Cerpen Hamberan Syahbana: Urang Ti Banganga Hulu Hanyar Baucap
Di banua nia jangankan habar burung nang kada-kada, samut bakantut gin tahabar sampai ka saganap buncu mambuncu banua. Maginannya ai gusip si Aluh Mamau nang pina mamau awan nang bagawi di Kantor Pos naitu, Pasti tu pang galu awan tumbur-tumburnya jadi pamandiran urang sakampungan. Maka di banua nia mun ada urang nang pina ganjil balalu ha digalari buhannya nang kada-kada. Sampai ka ratik kalambu nang kalatikan naitu gin umpatan jua bagusip. “Aluh Mamau ti sasain mamau,” jar buhannya.Si Aluh Mamau ti aslinya bangaran Malati Harum Mawangi, dikiyau Mamal. Tagal marga inya bahanu pina inyuk pina mamau, lalu ai digalari buhannya si Aluh Mamau. Sandaga pulang wayah nia inya ti pina mamau awan nang bagawi di Kantur Pos naitu. Balalu ai barikit galarnya si Aluh Mamau.
Maka pulang, Aluh Mamau ti sudah baikat bapatalian awan Utuh Ibub anak Haji Lamang nang panyugihnya di kampung subalah. Utuh Ibub ti ngaran aslinya iya Bobiyansyah Saputera Wijaya. Han liwar mantap kalu ngarannya? Di SMA inya dikiyau Jaya. Mun di dunia maya garan fesbuknya iya Jaya Wijaya. Tagal di banua nia banar ham inya dikiyau Utuh Ibub.
U, sakalinya Utuh Ibub ti kada sahuaran ngarannya haja nang mantap hantap, urangnya gin mantap hantap jua. Mun inya tu lah takurihing atawa malihumi binian, buy liwar tu pang mangariaunya. Jangankan nang masih bubujangan dadara-an nang hanyar malarak bulu tu, binian nang sudah balarangan sudah balakian gin kisir-kisir kahahandakan lawan di-inya. Maginannya ai binian nang balu-balu. Siang tabayang-bayang, malam tamimpi-mimpi. Tagal Utuh Ibub ti biar kaya itu inya kada liur baungan kaya lalakian nang lain. Jaka lalakian nang lain kaya itu, manyapai tu pang pacar papak di mana-mana. Ada inya ti kada kaya itu. Malati Harum Mawangi alias si Aluh Mamau saikung itu pang nang dicintainya. Malahan wahini inya sudah baikat bapatalian awan pacarnya naitu.
Utuh Ibub ti mandangar haja urang kalambisikan mamandirakan Aluh Mamau maka inya badiaman haja. Kadada sadikit-dikit manimburu. Jangankan manimburu, mancurigai haja kada. Urang maka am ribut sakampungan mamandirakan parigal kalakuan Aluh Mamau nang pina sain bamamau naitu. Sabagai pulang Haji Lamang ti kadada jua manakunakan awan nang anak. Buy liwar am, kadada lain-lainnya abah wan anak sama hantap. Sama pada sabar awan sandu-sandunya. Maka di banua nia mun talalu sandu talalu sabar kada baik jua. Balalu ha jadi pamandiran urang di mana-mana.
Wayah nia, Aluh Mamau ti pina sasain barancap hahalunyur ampah ka kantur Pos, halat dudua hari atawa titiga hari, paling lawas saminggu sakali, pasti tu pang inya bakujuk ka Kantur Pos naitu. Tagal bujur kaya itu kadada jua talihat inya bajalan baduduaan awan pagawai Pos naitu. Tagal am imbahnya Aluh Mamau ti batutukar banar di Pasar Tungging nang ada di parbatasan desa antara kampungnya awan kampung Utuh Ibub larangannya naitu. Sialnya ti, lantaran inya aur tarancaki balalah ampah ka Kantur Pos naitu, balalu ha inya jadi pamandiran urang sakampungan. Kasudahannya ti asa supan jua inya, tapaksa bakuhup di rumah haja. Ini nah, sudah samingguan kada talihat mawarung. Maka di banua nia lalakian babinian saban ikungan pasti tu pang makan baisukan di warung. Mun kada talihat-lihat mawarung jadi pamandiran urang pulang. Han, saraba salah kalu?
