Cerpen Haderi Ideris: Juduh

07.44 Zian 0 Comments

Tetangga H. Adul yang bangaran H. Busran, biasa digalari Julak Ibus, bini sidin bangaran Hj. Jumiati, biasa dikiyau Acil Ati.
Keluarga Julak Ibus ini dikenal oleh orang kampung sebagai keluarga harmonis, kada suah tadangar ribut, baikan banar lawan tetangga, bila ada orang kamatian atawa orang bapangantinan, keluarga Julak Ibus ini hakun ja sidin mambantu baik barupa baras, lawan duduitnya, kada hanya itu sidin dua laki bini ini lawan tatanaganya, hakun bacalumuk jua mengganii orang nang bahawuran, baharaguan.
Walaupun Keluarga Julak Ibus dipadahakan orang keluarga harmonis, tapi manurut sidin, kada sampurna balum kalau kadada baisi binantu, maklum acil Ati wan julak Ibus sudah tuha, handak juwa nangkaya orang lain manimang cucu. Itulah kaluhan yang rancak dipandir Julak Ibus lawan H. Adul abahnya Aluh Katinting.
“Aku hiran jua lawan anakku nang saiikungannya nang bangaran Budiansyah, alias Si Utuh Sibud, Pina kada hiran-hiran handak babini”. Ujar Julak Ibus bakisah lawan H. Adul.
“Suwah lah sudah ikam tawari inya, handaklah babini, kalu-kalu inya supan bapadah” Ujar H. Adul manyahuti pamandiran Julak Ibus.

“Kada suwah pang balum manakuni inya, aku kira kaya kakanakan wayahini, balum napa-napa sudah wani mambawa anak urang ka rumah”. Ujar Julak Ibus.
“Nyataai inya kada wani, cubaakan ja wani mambawa anak urang, nyata dah ikam mahamuk, aku tahu keluarga mu tu manjaga banar nang kakaya itu”. Ujar H. Adul pina maambung lawan Julak Ibus.
“Jadi kaya apa am pandapat situ, aku asa bahiri pang lawan situ, sudah dapat binantu Utuh Kariting nang cangkal bagawi, lawan aku lihat Aluh katinting pinanya batianan sudah, pacang dapat cucu am urang’.
“Yah bujurai cangkal bagawi, tapi pang… mun ingat kisahnya waktu hanyar kawin, aku takurihing surangan, sampai kada kawa bahinak ampunku dikacaknya, dikiranya luku nang kaya itu urang sambahyang, sampai bakacak ampun imam”. H. Adul takurinyum.
“Tapi, aku angkat topi lawan situ, bahasil mambimbing binantu jadi jua nang kaya urang, bahkan sudah bisa jadi Imam”, Sahut Julak Ibus.
“Alhamdulillah barkat sabar, Busai!, siapa lagi nang diharapakan mun kada kita-kita nang tuha ini, mambimbing nang anum, supaya mun kita sudah matian, ada nang mangganti kita, nah sual anakmu Utuh Sibud aku yakin inya supan bapadah haja lawan ikam, cuba takuni inya, mun kada ditakuni kada tahu, handak babinikah kadakah?’’, ujar H.Adul mambari saran lawan Julak Ibus.
“Hi ih lah, malam kaina pas takumpul di rumah kami pacang manakuni inya, makasih banyaklah Ji saran ikam, aku parmisi ja laginah handak bulik. Assalamu`alaikum”. Julak Ibus mambari salam sambil badiri, H. Adul manyahuti wa`alaikum salam, mudahan sukses.
Malam pun tiba, imbah makanan, Julak Ibus bapandir lawan bini sidin Acil Ati, sual saran H. Adul tadi siang. “Kaya apa umanya akur jalah ikam kita takuni inya malam ini”.
“Aku ni akur banar abahnyaai’.
“Lakasi kiyau Utuhnya kasini” jar Julak Ibus manyuruh bininya.
