Cerpen Hatmiati Masy’ud: Tambun
Julak Ibad mancibuk banyu matan lanting, rarawaian hidin takilar banda nang kaya kulambu manimbul di banyu, bagulung-gulung, pas di lu’uk di parak batang kariwaya. Mandirap burit tundun, wahana nangapang ngitu, mun ingat kisah urang bahari, kada lain pada tambun si hantu banyu. Ancap Julak Ibad ka tabing, babaya bakulih ka lu’uk ngitu pulang, hilang hudah. Banyu sasain badalam, karuh matan hulu, kampar bajurut laluan, banyu mangidam.***
“Mah, lakasi pingkuti kayu ngini, lakasi!” Sari wan Idah bakuriak manyuruh Imah maingkuti kayu panjang nang disurung ka tangan Imah.
Tangan Imah kakarancawai, timbul tinggalam.
“Lakasi, Mah, lakasi!” Kuriakan Sari wan Idah.
“Aku kada kawa maingkuti kayu ngitu, batisku ditarik urang di bawah.” Suara Imah gagarambuak, kada sa’apa tinggalam awak Imah saikungan.
***
“Imah lamas, uiii, Imah gugur di lanting!” Papar kuriak Sari wan Idah.
“Umaii, di manang, lakasi tajuniakan!” Makacil Masnah kababang mandangar Imah lamas, haharunjung hidin bukah ka batang banyu.
Kampung Limpasu tumbar, Imah anak makacil masnah nang hanyar baumur tujuh tahun, tagugur di lanting
Abah Imah nang dihabari rahat manurih, taduduk, takajut mandangar Imah tagugur ka batang banyu.
***
Sanja kuning, urang balirit di pinggir batang banyu, ada jua nang mancungking dudukan di jumbatan maitihi urang mancarii Imah. Ada nang bakuyung, banyalam, bajukung, balanting, ada jua nang basapid datang matan kuta kabupatin, jar habar bubuhan tim SAR. Pinggir-pinggir batang banyu nang sabat disingkai, akar-akar kayu disilak, babaya malihat pina maapung balakas manunti, babaya diparaki sakalinya raba atawa batang kayu. Ada jua nang tatunti tadung, liwar ganalnya, hancap nang basapid mamutar, bajauh, kaluku dikapungnya, labar am. Batang banyu sasain badalam, sasain karuh, kampar matan hulu sasain babanyak, ari sasain bakadap. Tunggal ikungan nang mancarii Imah naikan ka tabing, isuk pacangan mancarii baasa, mun malam kada bapanglihat.
***
“Bujuran lih Su, Imah ditunjul kawannya?” Usu Upi maitihi wan Aspul, sapupu makacil Masnah. Badudua awak basah, imbah umpat banyalam mancarii Imah.
“Siapang manguya ngitu?”
“Nang kawan jar bapadah, si Sari. Imbah gugur, jar kawannya malihat ai tangan Imah kakarancawai di banyu, imbah ngitu hilang.”
“Pamali manyambat ngitu, saurang kada malihat sabujurannya, maras kuwitan Imah wan kuitan Sari wan Idah. Kita jangan manambahi pamikiran nang kada karuan, isuk kita ganii pulang mancarii Imah.”
“Inggih, Su ai.”
***
“Cil, jakanya Sari wan Idah ni bawa bajauh haja hulu, kaluku tadimapa-dimapa, ngalih kaina.”
“Nyapang garang?” acil jubai batakun wan amang ibad.
“Inya Cil ai urang tumbur mun anak pakacil Sabran gugur ngitu ditunjul Idah. Andika patuh haja wan parangai pakacil Sabran mun sidin sarik.” Acil Jubai hinip.
“Sari, bujuran lih Idah manunjul Imah?” Sari kada baburinik, Idah makinannya, hudah am basungkup
“Hiih lih, mun dintu kami tulakan ai hulu ka rumah Julak Imas di kampung Kuminting.”
“Lakasi Cil ai, basisiap nyaman diatar basapida mutur.”
***
Subuh, ari pina ririmisan, Makacil Masnah wan Pakacil Sabran kada sing guringan, kaingatan Imah, anak saikungannya. Ubuii ai, marista diri, siapang lagi nang maungahi, mahibur hati, wan cagaran mangawani mun kaina tuhaan. Pakacil sabran kujuk-kujuk ka padu ka luar kada karuan, pandiran urang anaknya gugur ditunjul Idah mamusangi kapala. Mun manurutakan hati, asa handak ditimpasnya tu pang si idah ngitu. Kada saapa manjuuk pulang ka padu, mancarii parang bakumpang, kada lawas, disut-disut maasah. Uma ai haranya Makacil Masnah.
“Abahmu, napang pina maasah parang.”
“Ikam kada mandangarkah pamandirian urang, anak kita ditunjul Idah.”
“Abahmu, pandiran urang diasi, ngini musibah abahnya ai wan siapang nang malihat. Nang kita pikirakan wayahini dimapa anak kita tu lakas tatamu.” Ranai Pakacil Sabran madangar suara Makacil Masnah, tagal tatap haja maasah parang. Kada lawas duduk hidin taluyuk di higa lawang, tasandar ka dinding, basingguguk manangis. Makacil Masnah umpat jua barubuian banyu mata.
“Manya, saiikungannya kita baanak, mati ha pulang, dimapa kita Umanya.”
Makacil Masnah kada sing suaraan. Hinip hidin.
“Manya, kamanalah kita mancari urang nang bisa manulungi mancarii Imah.”
Sambil basisigan, Makacil Masnah manyahut, “samalam tu Bah ai, abahnya Dilah mamadahakan ada urang pintar nang bisa manangguh lamasnya Imah, sidin badiam di Kampung Kuminting. Baisukan ni ai pian mancarii, jar habar ngaran sidin Haji Adul.”
“Suruh Upi haja mancarii, aku manya ai bilang liyut bangat kada badaya.”
***
Haji Adul basila di tabing, maitihi batang banyu nang sasain badalam, hidin malihat bapupuluh buhaya malukupi Imah, mancirat mata buhaya kuning maitihi mata Haji Adul nang bakantup. Ari sasain batarang, muntung Haji Adul kuriming-kuriming, nangapakah nang dibaca hidin, di hadapan, bawadah cipir sing, hintalu talu igi, pisang amas talu igi basusun. Urang hinip maitihi, kadada nang wani basuara, Makacil Masnah wan Pakacil Sabran gin kada sing suaraan, sindam dudukan di higa Haji Adul.
“Siapang nang pacangan tulakan mancarii?” Haji Adul batakun bakakajutan.
“Kami Pa Haji ai. Kami matan Banjar.”
“Kami jua Pa Haji ai.”
“Ingatakanlah, papadahku ngini, cipir sing baisi hintalu wan pisang kularutakan, buhanmu mairingi haja, tikas mana inya tinggalam, tabalikkah, kana umbakkah, si situ tu mayatnya si Imah, buhanmu kawa malihat sakalibasan haja, mayatnya timbul, pas urang subalah manyambut hintalu wan pisang. Lakasi jangkau, amun buhanmu kada kawa manjangkau pas inya kalihatan ngitu, kada pacangan tahaga amun talu ampat ari haja.” Burinjingan burit tundun urang nang mandangar papadah Haji Adul.
Kada saapa, Haji Adul malarutakan cipir sing ka batang banyu, bubuhan nang mancarii hudah basiap barataan, Upi wan Aspul umpat di sapid bubuhan tim SAR. Nang lainnya bajukung wan balanting. Masin sapid babunyi, gimit haja mairingi cipir baisi hintalu wan pisang, bangsa dudua puluh mitir, di lu’uk, pas di bawah kariwaya, cipir tabalik, umbak nang kada tahu di mana datangnya saling ganalan mahantam sapid, mata Upi malihat hubayang awak, balalu bacabur manyalami, tangan Upi manjamba tangan nang mahalimbayang ngitu, babaya dapat dipingkuti pisit-pisit, harau lincar bangat, takalapasan pulang, ancap Upi banyalam, manjamba baasa. Aspul bacabur jua, sabalah tangan manarik tangan Upi, sabalah tangan bapingkut di tali. Upi handak tatarik ka lu’uk jua, liwar barat awak Imah, pangrasanya ada nang manarik wan manahani awak Imah matan dalam banyu. Bangsa satangah jam batatarikan, Imah kawa dibawa ka atas banyu, dinaikkan ka sapid. Upi wan Aspul bilang siup, tapangai, tarabah, kauyuhan, untung kada lamas tatarik jua ka lu’uk.