***
Kaya baisukan nia nah, rami urang di warung katupat Acil Bayah aur mamandir inya haja jua.
“Ka manakah Aluh Mamau ti, kadada bangsul-bangsul,” ujar Angah Ijum.
“Inya bakuhup dirumah haja, supanan kalu?” jar Aluh Basar manyahuti.
“Napang palihatku ti pina sasain barancap mandatangi pagawai Pos naitu,” jar Utuh Gagah.
“Tagal biar kaya itu, inya ti kadada jua tahabar nang kada-kada tapinya,” jar Acil Bayah
“Cah, kita banar ham nang kada tahu gawian inya badua awan pagawai pos naitu.”
“Hi ih ah lahay, aku gin bingung jua. Asa kada mambadai mun kadada apa-apanya” jar nang lain manyahuti.
“Malahan dua hari sakali inya tulak ka kuta batutukar saraba macam kaparluan,” ujar nang batatai awan Angah Ijum.
“Cah kisahnya haja kalu batutukar? Padahal nang iyanya batamuan awan pagawai pos naitu pang.”
“Cah tangguhanku lah, cakadanya sahibar batamuan haja pang. Pasti ada nang lain pada itu nang digawimya. Asa kada mambadai mun kada diapa-apainya.”
“Baituan kalu?” ujar Utuh Hungang.
“Baituan nangapang tuh?” jar Utuh gagah ma-anyaki.
“Baituan tu pang. Mun di kuta ti siapang nang tahu? Imbah dibataknya ka dalam rumah kuntrakannya, kaya iwak dalam kurungan ai lagi, sakahandaknya ai maharu manggalau-galauinya kalu?”
“Ujar urang ti lah, mun sudah baduduan haja di dalam kamar, nang katiganya pasti tu pang iblis syaitan. Mun sudah kaya itu kada dijamin tu pang kasalamatan nang satabul naitu,” jar Amang Babar tahahang kapadasan makan katupat Kandangan Acil Bayah.
“Ai, kaya itu ah Mang?”
“Cah aku ti jar urang jua pang tapinya, hahahaha.”
“Tapi kadada bangkak-bangkak ai parutnya,” jar Acil Bayah. “Padahal saban baisukan inya mangatupat di sia haja.”
“Baluman lagi Cil ai,” jar nang lain manyambung.
“Anu buhannya ai, jangan mandawa anang kada-kada,” jar Julak Idar bakajutan mamadahi buhannya nang asik mamandirakan Aluh mamau.
Labar am tagasut sunyi buhannya barataan imbah tadangar suara Julak Idar nang kada katahuan tang manticul ha badirian di muka warung katupat Acil Bayah. Napang ada pada sintup buhannya barataan kapipiaran dapatnya mata julak Idar cirarat-cirarat. Maka mata urang jagau ti dasar tajam mancirarat mambari takutan.
“Handak limir saku kapala kakanakan nia kana tamparku,” jar sidin lingas-lingas sambil duduk di pamancungan bangku.
Maginannya ai tagasut sunyi buhannya pas kaya api dikubui banyu, kadada saikung-ikumg nang wani basuaranya. Jangankan basuara, manyirit haja kada wani, maginannya ai mancangangi muha sidin nang karau awan mahing-mahingnya naitu. Napang Aluh Mamau ti paranah pacucuan ulih Julak Idar. Umanya Aluh Mamau ti kamanakan sidin. Utuh Ibub ti kada urang lain jua. Haji Lamang ti kamanakan sidin jua. Jadi Utuh Ibub ti paranah pacucuan sidin jua. Kainya Aluh Mamau awan kainya Utuh Ibub ti batalu badangsanak awan Julak Idar. Julak Idar ti dangsanak nang pambungsunya. Han itu pang marganya jadi buhannya tu kapipiaran katatakutanan kalas ka tahi-tahi kalu pina katakupan dahi dapatnya katapi suntul sidin.
Balalu ha asing-asingnya buhannya galasakan badadas mahabisakan sarapan katupat Kandangan nang masih ada di piring. Maka katupat Kandangan Acil Bayah ti liwar nyamannya tu pang.
Sakalinya ti sunyi-sunyi urang sakampungan kada sahibar mancurigai haja tapi sudah mulai mandawa nang kada-kada awan Aluh Mamau, Ujar habar ti inya sudah ba-anuanlah, sudah baituanlah, sudah dianunyalah, sudah di-itunyalah. Sudah saraba macam ai lagi urang sakampungan mandawa nang kada-kada. Liwar supannya tu pang Aluh Mamau, kaya ditapas muhanya. Kada kawa lagi Aluh Mamau ti balalah ampah ka Kantor Pos. Jangankan handak bajalan ka Kantur Pos, handak baulanja ka pakan haja gin inya kada tapi kawa. Inya ti liwar supannya pang’a disambati urang sakampungan. Napang kamana haja, di mana haja, pabila haja inya bajalan pasti tupang dicangangi urang, pasti tu pang asa dipandirakan urang. Amun jauh ditunjuk urang awan tangan, amun parak ditunjuk urang awan bibir. Maka ti dasar babanaran. Dasar ada urangnya nang katuju anjur antar ka hulu ka hilir mahabarakan nang kada-kada. Utamanya kisah Aluh mamau nang dipadahakannya sudah balarangan maka basalingkuh awan pagawai pos naitu. Urangnya ti iya nang bagalar Utuh Gagah.
Utuh Gagah ti ngaran aslinya Nurbian Sampana. Urangnya bungas langkar awan gagah-gagahnya. Sabagai ti pamandirannya ti liwar luhaunya ha pulang. Pamandiran bilang kada batakar sahama-hama. Sadidikit tampar, sadidikit sudat, kaya inya haja ti pang nang pawaninya paharatnya di banua nia. Tagal am kadada jua tahabar inya manampar manyudat urang. Awan pulang lantaran inya kabubungasan kalalangkaran ti manyapai ha pulang pacarnya papak ada di saganap buncu mambuncu banua. Sabagai ti pulang urangnya liwar ambungan awan kada sayang di duit. Siapa haja nang hakun dipacarinya pasti tu pang ditukarakannya HP masa kini nang saling larangan. Siapa haja nang bisa manyukai mahimungi pasti tu pang dapat jua sawab-sawabnya. Han kaya itu tu pang kalakuan si Utuh Gagah Ti.
Tagal am bujur liwar haratnya mancari pacar, saikung Malati Harum Mawangi haja nang kada kawa dapatnya. Napang Aluh-nya ti liwar kada hakun dipacari Utuh Gagah. Padahal mun binian nang lain kisir-kisir tu pang handak minta pacari. Napang Utuh Gagah ti samana bungas langkar samana gagah wan panduitan pulang. Mun jadi pacarnya ti cagar makmur santausa tu pang mulai di talinga, gulu, tangan sampai ka pagalangan batis kilalauan tu pang barinting-rinting awan amas Amirika nang saing larangan naitu.
Kuitan Utuh Gagah ti liwar sugihnya bubuhan duit nang kada batakar jua. Buy kadada lainnya Utuh Gagah ti bilang kada bakalahan sama banar awan abahnya. Nang kuitan ti dimana-mana haja pasti ada bakas bini. Jakanya bulih babini labih pada ampat bisa bapuluh-puluh tu pang saku sidin baisi bini. Han sama banar kalu? Nang abah banyak bini nang anak banyak pacar. Han liwar kalu? Kajian nang kuitan ti manurun banar ka anak. Ngalih ai lah, inya nang bangaran nafsu ti kadada puas-puasnya. Saikung handak dua, dua handak tiga, tiga handak ampat, sudah ampat handak ha pulang manambahi. Urang ti kalakuan tu disasadangani haja. Kalu pina mati tatilungkup rahatan nyanyamannya.
Maka Utuh Gagah ti urangnya tu liwar pangarasan hantap. Han buhannya samana liwar samana hantap. Tahu haja pada Aluh Mamau ti kada hakun dipacarinya, tatap haja dikarasinya diunjainya.