“Tuuh, sini tuh, abah mama handak bapandir lawan ikam’’.
“Enggih, pun . Napa Bah, napa Ma pian pina sarius banar, kada biasanya mahiyau ulun. Rajin tu waktu makanan, sudah biasa ja kita bapandiran soal agama, kaluarga. Tapi ini pina lain”. Jar Utuh Sibud.
“Kayaini Tuhai, sini duduk dulu ikam, Abah lawan umamu ini handak batakun lawan ikam, sualnya abah lihat kakawanan ikam sudah bakaluarga barataan tinggal ikam ja lagi surangan”.
“Maksud Abah? Pian manawari ulun babini?’’ Ujar Utuh Sibud, pina susupanan.
“Kaya apa am tuh ada juakah sudah pilihan ikam”. Jar Umanya manyahuti.
Utuh sibud inya badiam haja kada manyahuti tatakunan mamanya.
“Atau ikam handak manuruti Syekh Abdul Qadir Jailani kah pina kada tahimi-himi handak babini, sidin Tu Wali Allah Ta`ala nakai, wajar haja sidin baucap; kada pacang babini kacuali Rasulullah yang manyuruh babini. Sidin urang nang parak lawan Allah dan Rasulullah”. Ujar Julak Ibus mangira-ngira pikiran anaknya.
Utuh Sibud tatap badiam.
“Atau kaya ini haja nah”, Jar mamanya manyahuti pamandiran abahnya “sambat haja ngaran bibinan yang ada di kampun ini, nyaman kami mandatangakan”.
Utuh Sibud manarik napas, lalu baucap; “Bah.. Ma.. ulun manghargai banar kainginan pian, tapi ulun muhun maaf , mun bibinian nang di kampung kita ni, ulun kadada baliur”,
Mandangar pamandiran nang kaya itu Julak Ibus lawan bini sidin kada kawa bapandir lagi, sudahai. Tapi Utuh Sibud manyambung pamandirannya; “Kaya ini Bahai, Maai, ulun ni handak pang mancari bini nang takumpul kaduanya, antara Sabar lawan Syukur, Karana pahala Sabar lawan syukur tu jar pian kan sama-sama ganal pahalanya”.
Julak Ibus lawan bini sidin manggut-manggut, tapi kada mambari tanggapan. Utuh Sibud manarusakan pamandirannya: “ Untuk itu Bahai ,Maai, tampulu kita takumpul ini ulun handak minta ijin lawan pian, handak tulak madam, kalau-kalau di parantauan kaina ulun tatamu nang ulun cari”.
Julak Ibus lawan bini sidin manunduk pina sadih, handak diijinakan, pacang tatinggal duduaan. Kada diijinakan tia manyuruh inya mancari bini, ya sudahai.
“Mun kaya itu kaputusan ikam nakai, kami kada kawa manangati, kami badua hanya mandu`akan supaya ikam salamat di kampung urang, lawan capat bulik mun sudah tatamu nang ikam cari” Julak Ibus bapandir pina bunyi sadih. Apalagi nang bini sudah maingui manangis karana mangganang pacangan tapisah lawan anak samata wayangnya.
“Kamana ikam handak tulak madam, nak”, Ujar Acil Ati, sambil maisak manangis.
“Ulun handak madam ka Tamban, Maai” Ujar Utuh Sibud manyahuti umanya pina rasa sadih juwa.
Keesokan harinya, Utuh Sibud bapamitan lawan Kuwitannya, limbah mancium tangan mama-abahnya.
Sabulan sakali Utuh Sibud mangirim surat, mahabarakan kaadaannya di kampung urang. Kuwitannya, mambalasi surat tarus manakunakan habar sudahkah tatamu bibinian yang diidamkan Utuh Sibud.
Satangah tahun balalu, tarnyata ada kabar bahwa Sibud sudah babini, dan inya mahabari lawan kuitannya bahwa inya pacang bulikan ka Amuntai.