***
Manggarung Makasil Masnah manangis maragap mayat Imah, Pakacil Sabran laip. Ari burintisan, bajurut urang manandu Imah, Pakacil Sabran, Makacil Masnah, kada taitihi lagi Haji Adul nang masih duduk basila di pinggir batang banyu.
Mayat Imah diandak di tangah rumah, masihai pian hangat awak Imah, nang kaya urang hanyar mati, lamah jua awaknya. Kada karasaan nang maitihi gin nangisan. Tagangan pintarnya Imah nangitu, rancak maatari urang higa mahiga mun umanya manggangan atawa maulah wadai. Kamarian rajin tulakan mangaji ka langgar, kaina rajinan mangginii umanya basapu, babarasih rumah.
Imbah juhur, mayat Imah dikuburakan. Bakakampungan urang maatar, hibak alkah pakuburan. Kuitan Imah bagimit bajalan, diirit bubuhan kula hidin, abah Imah babarapa kali hudah laip. Pas urang handak mananam Imah, laip pulang hidin, makinannya urang maras kasihan wan kuitan Imah.
***
“Ikam ngini babisa-bisa, maulah hual wan kami.”
“Maulah hual napa, buhanmu nang maambil anak urang.”
“Banyu mangidam, kami minta palas, urang kampung kada apikan. Banyu dirigati, matan hulu bilang kada sakira rigatnya, banyu alahan pada tih, tu nah, buangan batu bara, bubuhan siapa ngitu ampun gawi mun kada buhan ikam. Iwak matian, kumpai pinggir banyu layuan, bilang kada sakira puricinya buhanmu, ka manang kami badiaman, awas buhanmu.”
“Ngitu bataha gawian kami, buhanmu asal haja maambil anak urang.”
“Ikam jua, babisa-bisa, mun kami sarik, kada kasimbahan buhanmu. Matan jauh haja, pakirim kami hampai. Garingan buhanmu barataan, biar kamana batatamba, mun kada matian.” Haji Adul mahingal, mata hidin tatap haja bakijim.
“Gantii, kakanak nang hudah ikam ambil ngitu.”
“Napang kahandak buhanmu?”
“Ikam bawa lakatan, bubur habang, bubur putih, hintalu, kopi manis, kopi pahit, pisang amas, wan ingatakan, mun buhanmu tatap haja marigati sungai, tunggal ikungan buhanmu garingan.”
***
Haji Adul laip di pinggir batang banyu, untung Julak Ibad malihat, lalu ai di tandu ka rumah pambakal.
“Buhanmu, ulahakan pasanan urang halus, ingatakan jua kuitan Imah, Sari, Idah, babaikan haja. Ngini musibah, kadada urang bakahandak.” Haji Adul papadah pas hidin kawa babangun.
“Pambakal, mun kawa dipadahi urang kampung barataan, pas banyu dalam ngini, kada usah gin ka batang banyu, kaluku dibatak urang. Sabuting pulang, sungai kasiam jangan dirigati, bujur-bujur dipalihara. Andika Pambakal ai, kawa mamadahi wan kakanakan jua, kada usah bamainan ka batang banyu kaluku ditanggung tambun.
***
Saminggu, imbah Imah dipatak, pambakal mangirim surat ka camat, mamadahakan parusahaan batu bara yang bahulu di batang banyu Limpasu katuju mambuang limbah batu bara ka batang banyu. Mun kada dihatiakan, bubuhan kampung Limpasu pacangan mambawai jua kampung Kuminting, Kampung Maritam, jua Kampung Binjai badimu ka batu bara atawa ka kantur kacamatan.
Batang banyu basurut, puhun kamarian, pambakal diiringi bubuhan urang kampung Limpasu, tulakan ka batang banyu. Babaya hampai di pinggir batang banyu, tunggal butingan Haji Adul malarutakan kahandak urang subalah. Imbah ngitu, bajurut urang bulikan ka banua, ari sasain bakadap, kada lawas hujan burintisan. Kampung Limpasu hinip, asing-asingnya urang mangancing lulungkang, manyunduk lawang, kadada tahaga manusia nang rajin kajuukan ari sanja. Amun di batang banyu maka’am, sasain malam, urang sasain barami, kaciratan mata sambil bajihau maitihi wan manciumi lakatan batampa, bubur habang, bubur putih, hintalu, kopi manis, kopi pahit, pisang amas kiriman urang Kampung Limpasu. ***
Sumber:
https://www.facebook.com/hatmiati/posts/1283132771728829
0 komentar: