Cerpen Haderi Ideris: Salah Sangka

07.21 Zian 0 Comments

Jar urang tuha bahari dimana bumi dipijak di situ langiti dijunjung, artinya bila tulak kamana-mana parlu mahurmati orang lain. parlu menghargai adat istiadat urang lain. pintar mambawa diri. insyaallah pacang salamat.
Papadah itu nang diingat Utuh Lakui bila tulak kamana-mana, dasar bujur inya dihargai juwa, dihurmati urang juwa inya, walau inya kada sakulah tinggi, tapi inya mautamakan banar lawan adab, atawa akhlak, supan santun, Mun inya kada tahu, inya dasar bapadah kada tahu, inya sayang lawan nang anum dan hurmat lawan urang tuha.
Utuh Lakui saraba rasuk bagaul, matan kakanakan, sampai bubuhan pajabat inya patuhan, kada hanya patuh, tapi akrab banar, bahkan Bupati.
Suatu katika, Utuh Lakui, di bawai Bupati Baziarah ka Makam wali sanga. Utuh Lakui inya kasukaan banar, lawas sudah inya handak baziarah ka wali sanga, tapi kadada baisi duit. Pas banar jar Utuh lakui Bupati mambawai,. Kada bapikir panjang langsung diakurinya.
Saumur-umur utuh lakui kada suah babuat di pasawat, alhamdulillah jar Utuh lakui tarasani juwa bapasawat. Uma-uma lahai, paramugarinya bungas-bungaslahai".

Dasar utuh lakui mamagang banar lawan prinsip mun kada tahu batakun, macam-macam tatakunan utuh lakui, kada lawan kawan di higa, lawan pramugari maklum urang hanyar suwah.
Pas tiba rumbungan Ziarah ka hotel, Utuh Lakui bauntung banar takumpul lawan Bupati, jadi bila napa-napa inya batakun lawan bupati.
"Pa mun pian handak mandi yuja pian badahulu" Jar Utuh lakui mamandiri Bupati
"Ya,ya, Ukun kaina ja dulu ada urusan lagi, ulun handak ka Lobe hotel dahulu, yuja pian mun handak mandi, mandi ja badahulu.
"Mun kaya itu ulun badahuluainah"
Utuh Lakui masuk kamar mandi, nangaran kada suwah ka hotel, Utuh Lakui bingung," kaya apa mandi, bahira lawan bakamih mun kaya ini wc nya, hotel nangapa ngini cicibukja kada baisi". Utuh Lakui gagarunum surangan.
Utuh lakui kada jadi bahira, kada jadi mandi, tapaksa mahadang Bupati, Pas Bupati datang limbah baurusan. Sidin manakuni lawan Utuh Lakui, ' sudahkah pian mandi".
"Kaya apa ulun handak mandi lawan bahira mun cicibuknya ja kadada, hotellah nangini ngarannya, miskinnya pang?" Jar Utuh Lakui manyahuti Bupati.
"Hahaha, Bupati tatawa mangalakak, sambil tauling-uling kapala.
"Napa pian tatawa?, ulun ni bujur harusja nah kada suwah nangaran ka hotel, hanyaram nangini, Uh sakalinya kayaini lah nangaran hotel, WC, pamandiannya kadada cicibuknya.
"Sini Iringi Ulun" Jar Bupati
Utuh lakui mairingi masuk ka kamar mandi.
"Nah, mun pian handak bahira, nih disini, badudukja lagi pian, mun handak babasuh, nah tuh picik kran nang kaya selang ininah, mun pian tuntung, handak manyimbur bakas pian bahira, picik di sisni, kaluaranai banyunya mandasau, tinggalamai lagi tahinya.
Nah, mun pian handak mandi di sisini, mun pian putar kakiri nang ada tombul habangnya banyu nang kaluar panas, bila kakanan yang ada tanda birunya kaluar banyu dingin, lalu tarik madasauai banyunya kaluar nang kaya banyu hujan, handak dinginkah panaskah tasarah haja" Bupati manjalasan lawan Utuh Lakui.
Utuh Lakui lihum surangan, "han napa tiya ulun tasalah sangka sudah, sakalinya dasar ulun nang bungul kada tahu. hehehe pangalaman baharaga banar Bupatiai, lawan diulun, dasar bujur pangalaman adalah guru nang paling baharaga".
Ya,ya,ya,

Sumber:
https://www.facebook.com/notes/haderi-ideris/kisah-bahasa-banjarsalah-sangka/394676083812