Hari yang dijanjiakan Utuh Sibud sudah sampai, hari Ahad inya insyaallah pacang datang. Julak Ibus lawan Acil Ati hari itu sanang banar. Acil Ati sudah manyiapan kamar, manyiapan makanan kasukaan Utuh Sibud, Pupuyu tabahan babanam, lawan cacapan ramania, gangan karuh susupan, kaladi langkat. Ditambah mandai tiwadak.
“Abahmu-Abahmu, Tu Taksi singgah di halaman rumah kita, bisa anak kita lawan binantu kita sudah datangan”. Acil Ati Satangah bakuciak mahiyau laki sidin, karana rindu banar handak badapat lawan anak dan binantu.
Mandangar nang bini mahiyau, Julak Ibus langsung manunti bini sidin, “Nah ya ai Manyaai, Tu Anak kita juwaai, nang datang”. Jar Julak Ibus rasa kahimungan.
Utuh Sibud manurunakan Tas, Uma –abahnya jantung sidin gadagupan banar, mahadang nang mana jua binantu nang dinanti-nanti. Kada lawas Turunai, bibinian basarudung.
“Nah Tu Abahmu, hau ...lihat … maka jar Utuh Sibud bininya haja nang pacang datang, sakalinya bintuhanya umpat juwa”. Ujar Acil Ati.
Hadang-dihadang kadada juwa turun bibinian nang lain. Rupanya Julak Ibus mulai maklum. Dan baucap lawan nang bini sambil babisik “ Ini pang liur anak kita umamuai, tatuha pada kita, aku kira bintuhanya”.
Acil Ati tauling-uling kapala, dan hanya kawa baucap dalam hati: “Umai-umai anakku bauntung banar mamilih bini, dipadahakan di kampung surang kada baliur, sakali babini tatuha pada kuitan”.
Julak Ibus kada sabar lagi handak mambulikakan pamandiran anaknya, sidin langsung mamaraki Utuh Sibud, Utuh sibud langsung manyalami abahnya. Imbah basalaman Sidin langsung maragap Utuh Sibud lalu Baucap di talinga : “ Ini kah jar ikam liurmu, nak”.
“Hadang dulu Bahai, malam kaina ulun kisahakan, kanapa liur ulun mamilih sidin itu”.
Julak Ibus galisah mahadangi malam, napa jar kisah Utuh Sibud sampai maambil bini tatuha pada kuitan surang.
Malam pun tiba, Acil Ati Saraba salah, handak baucap basisi mahiau ngaran tia tatuha pada surang, baulun pabian tia binantu.
Pas waktu bintuha lawan binantu kadapuran, Julak Ibus mahiyau Utuh Sibud, balum lagi abahnya batakun, Utuh Sibud langsung Bakisah:
“Bah, pian ingatlah waktu ulun handak tulak madam, jar ulun, ulun handak mancari bini nang takumpul sabar lawan syukurnya, nah tarnyata bini ulun ini nang mangumpul kaduanya”.
“Maksud ikam?”.
“Bila ulun bajalan ka pasar lawan bini ulun, pas ada urang marawa, Mai tuhannya bini. Ulun basabar”.
“Lalu Syukurnya dimana?”.
“Nah, syukurnya bahai, bini ulun kada banyak tagihan, paling nang diturakan tapih bahalai, lawan kutang dua tiga buting cukup, kada mamikirangan gincu manggincu, pupur mamupur, salup-manyalup”.
Imbah dijalasakan kayaitu, Abahnya paham, dan sidin kada maniwas lagi, sidin manyadari inilah judu yang dibarikan Tuhan lawan anak sidin.
“Ridha nakai aku dunia akhirat” Jar Julak Ibus.
Malam hening mambawa kesejukan, menebur benih-benih cinta sepasang kekasih, mereguk mimpi-mimpi yang indah.
Wassalam.


Sumber:
https://www.facebook.com/notes/haderi-ideris/kisah-bhs-banjar-juduhjodoh/381768973812