Cerpen Hamberan Syahbana: Si Manis Langkar Marista Diri

17.22 Zian 0 Comments

Sudah bajam-jam labih si Manis Langkar nang batianan parak arinya nia pina mangaraung. Maka saharian nia inya aur maumpati aku haja, kamana haja aku bagarak pasti tu pang diumpatinya. Awan jua inya liwar katuju baulit manggisangakan taliganya nang pina kagatalan naitu, malahan katuju manjilati batisku, tanganku. Jakanya kawa sampai ka gulu malahan sampai ka muhaku tu pang di jilatinya. Aku maka am liwar galianan asa manjalujuk dijilati si Manis Langkar nia. Kada sa-apa HP-ku bakakajutan babunyi, tagal am si Manis Langkar nia pang nah maguni haja mauliti liwar mahaur banar. Sangkannya ti aku katuju hantap kalu? Padahal aku ti liwar muarnya. Maginannya ai wayah HP-ku babunyi kaya nia. Ngalih banar aku ma-ambil HP-ku tu ti. Sangkan nang maHP aku kada hakun manyahuti. Aku ti cakadanya kada handak manjawab panggilan tu ti pang, tagal am si Manis Langkar nia pang nah nang maulah aku jadi saraba salah. Pahabisannya walau liwar ngalihnya tapaksa jua bakayuhut kuambil HP-ku naitu.

”Assalamu alaikum,” jarku
”Wa alaikum salam,” jarnya manyahuti di subalah sana. ”Bang, Kanapa maka lawas banar kada pian angkat Bang?” jarnya manakuni ba-Abang-abang awan diaku.
”U, pasti marga si Manis Langkar itu lagi kalu Bang? Jadi Abang nia labih panting si Manis itu ah daripada Midah?”
”Cakadanya kaya itu pang Midah ai, ini cuma ada sadikit gangguan banar ham.”
”Gangguan napang? Si Manis itu lagi kalu?”
”Iya ai, si Manis Langkar nang parahatan batianan ganal nia nah. Maka ariannya haja lagi baranak.”
”Apa? Batianan? Ariannya haja lagi? Mun kaya itu pian kawini haja gin si Manis tu ti! Kita putus tus tus tus!”
”Midah, Midah. Dangarakan hulu panjalasan Abang.”
Buy, basadinan dimati’inya. Padahal aku handak manjalasakan sajalas-jalasnya sual si Manis Langkar nang batianan ariannya haja lagi tu ti. Tagal pinanya si Midah ti liwar sarik hantap, makanya langsung dimati-inya. Aku takajut basadinan. Inya pasti liwar sariknya. Asa lucu nah. Asa kada mambadai si Midah manimburu? Si Manis Langkar tu ti kan ngaran kucing? Imbah tu ti Midah si janda muda nang bungas langkar kacil mulik sasaak di lawang tu ti kadada parnah lagi maHP awan diaku.
Aku ingat saminggu nang lalu, wayah aku makan tangah hari, tang manticul ha kucing bini balang tiga nang mambari kapingin. Aku kada tahu jua tumatan dimanakah inya datang, Timbul datang kucing bini nang rahatan batianan ganal, Lalu aku timbayi sahimpil iwak basanga. Kucing nia ti liwar katuju dapat iwak timbayanku tu ti. Kaiya-annya inya taguring kakanyangan. Manggalugur ha bunyi karuh hinaknya.
Kucingnya balang tiga nang salagi barasih nia mambari kapingin. Lantaran liwar manis salagi barasih tu ti am, lalu aku ngarani si Manis Langkar. Mulai wayah itu tu pang inya mangawani wan mahibur diaku bila hatiku wayah galau di kamar bidakanku nia. Imbah itu saban kalian handak makan pasti tu pang kutimbayi sahiris iwak gasan inya, Jadi tiap hari aku musti balabih manukar iwak. Gasan mambari kucing batianan tu ti pang. Sualnya inya kada kawa lagi manangkap tikus lantaran parutnya nang saling ganalan tu ti antui-antui saling baratan. Mun dilihat parutnya tu ti, ariannya haja lagi. Pasti tu pang inya taparanak di sia.
Nang mambari muar ti, gawiannya tu nah nang aku kada katuju. Apang gawiannya ti aku asa manjalujuk. Sakalinya ti, itu marga kalaparan banar ham jadi inya kaya tu ti. Imbah itu satarusnya saban kalian makan, pasti tu pang kutimbayi iwak sahimpil bahanu bisa sampai mandua himpil. Mulai wayah itu si Manis Langkar ti kada lagi maulit manggisangakan talinganya wan kada lagi sajilat-jilat awan diaku. Kacuali inya kalaparan. Jadi pabila haja inya mamulai aksinya aku sudah paham bahwa inya lapar, bahwa inya minta makan. Maka kucing nia mun kada dapatnya kada ampih tupang inya ma-anui. Jadi aku langsung manimbayi sahiris atawa dua hiris iwak basanga. Awan aku jua kada parnah lupa menyisai hirisan iwak gasan makannya.

***

Jakanya aku nia jumbluwan sajati, kadada masalah. Tagal aku nia balu lawas jua. Apa jar urang tu? Duda nang mamasuki masa puber kaduakah? Pasti ai itu jadi masalah. Iya kalu? Awan jua aku nia lagi pedekati awan awan janda muda nang kacil mulik bungas langkar lamak mungkal sasak di lawang nang bangaran Hamidah Salasiah Arbawiah, dikiyau Midah. Sialnya pulang si Midah nia liwar panimburuan hantap. Awan kanapa jua si Midah nia maka langsung manutup mamati-i HPnya. Padahal aku balum sampat mamadahakan bahwa nang bangaran si Manis Langkar tu ti kada lain kada bukan adalah saikur kucing. Sabujurnya si Manis Langkar nia lain kucing inguanku jua pang, tagal inya ti liwar bisa baungah-ungah awan jua liwar satia mahiburku di kamar bidakan marangkap ruang karjaku nia. Amun kadada si Manis Langkar nia di sia, balalu ha aku tagasut suing.
Ini nah sudah malima hari Si Manis Langkar tu ti kadada talihat di sia. Awan sudah mandua minggu jua si Midah nang kacil mulik bungas langkar lamak mungkal sasak di lawang tu ti kadada maHP-HP. Buy liwar am aku rasa liwar kasunyian hantap. Imbah itu ti bakajutan inya datang ma-anggung anaknya nang masih liyut. saikung, dua ikung, sampai talu ikung inya ma-anggung anaknya nang maguni susuan tu ti.
Hari nia wayah aku bulik bagawi. Aku marasa ada nang talain pada nang masi-masi. Si Manis Langkar tu ti datang kada mangiung kaya nang masi, Inya mangaum manggaruhum kaya harimau sambil mananggung anaknya nang maguni susuan tu ti. Tagal am saikung haja anaknya. Dimanakah nang dua ikungnya? Malihat galagat nang kaya itu aku kada wani maunjai kaya nang masi-masi. Napang Si Manis tu ti kada sing rantian mangaum tatarusan. Kapuputingannya ti kulihatakan ha inya kaya itu.
Sampai kamarian ari maguni haja si Manis Langkar tu ti mangaum kaya harimau. Imbah kuitihi bahimat, Astagfirullah! Sakalinya anaknya tu ti hudah mati. Mambadai inya maguni haja mangaung marista diri manyayat hati nang mandangar. Saumur-umur hanyar wahini haja aku mandangar kucing mainguyi anaknya nang sudah kada banyawa tu ti. Sakalinya ti ada luka banganga-an di gulunya.
”Anaknya nang balang tiga tuti sudah dibawa kucing kuyangan.” ujar urang subalah rumah.
”Sakalinya kucing kuyangan tuti iya abahnya si balang tiga tuti,” jar nang lain manyahuti.
”Maka kucing kuyangan tu ti kada kawa malihat anak kucing hantang-hantang, balaluan ha saitu saini dibantasnya.” jar urang subalah rumah tu ti manyahuti.
Jar urang nang malihat tadi. kucing laki tu ti sawat bakalahi awan kucing bini marabutakan anaknya. Mambadai si Manis Langkar baingisan asa padih hatiku umpat marasa-akan. Timbul bakakajutan HP-ku berbunyi, sakalinya itu numur si Midah nang bungas langkar lamak mungkal kacil mulik sasak di lawang tuti. Ada napang yu?
”Bang, Midah sudah di muhara lawang piian nah. Pasti pian maguni maurusi si Manis Langkar tu ti. Iya kalu?”
”Iya ai nah, Midah handak bakanalan ah? Ayuha masuk, bakanalan hulu awan si Manis Langkar.” jarku manyahuti sambil lihum kurihing simpak ampah ka buncu.
Gubraak! Midah langsung mabingkas ka lawang saling gancangan kada sakira. ”Manang urangnya ti nang handak marabuti calun lakiku!?” jarnya liwar sariknya.
Langsung mancapil inya masuk. Buy handak takaluar bigi matanya ciling-ciling lingas-lingas mancari-i si Manis tuti..
”Ada ai si Manis-nya. Tu nah di bawah dipan tu yat.” jarku manyahuti sambil malihumi. ”Inya liwar marista lantaran anaknya tu hanyar haja dimati-i sabahnya saurang.”
”Astagfirullah. Umay Bang! Kapupurunan banar pian mamati-i anak pian saurang,”jarnya pina sadih jua.
”Napang? Anakku?”
”Iya ai! Abang sadis, kejam! Padahal Midah hakun haja bamadu, asal jadi awan pian. Tagal, mun kaya nia ...”
”Mun kaya nia kanapa?” jarku bingung manyahuti. ”Aku gin kada hakun kawin awan si Manis. Apang? Midah ti hakun bamadu awan si Manis ah?”
Midahnya kada manyahuti, tapi inya baunggutan haja tandanya hakun haja dimadu awan si Manis.
”Hahahaha.”
Aku tatawa mangalikik, kada kawa lagi manahani.
”Ai, kanapa pian mananawa-akan ulun? Lucu ah parasa Pian?”
”Midah, Midah. Si Manis itu kucing, lain binian kaya ikam nia Ding ai.”
”Jadi?”
”Iya ai. Tu yat lihati di bawah dipan tuh.”
”Si Manis tu ti kucing ah?”
Aku takurihing haja, hehehe.
”Mun Midah handak sarik, sariki ha situ. Mun handak marungkup, rungkup ha situ jin. Hehehehe.”
Midah janda muda nang lamak mungkal bungas langkar kacil mulik sasak di lawang tu ti bingung saurangan. Kada kawa ba-apa-apa lagi selain pada bapiragah sarik ha lagi.
”Buy, Nakal Abang nih. Nakal, nakal, nakalnakalnakal,” jarnya sambil mandabuki dadaku pina ungah pina manja. Pahadangan Midah sasain baungah. si Manis Langkar tuti kaluar bagamat masyaksiakan adegan rumantis nang ada di hadapan matanya. Padahal si Manis Langkar-nya tu ti maguni haja marista diri basakit hati.

Banjarmasin, 13 Juni 2017

Sumber:
https://www.facebook.com/hamberan.syahbana/posts/10207247601068843