Cerpen Haderi Ideris: Basambat Ngaran

07.11 Zian 0 Comments

Ada tiga orang sahabat yang sangat akrab, kamana-mana buhannya  batiga. Ngarannya sambat haja Amat, Ibrahim lawan  Musa.
Pada suatu hari buhannya  sapakat handak tulak  marantau ka banua urang, mangadu nasib, supaya  baubah  nang  labih baik. Sampai pada sabuah kampung, dimana  kampung itu hanyar  haja mambangun masjid.
Kabalujur  buhan nang batiga ini dikatujui urang kampung. urang kampung manunjuk buhannya  manjadi pangurus masjid. Diambil  kasapakatan bahwa Amat ditunjuk jadi katua, Ibrahim sakratarisnya,  Musa  bandahara.
Wayah sambahyang subuh, imam mambaca ayat nang  panjang yaitu surah Al `A`ala (sabbihis), sampai pada bacaan “Ina hazihis shuhufil ulaa,  Shuhufi  Ibrahima wa Musa,
"wahhh" kata amat dalam hati, kanapa Ibrahim lawan  Musa haja nang disambat, kanapa aku kada, padahal aku katuanya,  jabatanku  labih tinggi dari buhannya"
Tuntung sambahyang Amat langsung manakunakan lawan imam, kanapa inya kada disambat tadi waktu sambahyang? “Tahulah pian Ibrahim lawan Musa itu bawahanku, buhannya tu Sakrataris lawan bandahara haja” , Jar Amat pina musti  mamadahi lawan imam.
“Dasar kaya itu sudah bacaannya” Jar Imam manyahuti Amat.

Dalam hati Amat baucap pina mangarikut gigi  “ kada pacangan jadi  imam lagi muhamuai”
“Pian tahulah” Jar Amat  suaranya pina banyaring, “Buhannya nang badua tu napa jar ku, apalagi  ikam ngini ha” , kada baulun basampian lagi Amat lantaran muar malihat imam karna sidin kada manyambat Inya waktu sambahyang.
“Mulai wayahini jua, Ikam ku ampihi jadi Imam di masigit ngini” Jar Amat baidabul surang, kada batukar pikiran lawan pangurus nang lain.
Tauling kapala siimam mandangar  Amat baucap nang kaya nitu. Dalam hati sidin baucap, dasar urang nang kada bailmu, inini  kajadian  maulah pangurus masjid  sahibar malihat urang pintar pandir haja, ilmunya makaam kadada. Ibarat jar urang bahari tu   tong puang nyaring bunyinya.
“Hi ihai, mun kayaitu  kaputusan situ, aku  akur haja, kada papa”.
Imbah maampihi imam, Amat langsung bacari imam  nang hanyar.  Cari-cari, rupanya tadapat lawan Julak Sani,
“Jah, kamana ikam Mat pina mangincang bajalan”,  Jar julak Sani marawa Amat.
“Nah nikamam, kabalujuran tatamu pian di sini” Jar Amat.
“Napa te habar, pina  bunyi  musti banar”, Jar Julak Sani.
“Pian tu ulun dangar, harat mangaji, ulun handak menyruh pian jadi imam di masigit, kaya apa am, hakun haja lah pian?
“Imbah pang, imam nang dahulu pang mana, garing kah sidin?
“Kada garing kada sidin, sidin tu ulun ampihi”.
“Haau, Kanapa te jadi diampihi?
“Bujuran, kada badudustaan  , ulun ni tasinggung banar lawan sidin tu, kanapa Ibrahim lawan Musa haja disambat waktu sambahyang, ulun kada, padahal  ulun katuanya, buhannya nang badua tu di bawah ulun jabatan, huh tahu rasa muha,  katua dilawan”.
“Uhhh, demia kah kisahnya?
“Kayaapa apa am, hakun lah pian? Amat manjanaki  tatakunannya  lawan Julak Sani.
“Hakun alias akur banar Matai”.
“Ya sip” Jar Amat, “Tapi, ingatakan lah, bila pian manyambat buhannya nang badua tu jangan sampai ditinggal nagaran ulun,  kalau parlu tinggal haja  buhannya tu, timbulakan ngaran ulun ja surangan”.
“Biris, kada usah takutan ikam Matai” Jar Julak Sani basamangat.
Sambahyang subuh pun sampai, Amat Bang, imbah tuntung bang, Amat menyunat dua rakaat, buhan Ibrahim, Musa , lawan jamaah nang lainnya manyunat jua. Imbah manyunat, sakalinya Julak Sani kadada talihat balum datang, Imbah sudah jua mambaca ya hayyu qayyum, balum datang jua julak Sani, pas imbah badua  handak qamat hanyar Julak Sani datang.
Limbah Amat Qamat, Julak Sani langsung badiri, maju ka hadapan manuju ka paimaman, “Sawwu sufu fakum rahimakumullah, fainna taswitas shufufi min tamamishalah”, Rataakan shaf dan rapatakan shafnya” .
Allahuakbar, Julak Sani batakbirartul ihram, Rakaat pamulaan Julak Sani mambaca surah Al A`la  jua nang kaya urang, Pas sampai bacaan innahaza lafishshuhufil ula, imam  tamandak.
Mandangar imam tamandak, luku kada ingat, lalu Amat badaham, ehm, eehmm, eeeehmm. “Jangan khawatir ikam Matai” Jar Ulak Sani dalam hati.
Lalu Julak Sani maulangi bacaannya  “Innahaza lafishshufil ula shuhufi Ibrahima wa Musaaa, Amat katuanyaaaa".
Amat marasa sanang banar, mandangar ngarannya disambat. "nah ini Imam nang  paham. Mangarti banar kahandak katua”.Jar Amat pina takarinyum waktu sambahyang.

Sumber:
https://www.facebook.com/notes/haderi-ideris/kisah-bahasa-banjar-basambat-ngaran/10150100191078813