi malawanakan kawan pada dibawai saruan baaruwahan. Tagal sakali haja Palui dikaramputi atawa dikuyai nang kada-kada atawa pacangan manyupanakan inya, saumur janang kada bataha tarasa duwit Palui.
"Aku salut banar lawan ikam Lui-ai karna ikam ini banyak banar baisi kawan, napa rahasianya Lui?" ujar Garbus batakun sambil maambung Palui.

"Aku banyak baisi kawan kada bararahasiaan, nang panting babisa-bisa mambawa diri lawan jangan ampun saurang haja nang dikajah. Sabab manurut aku banyak baisi kawan itu kadada paruginya, salain gasan manambah pangalaman kawa jua bila pihan kapalipitan minta tulung atawa bahutang duwit," ujar Palui manjalasakan.
"Kudangar ikam ada jua baisi kawan nang babida agama, kaya apa cara ikam bakawan awan inya Lui?" ujar Tulamak mancalungap umpat batakun.
"Kaya aku bakawan awan bubuhan ikam jua ai cara aku bakawan awan inya, kada labih kada kurang," ujar Palui.
"Amun cara ikam bakawan awan inya sama kaya cara ikam bakawan anu kami, baarti ikam rancak jua mampakalah inya, kaya ikam rancak banar maalahakan kami. Kaya itukah Lui?" ujar Tukacil umpat bapandir.
"Kada jua pang, malahan inya nang rancak mampakalah aku. Tapi biasanya kada sawat dua talu hari langsung kuangsul," ujar Palui baagak.
"Siapa garang kawan ikam nang babida agama itu Lui? Kalu pang kami bisa jua bakawan awan inya," ujar Garbus manggamati.
"Kawanku itu kada asli urang Banua ini pang, inya urang juah. Ngarannya kada usah kusambat, nang pasti inya itu jadi Pastur," ujar Palui.
"Hau, baarti inya itu kada urang sambarangan. Pastur itu jaka dalam agama kita sama awan tuan guru kalu Lui? Hibat banar ikam inilah Lui ada baisi kawan urang harat," ujar Garbus maambung Palui pulang.
"Tadi ikam ada manyambat kalu ikam rancak dikalahakan kawan ikam nang jadi Pastur itu. Kaya apa inya mampakalah ikam Lui?" ujar Tukacil mambuliki pamandiran Palui.
"Inya biasa manakuni kanapa aku kada mamakan daging babi? Kujawab karna di dalam agamaku daging babi itu haram lamun dimakan. Imbah itu disambatnya kalu aku ini kada tahu di daging nyaman, karna manurut inya daging babi itu nyaman banar. Pihan itu aku tapakalah banar karna kada kawa lagi manjawab sabatik-batik," ujar Palui mangisahakan.
"Imbah itu ikam balaslah Lui?" ujar Tukacil manggasak.
"Nyata ai kubalas. Kada bahalat hari kutakuni jua kanapa inya kada babini? Inya manjawab karna kalu urang sudah jadi Pastur itu kada bulih babini di dalam agamanya. Balakasai kusambat kalu inya kada tahu jua di daging nyaman. Imbah itu inya kada saling bunyian lagi karna kada kawa jua manjawab sabatik-batik," ujar Palui mangisahakan sambil manggalahak tatawa.
"Imbah itu pang adalah inya mampakalah ikam pulang Lui?” ujar Garbus maanyaki Palui pulang.
“Malacuk kawa mampakalah aku, malah aku nang mahutangi inya. Inya kutakuni pulang daging napa nang paling nyaman? Ujarnya daging babi itu pang nang paling nyaman, tagal kuhual kada, sabab daging nang paling nyaman itu adalah daging ka luang,” ujar Palui manguya kisahnya pulang.
“Ai Lui, nangapa ikam jadi mamadahakan daging kaluang nang paling nyaman, kaluang itu sama awan kalalawar ganal, jadi kada bulih dimakan jua kalu?” ujar Garbus mahual Palui.
“Bah dasar ikam nang babal Busai, daging ka luang itu kada sama pang awan kalalawar ganal. Daging ka luang itu parnumnya manunayakan kawajipan sasuai buku nikah,” ujar Palui marukuyakan.
Garbus awan kakawanannya unggut-unggut kapala mambujurakan pamandiran Palui. Unggut-unggut jua kapala buhannya nang sabuting. [] aliman syahrani

Sumber:
Banjarmasin Post
https://www.facebook.com/notes/aliman-syahrani/daging-nyaman/225925037751