“Pukuknya mun kada dapatku mamacari Galuh Malati Harum Mawangi naitu, jangan disambat Utuh Gagah lagi tu pang ngaranku,” jarnya ti basusumbar di hadapan kakawanannya.
Pas kabalujuran pulang wayah nia Galuh Malati Harum Mawangi ti pina sasain bamamau. Balalu ai inya ta-akal mampangaruhi urang sakampungan supaya umpat karuh jua. Buy Utuh Gagah ti liwar cangkalnya ka hulu ka hilir mahabarakan parigal Aluh Mamau ti. Sabujurnya ti kada Aluh Mamaunya tu pang nang digalaunya, urang nang bagawi di kantur pus naitu pang nang jadi sasaran dihabarakannya nang kada-kada. Tagal am urang tuti diulahnya jadi lantarannya haja, nang iyanya tatap ai Aluh Mamau tuti jua nang diuntingnya. Apa jar urang tu satu karja dua gawikah? Iya ai satu karja dua gawi jua ai kalu lah? Sambil banyalam nginum kupi. Hahahaha.
Uuu sakalinya ti sunyi-sunyi urang sakampungan sudah kawa dipangaruhi Utuh Gagah. Dipadahakannya itu lah ini lah sagala macam ai lagi supaya urang sarik awan nang bagawi di kantur pos tu. Lantarannya sakampungan sudah tamakan pandir Utuh Gagah. Pukuknya jahat banar tu pang, buruk tu pang kampung dapatnya parigal Aluh Mamau awan si pagawai pos naitu. Kasudahannya ti bubuhan pamudanya sapakat sakampungan handak mamparakusi mambari palajaran awan lalakian nang sudah ma-apa-apai Aluh Mamau, nang sudah manyupanakan banua.
U sakalinya baisukan ampah kasiang nia jurut-jurutan sapidamutur buhannya galuguran manuju ampah ka kantur pos. Sakalinya kapala ahuinya ti kada lain kada bukan iya nang bagalar Utuh Gagah kaminting pidakan nang mahing kada mamak dijarang dua kali. Tagal am kada katahuan tang manticul ha Julak Idar badapa-an di tangah kartak mahalangi rumbangan sapida mutur buhannya. Labar am tapaksa buhannya bacandak bakakajutan.
“Ui handak ka mana buhan ikam nia?“ ujar Julak Idar cirarat-cirarat mata din liwar landap mambari takutan mancangangi buhannya.
“Kami handak ka kantur Pos,” jar Utuh Gagah lingas-lingas jua.
“Ka Kantur Pos?”
“Iya ai ka Kantur Pos!” jar buhannya tapaimbai manyahuti.
“Ai, bujur-bujur bapandir! Ba-apa buhan kam nia ka Kantur Pos naitu?”
“Ka kantur pos tu pang!”
“Iya ka kantur pos itu apa kahandak buhan kam nia?”
“Kada parlu macam-macam lagi Julak ai. Pian tahu haja jua sudah.”
“Ai bujur-bujur bapandir, Sual Galuh Malati ah?”
“Han, Julak tahu jua kalu? Kanapa maka batakun pulang?”
“Urang itu talalu banar Julak ai. Mambari muar hantap,” ujar si Utuh Gagah.
“Hadang hulu,” jar Julak Idar. “Talalu kaya apa maksud ikam Tuh?”
“Inya tu nah Julak ai maudak Aluh Mamau larangannya si Utuh Ibub. Julak ai.”
“Itu pang marganya jadi kami handak manuntasakannya Julak ai,” jar nang lain umpat manyahuti.
“Tagal Utuh Ibub ti asa kada tadangar galu,” jar Julak Idar.
“Ayu buhannya! Lakasi kita barangkat. Jangan sampai lapas! Kaina sawat inya bukah,” jar nang lain manyahuti.
“Hadang hulu!” jar Julak Idar. “Buhan kam nia kada bulih kaya itu. Nagara kita nia nagara hukum. Kada bulih main hakim saurang.”
“Cah, Julak Idar nia kaya kada tahu haja! Urusan parsalingkuhan nia kadada Undang-undangnya. Jadi kadada jua hukum pidana-nya. Kaya apa buhannya?”
“Hukumannya kita ulah saurang!” jar nang babibik hirang di pambalakangan.
“Kita hukumakan salajur awan patak-pataknya,” jar Utuh Luhau nang karau awan mahing-mahingnya.
“Akur! Akur!” jar buhannya kancahungan basahutan.
“Pukuknya kaya apa jua pun, tatap kada bulih main hakim saurang! Ini kada sual parsalingkuhan tapi ini sual panguruyukan panganiayaan. Apa jar urang tu Parsakusi ah? Iya ai Persekusi jua ai. Amun si pagawai pos naitu sampai kanapa-kanapa, apalagi mun sampai bamatian. Buhan kam nia cagar manyasal saumur hidup tu kaina. Buhan kam nia bisa ditangkap pulisi awan masuk panjara jua. Tahu ah buhannya? Hakun ah masuk panjara?”
Tadiam barataan, kadada nang waninya manyahuti imbah mandangar masuk panjara. Liwar sariknya Utuh Gagah maitihi Julak Idar badiri mahadang buhan pamuda nang handak ka kantur pos naitu.
“Cah! Ikam nia jua Utuh Gagah ai, pina paiyanya ha. Nang ampun tunangan haja kada napa-apa maka ikam lah nang hamuk pina kaya handak mamakan ka manusia ha?”
“Kami kasihan awan Utuh Ibub, baluman apa-apa sudah basalingkuh Aluh mamau tu ti,” jar Utuh Gagah
“Inya dasarnya Utuh Ibub ti kada pawanian ajal,” jar Tuhalus di pambalakangan manyahuti babaya baungap.
“Napa? Napa jar ikam tadi? Kada pawanian ajal? Siapa nang baucap tadi? Mana urangnya? Siapa? Siapa???”
Buy, tasisit gulu Tuhalus katatakutanan mandangar tatakunan Julak Idar nang pina mancarancang nia. Mun katahuan Julak Idar, labar am. Mati kutu tu pang Tuhalus nia dapat sidin. Cagar sasak tu pang kupiah Tuhalus.
“Handak limir saku kapala kakanakan nia,” jar Julak Idar cirarat-cirarat lingas-lingas mata din mancari-i nang basuara tadi.
Buy, makinannya ai tasisit gulu Tuhalus mandangar ancaman Julak Idar. Kada kawa mambayangakan lagi mun kapalanya sampai limir kaya mangga katuhukan kana guliming.
“Tapi ..” jar Utuh Gagah.
“Tapi nangapang Tuh?”
“Aluh Mamau ti, ..”
“Galuh Malati ngarannya, kadanya Aluh Mamau Pang Tuh ai.”
“Galuh Malati ti inya babanaran basalingkuh awan pagawai pus naitu.”
“Basalingkuh?”
“Iya ai basalingkuh banar Julak ai.”
“Jar siapa?”
“Jar ulun jua ai.”
“Urang ti Tuh ai jangan babarang tuduh babarang dawa mun kada malihat saurang.”
“Dasar ulun saurang nang malihat inya badua.”
“Malihat inya bapacaran ah?”
“Iya ai, bapacaran jua ai inya badua.”
“Ai bujur-bujur bapandir Tuh ai.”
“Babanaran Julak ai, inya badua di Kantur pos naitu bajujurungan duit. Maka kada sakali dua kali katamuan ulun. Mahabang ha duitnya malahan sampai bapuluh-puluh lambar.”
“Cah ikam nia jangan ma-ada-ada Tuh ai. Inya kada bajujurungan duit. Inya dasar manjurung duit ka Galuh Malati.”
“Han pian gin tahu haja jua kalu? Kanapa pian maka kada parcaya?”
“Itu duit kiriman urang Jakarta sana gasan Malati, kadanya duit pagawai pus naitu pang. Ikam nia Tuh ai jangan sadawa-dawa nang kada-kada. Urang ti Utuh Gagah ai Bangaga hulu hanyar baucap, jangan mandaradai mancarucus anjur atar ka hulu ka hilir mamadahalkan nang ada-kada. Itu fitnah tahu lah?”
Tadiam Utuh Gagah ti liwar bingung. Kanapa pulang maka urang Jakarta nang mambari-i duit awan Aluh Mamau? Tapi inya kada wani lagi manakuni Julak Idar, kalu pina hibak bincul di dahi. Maka Julak Idar ti mun ujar Sidin tampar, ditampar sidin tu pang urangnya. Han kaya itu tu Julak Idar ti urangnya.
“Bulikan haja jin, satumat lagi masuk waktu Dzuhur. Ayu bubar!”
Buy! Manciling mata Utuh Gagah macangangi Julak Idar. Kada saapa buhannya bulikan ka rumah masing-masing.
***
“Talanjur purun hantap buhannya mandawa ulun basalingkuh Ka ai,” ujar si Malati Harum Mawangi ba-adu-adu awan Utuh Ibub. “Itu fitnah kalu ngarannya, haram kalu Ka?”
“Sabar haja Ding ai. Nang panting ikam kada kaya itu kalu? Ikam kada basalinhkuh kalu?” jar Utuh Ibub manggamati mambisai cagar bininya nang saling langkaran naitu.
”Pian nia nyaman haja baucap kaya itu, kada kaya ulun nang dijalimi nia. Ulun kada sanggup malihat urang sakampungan mangulibi-i ulun.” jar si Malati barubuyan banyu mata isak-isak manahani tangis, kaiya-annya taingui jua ai inya manangis.
”Mudahan Tuhan ma-ajab buhannya.”
“Astagfirullah, Ding, istigfar Ding. Ikam kada bulih badoa kaya itu. Doakan nang baik-baik haja Ding ai.”
“Ai kaya itu ah? Tapi bubuhannya sudah mamitnah ulun. Kanapa maka jadi ulun doakan yang baik-baik?”
“Sabujurnya ikam nia Ding ai liwar bauntung hantap.”
”Ai, kanapa maka liwar bauntung hantap?”
”Buhannya tu di akhirat kaina manyarahakan pahalanya gasan ikam. Mun kadada baisi pahala, buhannya tu pang nang mamikul dusa ikam kaina di akhirat.” .
“Kaya itu ah Ka?”
“Tapi labih bauntung batuah lagi mun ikam hakun mamaafi buhannya.”
”Mamaafi? Hidup ulun tabulangkir kaya nia, cakada ulun hakun mamaafi.”
Tagal imbah dipikirakannya masak-masak, baik jua saran cagar lakinya nia. Imbah pang handak nang kaya apa lagi? Buhannya tu tagal kada tahu banar ai bahwa si Malati Harum Mawangi ti dapat duit marga manulis carpin awan puisi nang sudah dimuat di surat kabar awan di majalah di Jakarta sana. Lantaran inya kadada baisi nomor rekening bank, duitnya tu dikirim malalui wesel online haja. Jadi inya tinggal manjulung sarihit kartas nang baisi tulisan nomor NTP-nya awan nomor PIN-nya haja gasan ma-ambil duitnya di Kantor Pos naitu, bahanu-bahanu inya manampayakan HP haja nang baisi SMS no NTP awan PIN-nya, kaluar am duitnya balambar-lambar ratusan habang awan lima puluhan biru. Utuh Gagah ti kada tahu bahwasanya urang wahini mangirim wesel kawa kada basusuratan wesel pos kaya bahari lagi.
“Kaya apa jua Ding?”
”Mun damintu, ulun pilih … mamaafi buhannya haja.”
“Alhamdulillah. Kada tasalah aku mamilih bini nang samana bungas langkar kada sakira samana liwar baik hatinya pulang.”
Buy tajunggat tamingar-mingar hidung nang mancung batahi lalat naitu, Malati Harum Mawangi liwar kahimungan mandangar pujian cagar lakinya nang liwar baiknya jua.
”Alhamdulillah, kada biasa Kaka mandangar urang nang liwar baik hati kaya ikam nia, Ding ai.”
Banjarmasin, 12 Ramadhan 1438
Sumber:
https://www.facebook.com/hamberan.syahbana/posts/10207209815564229
0 komentar: