Cerpen Haderi Ideris: Papadahan untuk Anakku

07.18 Zian 0 Comments

Rintik banyu hujan mambasahi kaca rumah, rasa dingin hambusan angin manyapa wajah, manambah suasana jiwa yang lapah, rasah dan gundah karma mamikirakan jaman samakin hari samakin baubah, mulai jaman panjajahan, jaman revolosi, jaman kemerdekaan. Jaman kemerdekaan masa orde lama, orde baru sampai jaman reformasi, wayah ini kita mamasuki jaman global.
Jaman global, habar nangapa haja ada, bisa dilihat di dunia maya alias internet jar urang wayahini, ilmu dibuka saluas-luasnya, kadada batas, inilah jaman yang mahawatirakan bagi ganarasi anak cucu.
Sairing dibukanya habar maupun ilmu pangatahuan sabanyak-banyaknya, ada satu hal yang bakurang saulah-ulah ditutup yaitu akhlak.
Inilah masalah yang salalu dipikirakan H. Adul, supaya anak katurunan sidin kada tarlindas dan tagilas arus jaman, sidin bausaha manamakan pamahaman agama sadini mungkin lawan anak-anak sidin.
Bila manjalang guringan H. Adul mahiyawi anak-anak sidin, nang bangaran Utuh Ganal, Utuh Angah, Aluh Lantih, Utuh Halus, Iyang Juliha, Amat, lawan Iyang Sarinah.

Malam itu H. Adul bapadahan lawan katujuh anak sidin, didampingi bini sidin nang bangaran H. Amas Mulia
H. Adul tamasuk kaluarga nang kada maumpati lawan program pamarintah nang bangaran Kaluarga Barancana alias KB, makanya anak sidin banyak, sidin yakin urusan rajaki Allah yang manjamin. Walaupun kaya itu sidin kada juwa pang maharamakan KB, Jar sidin mun tujuannya untuk mamparmudah pandidikan anak, KB syah-syah haja, tapi jar sidin KB itu ada yang bulih ada yang kada bulih, dilihat dari alat kotrasepsinya pulang. Kamudian dilihat dari tujuan dari ba KB.
Mun tujuan ba KB karana takutan kada kawa mambari makani anak, ini tasalah, ini sudah jatuh pada urusan akidah tauhid, ini nang barbahaya.
“Alhamdulillah malam hari ini kita masih dikumpulakan Allah dalam kaluarga” H. Adul mulai bapander pacangan bapapadahan lawan anak sidin.
Alhamdulillah, walau kaluarga kita dipadahakan urang kada maumpati program pamarintah nang bangaran KB, abah rasa ini kada wajib juwa. alhamdulillah kita makanan haja, kita KB juwa ngarannya Keluarga Besar bahagia. Dan ini adalah bagian dari hak kita, hak barbuat dan hak barpandapat, abah rasa urang lain yang paham lawan arti demokrasi akan mangarti salama hak itu kada marugiakan urang lain.
Buhan ikam parlu tahu, abah ni urang sakulah juwa, limbah tuntung maraih galar Lc, di Mesir, abah tulak ka Jerman, kuliah di sana, pangalaman abah disana waktu tahun lapan puluhan. Jerman sudah tadahulu barhasil malaksanakan program KB sakitar tahun tujuh puluhan buhan ikam balum adaan lagi, bahasil manakan parkamabangan jumlah panduduk, tapi timbul kakhawatiran pamarintah Jerman lawan jumlah panduduk yang samakin bakurang, samantara para pandatang samakin batambah, Jerman khawatir kalau-kalau jumlah pandatang akan mangalahkan buhannya, kakurangan buruh dan sabagainya, akhirnya pamarintah Jerman maambil kabijakan untuk mambarikan santunan kapada siapa saja yang hamil dan kaluarganya, bahkan sampai dibari gajih anak-anak yang lahir, artinya jamianan panghidupan bagi yang mamiliki banyak anak.
Abah juwa khawatir lawan Indonesia ini, jumlah penduduk tarbasar ka ampat saluruh dunia dan jumlah Islam yang tarbasar, tidakkah manjadi kakhatiran dan ancaman bagi nagara Adidaya. Makanya nagara-nagara yang manganut paham kapitalisme dan leberalisme sangat khawatir dangan dunia Islam, buhannya baupaya malamahkan Islam dangan cara yang halus, tarmasuk dangan cara KB. Balum lagi malamahan ganarasi Islam lawan obat-obat tarlarang, pargaulan bebas, malalui makanan, bahkan parlu kita waspadai juwa imunisasi yang katanya untuk kakabalan anak, parlu masih dipartanyakan. Palu dianalisa.
Urang bahari kadada baimunisasi sihat-sihat haja dan pintar-pintar, kanapa wayahini pina pambabal, lulusan nai UN tapi dipadahakan liwat sms ini manunjukakan kakananakan wayahin kurang pintar.
Abah ada kawan, kalurga kawan abah itu bagawi di kasehatan tarnyata jar kawan abah itu samunyaan anak-anak sidin nang bagawi di kasehatan itu kadada nang baimunisasinya. Maka anak kawan abah itu samunyaan sudah diimunisasinya, ini nang jadi tatakunan kawan abah itu. Tatakunan kawan abah itu tarjawab waktu inya malihat acara di TV, jar nya ada hasil panalitian bahwa pangaruh imunisasi dari segi nigatifnya yaitu manurunnya kapintaran anak, ibarat kapintaran yang dibari Tuhan sapuluh kada kawa lagi mancapai sapuluh, paling kawa dalapan haja.
Kadalah kita dijajah, mun ganarasi kita kaina bungul-bungul, dan kada banyak lagi urangnya, nyamanai lagi nagara asing nang pintar-pintar teknologi dan banyak jumlahnya manjajah kita.
Buhannya tu karana pahamnya sudah kaya itu ngalih maubah, kapitalisme dan leblisme sacara fisik buhannya maakui nagara-nagara jajahan merdeka, tapi disisi lain buhannya bausaha manjajah dangan cara lain.
Sadar kada sadar nagara kita juga sudah dijajah sacara ekonomi, kita ni nagara kaya dangan sumbar daya alam yang barlimpah tapi kakayaan alam kita justru diangkut oleh nagara asing. Hanya sadikit parsen untuk kasajahtaraan rakyat.
Nagara kita mungkin manjadi incaran Amereka setelah Afganistan dan Irak. Campur tangan Amereka di Palestina, sampai wayah ini Palestina kada aman.
Salama katidakadilan dan kazaliman dari pihak asing tautama Amereka, tarbuktikah tuduhan Amerika lawan Irak, tarnyata kada. Isu adanya teroresme kan Amereka yang mahambusakan, dan tujuannya kapada dunia Islam, abah rasa teroresme baik di Indonesia maupun di nagara Islam lainnya sulit dihilangakan.
Produk-produk hukum kita juwa masih ada indikasi takanan dan titipan dari pihak asing, misalnya masalah perkawinan.
Kaya apa buhan ikam, sudah ngantukankah? Mun ngantuk abah cukupakan dahulu sampai di sini papadahan abah. Kaina malam isuk abah sambung.
“Ngantuk kada pang tapi tegang, kisahnya sarius banar, sampai masalah terores, Amereka, Jerman. Malam esok gen pulang pian manyambung, jam sablas dah bahai.
Malam esoknya H. Adul kambali papadahan lawan anak-anak sidin, untung banar anak-anak sidin paasian sabarataan walaupun banyak.
“Anakku sabarataan, kita wayahini sudah banyak karusakannya, mulai dari alam yang dirusak sampai lawan akhlak nang rusak. Sumbar karusakan itu kada lain nakkai karana ulah manusianya juwa nang kada mau mangandaliakan hawa nafsu nya, nafsu duniawinya haja nakai yang dipikirankannya nang dturutakan”.
“Contohnya bah nang kaya apa?” Jar Utuh Ganal batakun
“Nafsu duniawi itu nakai, nafsu yang manurutakan kainginan dunia samata, kada ingat lawan balasan akhirat, itu nakai nafsu yang maursak karana inya kada ingat lawan mati, kada ingat lawan akhirat, maka inya hanggus tarus , halal haram inya kada parduli. Bila itu manimpa pamimpin kita, alamat kacau nagara ini nakai, kasajahtaraan hajnya janji waktu kampanyi, inya wani maatasnamaakan agama, buktinya nang miskin tatap haja miskin. Nang sugih batambah sugih”.
Lalu Bah Nafsu nang baik pang kaya apa? Jar Utuh Angah Batakun juwa.
Nafsu yang baik itu nafsu yang mutmainnah, nafsu yang diridhai Tuhan, yaitu nafsu atau kainginan atas dasar landasan karidhaan Allah, apabila inya handak berbuat sasuatu inya bapikir apakah nang aku lakukan ini Allah dan rasul Nya Ridha apa kada, inya salalu barpagang kapada tuntunan agama dalam barbuat dan bartindak. Dan inya salalu manyandarkan urusan kabaikannya kapada Allah, bila inya tasalah inya capat barpaling dan kambali kapada Allah dengan bartaubat.
Orang yang mamiliki nafsu yang diridhai itu, bila inya orang sugih inya akan darmawan dan kada mau manyumbungakan hartanya. Bila pajabat inya salalu mamikirankan kapantingan rakyatnya.
“Mun kaya itu sabarataan pajabat kita diIndonesia nih bahai pacang sajahtra sabarataan”, Jar Aluh Lantih manyahuti abahnya.
“Itu jua yang diharapan urang sabarataan”, Jar Iyang Juliha.
“Tapi mun malihat barita diTV bilang asa jauh pang harapan nang kaya itu” Jar Utuh Ganal.
“Jangan kaya itu, kita harus samangat, kita jangan mamikirakan urang, yang panting mulai dari diri kita dahulu, mulai dari kaluarga kita dahulu, makanya pardalam pamahaman agama yang banar, jangan satangah-satangah, ingati papadahan abahmu tu nah, mun buham ikam paasian lawan abah mama insya Allah barakah hidup” Jar H. Amas Mulia bini H. Adul umpat manyahuti pamandiran anak-anak sidin.
Malam mulai larut, suara jengkrek bersahutan malantunkan tasbeh mangiringi parjalanan waktu.

Sumber:
https://www.facebook.com/notes/haderi-ideris/kisah-bahasa-banjar-papadahan-untuk-anakku/394991688812