Cerpen Hamberan Syahbana: Ada Apa awan Jannatun Naim?
Tanah wakap tu ti kada lawas lagi cagar kada datang lagi pahalanya ka kubur aruah abah awan aruah mama, lantaran amanat sidin pambangunan Jannatun Na’im tu ti baluman jua tagawi. Padahal biaya wan bahan-bahan bangunannya sudah cukup sarabanya tasadia. Tagal am pambangunan Jannatun Na’im tu ti maguni haja baluman tagawi-gawi. Napang nang liwar manyakitakan ka hatiku nia kanapa jua maka Ka Burhan nang mahalangi pembangunannya tu ti.“Jar habar Ka Burhan ti sudah ada di banua nia. Isuk-isuk pasti tu pang sidin datang ka sia.”
“Bagus ai mun kaya tu ti Ka Haji ai. Kawa pian takumpulan batalu badangsanak. Nyaman pian Ka Haji ai kawa batamuan mahapusakan barindu-dandaman," jar biniku.
“Bagus napang? Ka Burhan tu ti bulik ka banua nia kadanya handak barindu dandam-dandaman pang. Sidin tu ti handak ma-ambil tanah wakap aruah abah tu ti pang. ”
“Astagfirullah! Ai? Kaya itu ah?“
“Iya am tu Ding ai. Tu ti am nang liwar mangganggu ka pikiranku.”
Buy, sakalinya ti bakakajutan tang manticul ha badiri badapa-an di muhara lawang. Lalakian nang pina kurus manguringkai, bajanggut basisingut awan bajabis jua. Maka pulang barambut kuning ha kaya rambut bubuhan urang asing batupi pet hirang bakaca mata hirang jua wan batanda tumpil hirang di pipi kiwa. Aku liwar takajut hantap basadinan. Napang siapa kuang tu ti? Aku asa kada patuh, salagian jua aku kada pinandu sahama-hama siapakah urang tu ti.
“Assalamu alaikum.“ jarnya mambari salam.
Astagfirullah! Suara salam nang pina layu tu ti? Aku asa biasa mandangar suara kaya tu ti. Tagal am di manakahlah? Aku kada ingat jua nah. Mun kada salah bunyi suara tu ti kaya suara Ka Burhan. Kada salah lagi, pasti itu suara Ka Burhan. Iya jua ai. Itu suara Ka Burhan. Pasti sudah. Sakalinya iya jua ai. Ba-arti lalakian nang badirian di muhara lawang tu ti kada lain kada bukan iya kakaku saurang. Kada salah lagi Itu pasti Ka Burhan.
“Wa alaikum salam“ jar kami badua laki bini maguni haja bingung manyahuti.
Ka Burhan ma-andak tas rangsilnya di lantai, mambuka kaca mata hirangnya, mamacul tupi petnya awan rambut gundrung nang kuning kaya rambut urang asing tu ti. Sakalinya tu ti rambut palsu nang barikit jadi satu awan tupi pet tu ti. Lalu Ka Burhan tu ti mamacul tanda tumpil hirang nang ada di pipi kiwa tu ti tanda palsu jua.
Lalu kami basalaman, asa rawan di hati. Ka Burhan balaluan maragap saling pisitan saling lawasan. Sampai kada katahuan ada rasa basah banyu mata balilihan di pipi kami masing-masing. Imbah asa sadang lawasnya kami baragapan badua badangsanak balalu Ka Burhan malapas ragapan sidin.
“Ka Burhan hanyar datang imbah parjalanan jauh sudah pasti liwar uyuh. Baiknya Ka Burhan ti baistirahat haja,“ jar biniku manyaranakan.
“Inggih Ka ai, baiknya pian Ka Burhan ai baistirahat haja,” jarku jua maumpati saran biniku.
“Kada parlu!“
“Mun kaya itu, ulahakan kupi Ding ai gasan Ka Burhan nia,“ jarku manyuruh biniku.
Pahadangan biniku masuk handak maulahakan kupi, Kami badua ba-ading nia badiaman haja. Asa kaya apakah? Asa pina pingkuh kami badudua. Kaya ada jurang nang mamisahakan kami. Bahanu-bahanu kusirit kakaku nang sudah saling lawasan maninggalakan banua nia. Kalihatan banar pamarum muha sidin pina layu kada basumangat, kadada kalihatan sahama-hama tanda-tanda urang nang pina karau pina mahing kada mamak dijarang dua kali. Padahal sidin tu ti jar habar liwar ditakutani urang di banua subarang sana.
”Assalamu alaikum,” jar adingku si Riduan bakakajutan datang mahingal manggah mungkuh badiri di muhara lawang.
”Wa alaikum salam,” jar kami tapaimbai manyahuti.
Mandam Ka Burhan mancangangi Riduan, kada sa-apa Ka Burhan maragap ka Riduan. Balawas pinanya nang badua ba-ading tu ti baragap. Imbah itu malapas badudua, kada parlu babasa basi lagi, asing-asing duduk di kusi tamu.
Ka Burhan mamacul ka jaket nang sudah kubas. Wayah kada bajaket nia, jalas kalihatan awak sidin nang kurus karing kurisa-an kada taurus. Ka Burhan tadiam satumat, lalu kami bacacangangan sapadangsanakan dalam tatapan hampa.
“Kita sudah takumpulan di rumah ni,” jar Ka Burhan mambuka pamandiran, ”Jadi aku kada parlu lagi mangumpulkan buhan kam.”
“Ka, gawat!“ jar Riduan bakajuran. “Patok-patok nang ada di tanah wakap tu ti kadada sabuting-buting lagi. Habis samua-an tamasuk papan nama Jannatun Na’im tu ti taumpat hilang jua.”
“Aku nang mambuangi samua-annya tu ti,” jar Ka Burhan pina ringan maucapakan, kaya kadada beban apa-apa.
”Tanah itu mimang sudah manjadi bagianku kalu?” jar sidin manakuni kami.
“Sabuting lagi Ka ai,” jar Riduan manyambung pandirnya. “Malam tadi ada nang handak manyalukut Balai Disa, tagal sawat kataguran.“
“Itu lain aku nang handak manyalukutnya! Napang buhan ikam nia mandawa aku ah nang handak manyalukutnya? Pasti buhan ikam nia mandawa aku jua nang handak manyulukutnya. Iya kalu? Jangan babarang dawa lah.”
Ka Burhan bagasutan badiri liwar sarik pinanya. Kami takalampapak basadinan takajut malihat kasasangaran Ka Burhan tu ti. Hanyar sabakas nia nah aku malihat saurang kasangaran Ka Burhan nang liwar ditakutani urang di luar sana. Mata sidin ciling-ciling kaya handak tapacul bigi matanya lantaran kasasarikan, muha sidin jua habang barau pina kaya banyala.
“Gasan napa aku manyalukut Balai Disa tu ti, kadada untungnya sahama-hama bagi diaku. Aku bulik ka banua nia handak mambirisakan sual tanah warisan naitu. Kadanya handak babanam-banam Balai Disa tu ti pang. Akh, itu fitnah!”
Kak Burhan sasain sarik, balalu sidin bakajutan mangaluarakan pistol. Buy. Aku takapak takajut basadinan, gugup bacampur takutan. Aku liwar bingung musti kaya apa. musti ba-apa malihat Ka Burhan nang mulai kalap tu ti.
“Buy, liwar am, talalu-lalu banar am urang banua nia. Samantang-mantang aku handak ma-ambil tanah warisan tu ti, balalu ha buhan ikam mandawa nang kada-kada. Pina sakahandaknya haja sadawa-dawa. Lawan jua apa untungnya aku manyalukut Balai Disa tu ti?”
Kada sa-apa kaluar biniku mambawa talu galas kupi, inya manggatar jua. Itu jalas banar kalihatan di galas-galas kupi nang taumpat bagantar. Lalu biniku tu ti bagamat ma-andak galas kupi di atas mija, imbah itu badiri satumat batanang-tanang manaduhakan dada nang pina galudupan sambil bahinak landang.
”Ka Burhan baiknya pian baistirahat hulu. Kamarnya sudah ulun siapakan. Barangkali pian maguni kauyuhan atawa maguni kapanatan wan asa singkalan awak. Kaina ulun kiyauakan Julak Mamar paurutan nang masyhur di sia. Mun sudah asa sigar hanyar pamandiran nia ditarusakan lagi,” jar biniku mancuba mananangakan suasana.
“Hai, ikam jangan u-umpatan! Ini urusan kami batalu badangsanak. Salagian jua ini lainan urusan bibinian!” jar Ka Burhan mahinggur mambari takutan.
Buy, biniku tu ti takulipik takalampapak dapatnya hinggguran Ka Burhan tu ti. Kalihatan banar pucat kalas muhanya katatakutanan. Biniku ti langsung tu pang manggatar sabukuan awak. Balalu ha inya bahancap masuk maninggalakan kami batalu badangsanak nia.
“Sabar, sabar Ka Burhan. Bawa mangupi hulu tampulu masih panas, mun sawat dingin kada sigar lagi kupinya. Imbah itu kaina hanyar kita mamandirakan masalah tu ti pulang.” jarku mancuba manggamati.
Ka Burhan mancangangiku awan Riduan. Sidin tadiam satumat sambil manyimpan pistul lalu duduk manginum kupi. Kuitihi sidin pina ranai manikmati kupi nang masih hangat tu ti. Malihat pina ranai, hanyar aku wan Riduan umpat jua manikmati hangatnya kupi ulahan biniku tu ti.
”Buhan kam nia dasar mimang bujur-bujur sarakah! Tamak! Tanah nang sajumpilat tu ti handak buhan kam ambil jua,” jar Ka Burhan sambil lingas-lingas mancangangi kami bagantian.
“Tapi Ka, tanah tu ti sudah diwakapakan kalu?” jarku manyahuti
“Nang diwakapakan tu ti hasil kabunnya haja! Lainan tanahnya kalu? Tanah tu ti adalah bagianku, ampunku. Nang lainnya? Sudah buhan kam sikat bahabis kalu?”
