Cerpen Hamberan Syahbana: Asa Kada Mambadai

17.11 Zian 0 Comments

Utuh Bungas ti tahu haja kuitan kada mampu, tatap karas hantap hatinya handak kuliah kaya urang jua. Tapaksa kuitannya manyandaakan pahumaan. Untung haja inya mahasiswa nang pintar, jadi kawa dapat beasiswa gasan kuliah sampai tuntung. Sayang pang inya kada lulus jadi PNS, bagawi di sawasta gin kada kawa jua. Tagal inya ti dasar cardas, ada haja akalnya mancari razaki. Urang di banua bingung.
“Asa kada mambadai,” jar. Pangangguran maka kawa mangirimi kuitan di banua, tamasuk jua gasan manabusi pahumaan awan pulau nyiur nang tasanda. Duit datang di mana?
Tagal imbah kuitannya maninggal wayah sampar muak bahira, tapaksa jua inya bulik mangganai rumah kuitannya nang sudah dilistriki awan sudah bapasang antina parabola jua. Tagal am anih, di kampung nia inya ti kada bausaha apa-apa jua. Napang pahumaan kuitannya ti habis dijualinya. Lalu duitnya habis diwakapakannya gasan mambaiki Masigit. “Pahalanya gasan uma awan abah,” jarnya ti.

***


Wayah nia, Utuh Bungas ti aur mancungkung di warung haja. Tagal bujur kaya itu waktu juhur ashar magrib isya wan subuh, inya rajin haja ka masigit. Tagal am mun wayah baisukan, urang asing-asingnya tulakan ka gawian. Utuh ti maguni haja mancungkung di warung haur manggutak HP haja. Sanunuhan tulak ka pahumaan, aur manjapriti urang bahuma haja. Wayah hari pasar aur manjapriti nang batutukar haja. Maka bisa banar mamilih nang langkar-langkarnya haja dijapritinya. Bahanu pina balawas manjaprit. Sakalinya ti inya sambil maulah vidiu.
Sialnya ti, marga aur mancungkug di warung haja, inya jadi pamandiran urang sakampungan. Kasudahannya asa supan jua inya, tapaksa batabun di rumah haja. Ini nah, sudah samingguan kada talihat mawarung. Maka di banua nia mun kada talihat mawarung jadi pamandiran urang jua. Han, saraba salah kalu?

***

Kaya baisukan nia, urang di warung katupat Acil Mirna ti, aur mamandir inya haja jua.
“Ka manakah Utuh Bungas ti, kadada bangsul-bangsul,” ujar Angah Ibad.
“Inya batabun dirumah haja,” jar nang lain.
“Tagal biar kaya itu, inya ti kada biasa kakurangan duit tapinya.”
“Hi ih alahay, aku gin bingung jua,” jar nang lain.
“Malahan dua hari sakali inya tulak ka kuta batutukar saraba macam kaparluan,” ujar nang di pamancungan bangku.
“Asa kada mambadai, Utuh ti kada bagawi napa-apa tapi salipinya tatap kancang. Duit pakulih di mana?”
“Baisian minyak kuyang kalu?” ujar Utuh Hungang.
“Ujar urang ti duit yang dipaliti minyak kuyang tu babulik pulang ka asalnya. Jadi mun manukar barang haraga sapuluh ribu dibayarinya awan duit ratusan. Barangnya gratis, duitnya tabulik wan dapat bonus angsulannya pulang. Han, bilang dubul kalu dapatnya?” jar Julak Hahay tahahang kapadasan makan katupat Kandangan Acil Mirna.
“Ai, kaya itu ah Julak?”
“Cah aku ti jar urang jua pang.”
“Tapi kadada ai duitku nang hilang,” jar Acil Mirna. “Padahal saban baisukan inya mangatupat di sia haja.”
“Duit ratusan ribu haja nang dipalitinya,” jar nang lain manyambung.
Sunyi-sunyi urang sakampungan mulai curiga. Kada kawa lagi inya baulanja, marga kadada nang hakun manarima duitnya. Kasudahannya ti urang sapakat sakampungan maundurakannya bajauh pada kampung. U sakalinya, kamarian nia galuguran rumbungan kandaraan kaya urang kampanyi manuju ka rumah Utuh Bungas. Tagal kada katahuan tang manticul ha kandaraan Pambakal langsung bacandak mahalangi buhannya.
“Ui handak ka mana buhan ikam nia?“ ujar Pambakal.
“Kami handak mancari si Jaharu naitu!” jar provokatur lingas-lingas mayahuti.
“Jaharu?”
“Iya ai Jaharu!” jar buhannya tapaimbai.
“Ai, bujur-bujur! Siapa garang jaharunya?”
“Si Jaharu tu pang!”
“Tapi ada ngarannya kalu?”
“Kada parlu bangangaranan lagi! Urang sudah tahu sabarataan.”
“Utuh Bungas ah?”
“Han, Pambakal tahu jua kalu? Kanapa maka batakun pulang?”
“Urang itu talalu banar Pambakal ai. Mambari muar hantap,” ujar si Provokator.
“Hadang hulu,” jar Pambakal. “Talalu kaya apa?”
“Inya baingunan minyak kuyang Pambakal ai.”
“Itu pang marganya jadi banyak nang kahilangan duit.”
“Tagal asa kada tadangar nang kahilangan duit.” jar Pambakal.
“Ayu buhannya! Lakasi kita cari. Jangan sampai lapas!” Jar nang lain manyahuti.
“Tunggu dahulu!” jar Pambakal manangati. “Buhan kam nia tatap kada bulih kaya itu. Nagara kita ni nagara hukum. Kada bulih main hakim saurang.”
“Cah, Pambakal nia kaya kada tahu haja! Urusan mamaliti duit awan minyak kuyang ti kadada Undang-undangnya. Jadi kadada jua hukum pidana-nya. Kaya apa buhannya?”
“Hukumannya kita ulah saurang!” jar nang babibik habang di pambalakangan.
“Kita hukumakan salajur awan patak-pataknya,” jar Gabau nang pamahingnya.
“Akur! Akur!” jar buhannya kancahungan basahutan.
“Pukuknya kaya apa jua pun, tatap kada bulih main hakim saurang! Amun Utuh Bungas sampai kanapa-kanapa, apalagi mun sampai mati. Buhan kam nia ditangkap pulisi, bisa masuk panjara jua. Hakun ah buhan kam masuk panjara?”
Tadiam barataan, kadada nang manyahutinya imbah mandangar masuk panjara. Liwar sariknya parovokatur malihat Pambakal badiri mahadang buhannya nang karau-karau kada mamak dijarang tu.
“Bulikan haja jin, satumat lagi masuk magrib. Ayu bubar!”
Buy! Manciling mata parovokator macangangi Pambakal. Kada saapa buhannya bulikan ka rumah masing-masing.

***

“Talanjur purun hantap buhannya mandawa ulun bainguan minyak kuyang,” jar Utuh Bungas curhat wayah Pambakal mailanginya malam nia. “Itu fitnah ngarannya, haram kalu? Itu syirik kalu Pambakal?”
“Sabar haja Tuh ai. Nang panting ikam kada kaya itu kalu?” jar Pambakal manggamati.
”Pambakal nyaman haja baucap kaya itu, kada kaya ulun nang dijalimi. Ulun kada sanggup mahadapi fitnah nia. Mudahan Tuhan maajab buhannya.”
“Astagfirullah, Tuh, istigfar Tuh. Ikam kada bulih badoa kaya itu. Doakan nang baik-baik haja Tuh ai.”
“Ai kaya itu ah? Tatapi bubuhannya mamitnah ulun. Kanapa maka didoakan yang baik-baik?”
“Sabujurnya ikam bauntung hantap.”
”Ai, kanapa maka bauntung?”
”Buhannya tu kaina manyarahakan pahalanya gasan ikam. Mun kadada baisi pahala, buhannya tu nang mamikul dusa ikam di akhirat.” .
“Kaya itu ah?”
“Tapi labih bauntung lagi mun ikam hakun mamaafi buhannya.”
”Mamaafi? Hidup ulun tabulangkir kaya nia, cakada ulun hakun mamaafi.”
Tagal imbah dipikirakannya, baik jua saran Pambakal nia. Handak kaya apa lagi? Buhannya tu tagal kada tahu banar ai bahwasanya Utuh Bungas ti dapat duit marga maulah video youtube nang dikatujui baribu-ribu urang. Lalu dipasangi urang iklan. Iklannya tu pang nang jadi duit.
“Kaya apa jua Tuh?”
”Mun damintu, ulun pilih … mamaafi buhannya.”
“Alhamdulillah. Kada biasa aku mandangar urang kaya ikam nia, Tuh ai.”

Sumber:
SKH Banjarmasin Post, Minggu, 14 Mei 2017
https://www.facebook.com/hamberan.syahbana/posts/10207052243305021