Cerpen Hamberan Syahbana: Pian tu pang nang Ulun Idamakan Ka ai

17.29 Zian 0 Comments

Saban kalian pian kawin, saban kalian tu ti jua ulun liwar manimburu awan nang pian nikahi tu ti Ka ai. padahal ulun gin baisian laki jua. Tagal napakah maka ulun liwar karindangan awan pian nang sudah jadi laki urang. Sajujurannya ulun akui, pian tu pang nang ulun idamakan salawas nia. Tagal am kanyataannya pian tu ti lainan juduh ulun. Mimang ini salah ulun jua pang, kada parnah mautarakan isi hati ulun lawan pian. Padahal waktu wan kesempatan ka-adaan tatarusan tasadia, maginannya ai wayahini rumah kita batatai di komplek nia. Nang kaya wayahini nah, masa idah ulun hanyar haja habis. Nang kaya masi-masi jua, ulun liwar handaknya pian lakasi badatang bapara awan kuitan ulun. Awan jua kita nia kan sama-sama jumblu. Sudah pasti kita sama pada mamarluakan pandamping hidup. Iya kalu? Pian kada marasa ah pada sudah banyak sinyal-siyal nang ulun tujuakan awan pian? Ulun kapingin hantap pian mambalas sinyal-sinyal ulun tu ti. Tagal kanapa maka pian kada mambalas-balas sinyal-sinyal ulun tu ti? Ulun ah nang harus babisa-bisa bapadah badahulu? Kada mungkin kalu? Ulun nia kan bibinian? Bibinian itu sifatnya manunggu. Kada kaya lalakian. Lalakian itu sifatmya mancari. Iya kalu? Asa kadada bibinian nang manyurung badahulu? Kaya nang kahahandakan balaki banar ha. Padahal iya jua ai. Ulun jua ai nang kahahandakan balaki awan pian. Tagal am biar ulun nang pahandaknya, kada baik jua jual murah baubral-baubral. Mustinya pian tu pang nang babisa-bisa bausaha mancuri hati ulun? Pian kan kawa mautarakan awan SMS? Atawa awan sebait puisi? Atau apa haja nang kawa pian guna-akan gasan manyuara-akan, “Hakun ah ikam manikah awan diaku Minarti? atau “Hakun ah ikam jadi biniku?”

Buy, liwar am ulun sukanya jaka kaya itu nang pian ucapakan. Lalu ulun kisah baungah-ungah. Lalu bapiragah jual mahal, piragah indah lawan pian sambil mauji sampai di mana parjuangan pian mandapatakan hati ulun. Walau sabujurnya ulun nia pang nang liwar maharapakan hantap kahahandakan manjadi bini pian. Tagal am, napakah nia cuma kahandak ulun saurangan haja? Ataukah cinta ulun nia cuma cinta ba-ampik sabalah tangan haja?

***

Dahulu ulun nia adalah anak saurang buruh sarabutan nang bapandapatan cukup gasan makan sahari-hari haja. Gasan manambahi panghasilan, mama bawarung warung makan di parak kampus. Di situlah sahari-harinya ulun manggani-i mama manjadi kambang warung malayani bubuhan mahasiswa langganan mama. Masakan mama tu ti liwar nyaman awan haraganya pas jua gasan mahasiswa. Awan jua ulun nia lumayan langkar. Itu adalah mudal panglaris pipikat gasan mangariau bubuhan mahasiswa supaya tatarik manjadi langganan warung kami.
Lucunya, ada haja mahasiswa nang nakal. Ulun diguda-guda dirayu-rayu malahan ada nang manggamit-gamit bu**t ulun. Lucunya jua ulun badiaman haja, ulun kada sarik. Kanapa? Marganya ulun suka, liwar suka hantap. Malahan ulun bahanu-bahanu malihumi baungah-ungah awan bubuhan mahasiswa tu ti. Buy! Liwar am buhannya tu ti kalikikan tatawa-an kalapak-kalapak kasuka-an.
Suatu katika masuk saikung mahasiswa, sawat haja inya malilik awan ulun. Imbah ulun itihi ba-asa maka inya malihumi. Buy lihumannya tu tajam manciruk ka dalam hati tambus ka jantung ulun Anih, ulun langsung tacaragah takagum-kagum balalu mandibar-dibar galudupan mangguncang dada ulun. Asa panas dingin balalu ha ulun galitiran manggatar sa-awakan. Padahal lihuman nang kaya tu ti masi rancak haja biasa-biasa haja. Tagal am mahasiswa nang saikung tu ti pina talain. Ulun marasa ada nang lain di hati ulun. Apakah nia tanda atawa alamat bahwasanya ulun jatuh cinta pada pandangan partama? Tahulah pian siapa mahasiswa nang kawa mangguncang hati ulun tu ti? Mahasiswa tu ti kada lain kada bukan, iya pian tu pang urangnya.
Mulai wayahitu ulun jadi liwar mahatiakannya awan pian. Sakalinya banyak ulun nang balum tahu nang ada awan diri pian. Dandanan pian nang sadarhana apa adanya tagal manawan, lihum pian kurihing pian rupa pian, rambut pian, manarik mamukau mangariau bahabis. Akibatnya ulun jadi tatarik awan pian, wan gasan pian ulun surungi sapiring jubung iwak wan sayur istimiwa tagal harganya harga nang biasa haja. Malahan ulun jua bausaha mancari tahu samua-an nang ada awan kabiasaan pian. Ulun marasa ada kariau nang maniruk tajam batajak ka ujung jantung ulun. Nang ulun tahu pian tu ti adalah mahasiswa istimiwa nang disukai banyak bibinian. Sabujurnya ulun liwar kapingin manjadi mahasiswi kaya buhannya jua. Tagal sayangnya ulun cuma urang kampung anak kaluarga kada mampu, wan utak ulun jua tumpul. Cuba jakanya ulun pintar awan cardas-cerdasnya, wan salalu juara kalas, pasti tu pang ulun kawa dapat beasiswa kawa sakulah tinggi kuliah sampai satuntungnya jua.
Bagi ulun pian kada cuma mampu mancuri hati ulun, tatapi jua mampu marampok hati ulun. Sabujurnya ulun jua sama kaya buhannya kapingin mandapatakan hati pian. Tagal am kaya apa yu? Sabarataan urang jua tahu haja, bahwa ulun nia hanyalah kambang warung gadis panjaga warung.

***

Suatu katika ulun bacaramin, sakalinya ulun nia lumayan langkar. Rupa ulun lihum ulun pangawak ulun cuma bida-bida tipis awan buhan artis salabaritis papan atas. Makanya am banyak urang nang baduit kapingin supaya ulun jadi bininya. Malahan wahini ulun sudah tiga kali balaki. Saban kalian balaki ulun baulih saikung anak. Wahini anak ulun ada tiga matan laki nang babida. Nang partama sakulah di kalas satu SMA, nang ka dua di kalas dua SMP wan nang ka talu di kalas ampat SD.
Balaki babini partama, ulun dijadiakan bini anum pamburung rumah kariditan. Walau usianya jauh tatuha di atas ulun tagal am urangnya baik hati, panyabar wan panyayang. Sayang pang umurnya kada landang. Inya kacalakaan. Akibatnya ulun jadi balu. Istilahnya janda carai mati. Kaya itu jua laki nang ka dua wan nang ka tiga, ulun jua dijadikan bini anum. Anehnya lagi laki ulun tu ti katalunya maninggal dalam kacalakaan. Mungkin ini sudah takdir ulun.
Sapaninggal suami-suamiku ulun tu ti, ulun mandapat bagian fasilitas nang mamadai. Wan dari salah satu laki ulun tu ti ulun mandapat sabuah rumah nang ada di kumplik nia, langkap awan sagala fasilitasnya plus sabuah mubil kaluarga. Di rumah nia ti pang ulun bagana awan uma ulun awan anak ulun nang talu ikung tu ti. Gasan biaya hidup sahari-hari, kamar tamu nia ulun jadiakan minimarket plus sabuah warung makan. nang ini sungguh liwar manyanangakan ka hati ulun. Kanapa? Marganya saban kalian pian jadi balu, pian pasti tu pang makan di warung makan kami nia. Ulun jadi kaingatan nustalgia wayah kita bubujangan dahulu. Buy, rasa cinta nia jadi babulik babunga-bunga pulang.
Wahini ulun sudah talu kali balu. Anihnya saban kalian ulun jadi balu, saban kalian tu ti jua ulun maharapakan pian mau manikahi ulun. Ulun kada parduli jadi bini nang ka barapa pun, ulun hakun haja. Ulun mahir haja bamadu jadi bini anum, Nang panting ulun kawa jadi bini pian. Tagal am kanyataannya saban kalian itu jua pina kada biasa badatang. Tahulah pian? Babarapa kali ulun mancuba mancintai laki ulun naitu. Tagal am kada kawa haja. Ulun gagal tarus. Sapintas lalu ulun mimang malayani suami-suami ulun naitu panuh kasih sayang misra. Wan suami-suami ulun tu ti mangira ulun dasar bujur-bujur mancintainya. Padahal kada. Saban kalian manyiapkan sarapan baisukan gasan laki ulun tu ti, saban kalian tu ti jua di dalam hati ulun ada pian. Nang ulun lihati ulun rasa-akan bahwa laki ulun tu ti iya pian. Sarapan baisukan nia gasan pian, lihuman ulun nia gasan pian. Malahan baragap wayah guring gin ulun marasa dalan ragapan pian. Sadikit-dikit suami-suami ulun tu ti kada parnah mangira bahwasanya ulun paharatan mamikirkan pian.
Astagfirullahul Ya Allah Ya Robbi, ampunilah hambaMu Nang amat hina nia. Hamba nang sudah maingkari juduh-juduh nang sudah Kau barikan. Sabujurnya hamba bujur-bujur sudah bausaha, tapi kada kawa. Nang sabakas nia, parkanankanlah inya tu ti nang dia jadi suami hamba, Ya Allah. Tagal tatap kada kawa jua.

***

Baisukan nia pian sarapan di warung ulun. Kaya nang masi-masi jua. Pian ulun surungi pursi jumbo wan gratis. Ulun suka, pian kada manulak. Apakah nia suatu partanda bahwasanya doa-doa ulun dikabulakan Allah Swt? Buy, liwar sanangnya ulun. Sakalinya pian maguni haja katuju nasi kuning baiwak haruan masak habang masakan ulun nia.
“Minarti ikam balu pulang ah?” jar pian manakuni wayah pian hanyar tuntung makan.
“Inggih, iya ai Ka ai," jar ulun ba-kaka-kaka manyahuti pian. "Ini nang ka talu kalinya ulun balu.”
“Uh iyakah? Kanapalah maka kita bisa sama kaya itu lah? Aku gin sudah talu kali jua balu. Hmmmm, kadada rancana kawin lagi ah?”
“Kahandak ulun ti kaya tu ti pang. Tagal am umur sudah parak kapala ampat nia, siapang nang hakun ma-ambil bini. kada payu lagi kalulah?”
“Ai? Jangan putus asa. Ikam nia kan maguni haja bungas langkar. Panampilan ikam gin kalihatan labih anum pada umur ikam nang sabujurnya.”
“Ai kaya itu ah?”
Buy, langsung mandibar-dibar dada ulun mandangar pujian pian nang sudah saling lawasan ulun hadang-hadang. Kanapa pujian tu ti hanyar haja pian ucapakan wayah ini? Sabujurnya ulun liwar sukanya, sayang pang kanapa maka ucapan pian tu ti kadada sambungannya. Ulun kaciwa, malahan liwar kaciwa.
“Buktinya? Kadada nang hakun kalu? Barangkali buhannya tu takutan kalu pina maninggal sama kaya suami-suamiku naitu.”
“Ai, sama kita dung. Wahini kadada jua nang hakun jadi biniku. Sakalinya hidup barumah tangga tu ti kada cukup sahibar cinta haja. Tapi ada parsyaratan lain. Nang iyanya iya itu harta. Sabagai PNS randahan kada bajabatan, hartaku nang ada harta randahan jua. Lantaran tu ti am jadi aku salalu ditinggal biniku tajun mairingi salingkuhannya nang labih mapan. Aku? Nang kaya ikam lihat nia pang, kada mapan. Iya kalu? Siapa nang hakun balaki awan diaku nia?”
“Ulun hakun ai jadi bini pian,” jar ulun, tagal jawaban ulun tu ti di dalam hati haja.
Sabujurnya bibir ulun nia liwar handaknya maucapakan tu ti, tagal am kada kawa taucap. Sajujurannya, nang sabakas nia, ulun handak pian lakasi malamar ulun. Sa-andainya ada audisi atawa ada parsyaratan nang harus ulun panuhi, ulun umpati tu pang audisinya wan ulun siap mamanuhi parsyaratannya.
Imbah maucapakan tarima kasih pian langsung manuju kandaraan bibik pian, lalu mahidupi masinnya. Kada saapa pian tulak ka gawian wan hilang kada kalihatan lagi di tikungan jalan. Cuba jaka pian jadi laki ulun, pian kawa tulak ka gawian mambawa mubil ulun.
“Ikam katuju ah?” jar mama ulun manakuni bagasutan mangajuti.
“Ah mama,” jar ulun manyahuti kasisipuan.
“Ikam maguni suka kalu?” jar mama piragah kada tahu.
“Ya iyalah,” jar ulun manyahuti di dalam hati kasukaan.
Balalu ulun mahayal. Pian tu ti kan cinta partama ulun? Walau hanya ba-ampik sabalah tangan. Tagal itu kan duhulu? Wahini kan satatus ulun bida? Jadi kada parlu takutan cinta kada babalas.
“Pinanya inya gin suka jua awan ikam,” jar mama bagasutan mambuyarakan hayalan ulun.
“Tagal inya takutan bapara, lantaran takutan kalu ikam kada mau manarima. Inya itu kan kada samapan almarhum suami-suami ikam naitu? Atawa ikam badua sama-sama jaga gengsi kalu lah?”
“Ah mama,” jar ulun manja kaya anak ABG.
“Atau... kalu kaya itu... Mama haja gin lah kaina nang bapandir awan inya.”
“Jangan Ma, jangan! Ah, mama nia maulah ulun supan haja,” jar ulun piragah kada hakun padahal ulun suka hantap.
Subhanallah walhamdulillah, Ya Allah. Kasudahannya Kau buka-akan jua jalan gasan mandapatakannya. Jadikanlah inya tu ti jadi juduh hamba ya Allah. Wayah itu jua saitu saini ulun bahancap masuk ka kamar langsung sujud syukur. Anih, apa-apa nang ulun lihat di kamar nia basadinan samua-an manjadi labih ceria seceria hati ulun nang paharatan babunga-bunga nia.

Banjarmasin, Juni 2017

Sumber:
https://www.facebook.com/hamberan.syahbana/posts/10207265259070282