“Kadanya kaya itu pang Ka ai,” jarku manjalasakan.
“Buktinya? Kada ada bagianku kalu? Waktu itu buhan kam ma-anggap aku sudah mati kalu? Talanjur purun buhan ikam nia mamutusakan sacara sapihak. Samastinya buhan ikam ti mancari-i diaku. Malahan biniku nang tian ariannya haja lagi tu ti gin buhan ikam undurakan jua kalu? Dasar kada bahati manusia!”
“Itu cuma kasalahpahaman banar ai. Kasalahpahaman tu ti sudah dibujurakan. Warisan tu ti jua sudah dibagi ba-asa. Ka Burhan sudah mandapat bagian nang adil.”
”Kada parcaya!”
”Ka dangarakan panjalasan kami.“
“Kada parlu! Itu cuma akal-akalan buhan kam haja, kalu? Pukuknya siapa pun kada ada nang bulih ma-ambil tanah tu ti. Ini sudah manjadi kaputusanku!”
Kada kakatahuan tang datang ha si Suci bini Ka Burhan nang urang jawa tu ti awan anaknya nang bangaran Marni. Balalu bagasutan Ka Burhan tacagal mandam kapiu. Ka Burhan nia kada mangira sahama-hama cagar batamuan awan bininya tu ti. Kuitihi Ka Burhan cangang banar maminandui bini sidin tu ti.
“Suci? Ikam ah nia Suci?” jar Ka Burhan bingung manakuni.
“Alhamdulillah, akhirnya kita ketemu jua di sini. Bang, ini Marni anak kita Bang.” jar Suci.
Marni gadis nang kacil mulik tu ti bingung. Banaran ah nia abahnya? Nang badua baranak tu ti bacangangan. Ada rasa dandaman di hati. Ka Burhan maitihi babanar gadis nang masih kakanakan tu ti pamarum muha liwar sahirip awan bininya.
“Marni, kasia. Ini aku abah ikam Marni ai. Ayu ka sia.”
Marni mamaraki abahnya. Murni tu ti asa kada parcaya, inya asa ragu-ragu. Di-itihinya mamanya. Suci mamahami karaguan anaknya tu ti, lalu inya baunggut mamastiakan bahwasanya itu mimang babanaran abahnya.
“Jadi buhan kam nia sudah lawas ah bagana di sia?” jar Ka Burhan manakuni nang bini.
“Ya, Bang, Abang pergi ke mana? Lama benar Abang meninggalkan kami.”
Ka Burhan pina layu lamah liku ha. Kalihatan banar ada rasa panyasalan di hati lantaran sudah mandawa kami maundurakan nang bini tu ti. Ka Burhan maitihi aku badua Riduan bagagantian.
“Bang, Suci sudah mandangar apa nang Abang tuduhkan tadi. Sungguh tega Abang manuduh mereka nang bukan-bukan. Padahal Abang sudah mandapat bagian waris nang adil. Sawah wan ladang bagian Abang saya pinjamkan kepada orang lain. Hasil bagiannya malabihi untuk makan satu tahun. Mereka ini juga telah membuatkan sebuah rumah, lengkap dengan kiosnya sekalian dengan modalnya. Abang sungguh keterlaluan.”
“Maafakanlah aku, aku titipakan anak awan biniku nia.” jar Ka Burhan basiap-siap handak tulak bajauh pada rumah nia.
“Abang mau kemana lagi?” jar nang bini manakuni.
“Aku sudah kangangalan jadi buronan pulisi, aku handak manyarahakan diri. Masalah tanah tu ti sudah aku ikhlasakan. Tarusakan ha pambangunan Pasantrin Jannatun Na’im tu ti. Ayu Ding paluk ragapi aku Ding ai.”
Kami pun baragapan bapalukan batalu badangsanak mahapusakan rasa rindu di dada.
Alhamdulillah, akhirnya salamat jua amal jariah kuitan kami. Tarima kasih Ya Allah, atas taufik wan hidayahMu kapada kaka kami.
Ka Burhan pun mamakai lagi pakaian panyamaran sidin. Mamasang tupi pet nang barikit jadi satu awan rambut gundrung kaya urang salau tu ti. Lalu sidin mamasang tanda tumpel hirang di pipi kiwanya. Mamasang kaca mata hirang wan mamuruk jakit kulit sidin.
Kada katahuan sakalinya bagagasutan, tang “Dor dardirdor!“ Ka Burhan basadinan rabah ta-ampar di lantai bakuang darah.
Inna lillaahi wa inna ilaihi roojiuun. Tarimalah taubat Kaka kami nia Ya Allah. Aamiin
Tammat dah kisahnya.
Banjarmasin, 18 Juni 2017
Catatan:
Disalin ba-asa ka dalam Basa Banjar dari judul asli ADA APA DENGAN JANNATUN NA’IM
Sumber:
https://www.facebook.com/hamberan.syahbana/posts/10207286956092694
0 komentar: