Cerpen Hatmiati Masy’ud: Bacina Buta

21.53 Zian 1 Comments

HAYAM hanyar bakungkuak, hudah kaciprangan piring pacahan kana timbai. Kada sa’apa halulungan bakuriak, tumbur kada sakira basusubuhan ari. Urang higa-mahiga musti hudah manangguh. Amun nang rancak bakalahi alahan pada kucing kamimiangan handak babini ngitu Marpuah wan lakinya Rasidi.
“Andika ni kada sayang Ka ai.”
“Napang nang kau kahandaki, sambat haja.”
“Ulun lapah hudah wan andika ngini. Andika katuju bangat mawarung, bajalanan bakakawanan kada manantu, anak bini kada tahirani, tabulik pulang kaya bahari.”
“Bubujur bapandir, kaluku kaya nang masi.”
“Napang garang, Andika handak mamunahakan?” Rasidi manggaru kapala nang sabujurannya gatal jua, kabalujuran hibak wan kayakih, asa bamiminggu kada bakujamas.
“Kau nginilah kada maraskah wan buntut nang dua ikung ngitu. Kaluku bujuran, maingui manangis kaina.”
“Andika nang kada maras, sarik saikit maancam, handak mamunahakan.”
“Kau luku nang handak!”
“Punahakan ulun wayahini jua!”
“Mun ngitu kahandakmu, hiih kau kupunahakan.”

Imbah kadangaran Rasidi manyahut, maciprang pulang bunyi piring atawa cangkir pacahan. Kada sa’apa mandabau bunyi lawang dikancing. Imbah tumbur bakalahian kaina hinip, tatinggal Marpuah haja manangis gisak-gisak. Imbahanu mamaus hingus mancipras manimbai ka tawing. Rasidi hudah tulak mangincang tuju ka hulu, musti jua ka warung Acil Mawar, manguhup uriantal wan nginum banyu tih bacampur susu. Hapal urang kampung wan pi’il nang badua laki bini ngini hudah.
Rasidi taungut mahadapi uriantal nang gabul di piring, sacangkir tih susu hudah jua diandak Acil Mawar. Asa kanyang parut, asa kada kawa managuk uriantal ngitu. Mun nang magun kada mayu satungkus, musti batambah. Tuntung makan, palingan saparapat tauna, inya babulik ka rumah.
Babaya hampai ka rumah, lawang mahangap, hayam barayam di palatar. Lakas Rasidi mamburu, tumbar hayam bukahan. Ka manang Marpuah, lawang babukaan, tahi hayam manyabak di palatar. Sarik banaran saku nang bini ngini, palatar kada disapui. Rasidi hancap bajalan lacit ka padu.
“Marpuah!” Rasidi mahiyau bininya.
“Dina, Riski!” Rasidi mahiyau anaknya. Kadada nang manyahut. Rasidi manjanguk kamar. Bahamburan baju di tilam, pinanya bakas Marpuah babubuat baju. Busiah bulik ka rumah kuitannya, imbaham.
Rasidi sasain pusang. Mun taka kuwitan ngini pacangan bangalihan. Hudah dua kali inya mamunahakan Marpuah, dua kali jua bamantukan. Nang pamulaan, marga inya bagandakan. Ngitu sabujurannya taumpat-umpat wan kakawanannya haja nang katuju mawarung. Babaya katahuan Marpuah, tumbur, bakalahian, lacit ka basarakan. Tagal magun haja Marpuah kawa dibisai, hakun dibawai bamantukan. Imbah ngitu, inya pulang sarik wan Marpuah, marga manyambat bakas gandaknya haja. Mauk jua Rasidi, bakalahi sabah ari. Bapunahan pulang. Han, dua kali hudah. Amun ngini pulang, pacangan bangalihan.
Rasidi mangatupi lawang nang kahangapan. Inya musti manunti bininya ka rumah kuitannya. Mambari supan mun bininya sawat tapamalam di situ. Babaya hampai, mintuha laki hudah bajigiran badiri di muhara lawang, Rasidi marasa pacangan dimamai.
“Bamandak! Kau kada kubariakan manjajak rumahku. Binimu ngini kada kawa dimantuki lagi. Hudah talu kali kau mamunakahakan.” Mandam Rasidi. Umai, dimapa ngini.
“Ulun Bah ai handak tatamu wan umanya Dina.”
“Kada kawa. Kada mandangarkah? Bulik kau. Kada rigi rumahku dijajak minantu nang kada tahu dibasa ngini.” Mancarincing Acil Misna umpat bamamai. Makinannya Rasidi hinip kada sing bunyian.
Marpuah mandangarakan umanya wan abahnya mamamai lakinya. Maraam situ, nyaman tahu rasa dimamai kuitannya. Sawat Marpuah maniring lakinya bulik batunduk kapala maitihi tanah, lamah limbai. Buhara tajungkang.
Saminggu basampuk minggu, lacit ka bulan magun haja Marpuah badiam di rumah kuitannya. Asa mauk haja pang hudah, napang imbahanu tapalampang jua wan nang kuitan. Mahir di rumah saurang sakakahandak, ngini kada kawa, musti saraba bapadah wan kuitan. Anak nang dua ikung ngini jua satagih-tagih handak batamuan abahnya. Suah Marpuah tulak ka batang banyu batatapas, babaya inya naik, mancigir Rasidi mahadangi di tabing. Mandibar dada Marpuah, galudupan. Rasidi pina marigat, rambut kacungaran kada digunting, bajabis ha pulang, umai asa kada pinandu Marpuah.
“Ding, hadangi hulu. Kaka handak bapandir.” Marpuah badiam mahadangi, asa sasain gugup, napang lawas bangat pina kada suah tadapat bakas lakinya ngini, pas tadapat mahiyau ading pulang, asa kaingatan imbah kawin bahari.
“Ding, kita babulikan haja, maras anak kita Ding ai.”
“Kada kawa jar Abah, pamali.” Marpuah manyahut.
“Mun kaka mandatangi abah pang kayapa, bapadah. Kita bubujur sakali ni Ding ai, kada sarana bakalahian. Kaka jua pang nang tasalah.” Rasidi maitihi bakas bininya. Liwar sayang inya wan Marpuah, tagal nangapakah muntung asa hambus haja bapandir.
“Kayapa Ding?”
“Tasarah haja Ka ai.” Marpuah asa kaganangan haja pang wan bakas lakinya.
“Kaina malam, kaka ka rumah mudahan abah ampih dah sarik.” Marpuah baunggut, imbah ngitu hancap maangkat tapasan, supan kaluku kalihatan urang bapandiran di tabing batang banyu wan bakas lakinya.
Ari bakujuk ampah ka sanja, Marpuah mangancingi lalungkang. Dadanya magun haja galudupan. Busiah ai bujuran bakas lakinya bailang ka rumah.
Magrib, Marpuah hancap sumbahyang. Imbah sumbayang, Marpuah ka padu handak basasadi sagan makanan. Maampar tikar purun, nasi, iwak saluang basanga, pupuyu baubar, cacapan ramania, taruk gumbili bajarang, tarung babanam, wan iwak jilawat bapais bahandar. Kada lawas, barantuk makanan, kadada nang tadangar basuara, asing-asingnya manyuap nasi, napang mun lauk liwar nyamannya.
Imbah makanan, kada saapa kadangaran urang latuk-latuk mangatuk lawang.
“Bukai Cu, siapang bailang.” Dina manjuuk ka luar mambukai lawang.
“Abaah!” jar Dina bakuriak, salajur baragap wan abahnya.
“Kai ada ai luku.”
‘Ada ai Bah ai.” Dina lakas manarik tangan abahnya. Abah wan Umanya Marpuah kada basuara mandangar bakas lakinya Marpuah nang bailang.
“Nangapang habar Rasidi? Amun handak lakas bawa haja lagi ka tangah, nyaman bakurinah bapupunahan.”
“Ulun ngini Bah ai bailang ka sia handak batamuan Dina wan Riski, dandaman Bah ai.” Ranai abah Marpuah.
“Wan jua Bah ai, ulun ni handak bamantukan wan Marpuah, maras wan anak Bah ai.”
“Kau ngini Rasidi ai, talu kali ngini nah mamunahakan Marpuah, purun haja lagiyah mambuliki. Pamali manjilat liur saurang nang hudah taludahakan.” Rasidi managuk liur, asa sangkang di rakungan. Pandiran Abah Marpuah liwar manyalingit.
“Dimapa am Bah.”
“Kada kawa Rasidi ai. Hudah talu kali ngitu kada kawa bamantukan nang kaya masi. Ihlasakan haja hudah. Mun kau bajudu pulang wan Marpuah, kaina ai mahadang Marpuah balaki ka lain hulu, basarakan, hanyar kawa pulang kawin wan kau. Mun wayahini kada kawa Rasidi ai.” Hinip Rasidi kada baburinik, kalacaran banyu mata. Dasar bujur jar urang bahari kadada pang nang manyasal tu badahulu, musti badudi. Maitihi Rasidi wan anak bininya, liwar marista diri. Marpuah manyapu banyu mata jua nang kikiliran kada katahanan.
“Umai Bah, asa kada kawa manyandang ulun. Napang ulun maka kadamia, sakit pada kayap Bah ai amun tapisah wan Marpuah.” Manangis Rasidi kada katahanan.
“Kau ngini Rasidi ai, katuju gagarusuh. Matiam pandir sarak ngitu kada kawa digayaakan. Ngini napa-napa sarak, napa-napa mamunahakan wan bini. Amun magunai handak, hudah baanak babuah ngini, kada sarana asa hambus pandir sarak. Tagal dimapang jua, mun hudah kayaini. Kada kawa dibuliki lagi. Amun bubur haja kawa di makan-makan, ngini hangit dah Rasidi ai. Manangis banyu mata darah kau tatapai kada kawa babulik wan Marpuah.” Abah Marpuah bahinak ganal.
Malam sasain landung. Rasidi magun haja bapandiran wan abah Marpuah. Marpuah wan anak-anaknya hudah lawas ka kulambu. Guringan. Tagal kisahnya haja pang Marpuah tu guring jua, mata kaya kasisiur, kilip-kilip mahitungi titiwa.
“Bah, ulun handak bangat babulikan wan Marpuah.”
“Dimapang handak mamaksa. Pamali, haram. Batakun kau ka tuan guru. Magankah urang nang hudah talaq talu kali ngitu bamantukan pulang.”
“Hiih Bah ai, suah ai ulun batakun, pamali jar.”
“Han, napang tia? Mun hudah tuan guru ngitu mamadahi. Napang kau mamaksa?”
“Bah, kawinakan Marpuah Bah, wan siapakah, imbah ngitu suruh sarak.” Rasidi bawani bapandir.
“Urang kawin ngitu kada kaya manukar baju, imbah kada sadang kawa dibulikakan.”
“Bah, tulungi ulun. Ada ai kawan nang kawa disuruh ngawini Marpuah.”
“Umai, kababangatan pintar kau ngini Rasidi ai.”
“Imbah pang, maras Bah ai cucu andika. Kaina inya kada baabah.”
“Amun kau ngini maras wan anak kada damintu bakalakuan.” Rasidi mamaraki mintuhanya, baujur, bapadah, mudahan abah mintuhanya hakun manikahakan Marpuah.
“Tangah malam dah ari, bulik hudah Rasidi ai kau. Kaina aku mamandiri Marpuah.” Lamah jua kalalawasannya abah Marpuah. Asa mambari maras maitihi Rasidi nang kada bakarantian manyapui banyu mata. Bujuran manyasal saku kakanak ngini dalam hati sidin.
Rasidi takurihing. Asa lapang pahinakan imbah abah mintuhanya bapadah hakun mamandiri Marpuah. Mudahan haja pang bakas bininya ngitu hakun dikawinakan. Rasidi bulik matan rumah Marpuah, mangincang tuju ka rumahnya.
Talu bulan atawa talu kali haid, pas ai urang bapara ka rumah abah wan umanya Marpuah. Ngarannya Abdurahman, tagal rancak dihiau Aman. Sapakawanan haja wan Marpuah wayah sakulah di Madrasah bahari, bakawan jua wan Rasidi. Aman ngini balu, mati bini tagal kada baanak. Aman bapara singhaja manulusakan kahandah Radisi, nang manangis bailang ka rumahnya minta inya mangawini Marpuah.
Ganap sapuluh hari imbah urang bapara, abah wan umanya Marpuah mangumpulakan urang kampung sagan baparundingan kawin Marpuah wan Aman. Nangaran Marpuah ngini anak saikungannya, biar balu talu kali tatap ai kuitannya handak basalamatan, maraha kawin malam, tagal tatap haja jua baramian.
Siang, pas urang raramiannya basisiap, Rasidi mancungul di padu manukui Marpuah nang rahat bakasai., “Ding, ingatakanlah, kau ngini kawin sagan sarat kita haja nyaman kawa bamantukan.” Rasidi maujari Marpuah. Marpuah kada manyahut. Inya baunggut haja.
Malam ngitu, sahlah Marpuah bini Abdurahman. Galudupan, asa mandibar kada manantu, Marpuah masuk kamar mairingi nang laki. Malam imbah nikah, sabujurannya Marpuah handak guring di kamar wan anaknya, tagal ngitu kukulaan baluman bulikan. Urang araian inya kawin wan Aman ngini. Tapaksa Marpuah mairingi nang laki ka kamar. kaina kulawaraga batanguhan nang kada-kada. “Ding, ka sia nah, duduk di higa kaka.” Aman manarik tangan Marpuah. Manggitir Marpuah, dingin ganyam tangan alahan pada gadang buruk, gugup kada sakira, “Ding, kita ni dua laki bini. Kawin kita ngini kada iincaan, ngini bujuran Ding ai.” Aman sabujurannya asa takajut malihat bininya nang liwar langkar, asa kada manangguh amun Marpuah pas babuka tutukup kapala, saling bungasan. Awak putih kuning, rambut baumbak hampai ka pinggang, gulu bagilit, batahi lalat kumbang banaung. Umai bautung bangat Rasidi babini Marpuah ngini.
“Inggih Ka ai.” Babaya kadangaran Marpuah manyahut, napang amun handak basuara asa tapaga di rakungan.
Saminggu imbah kawin, kada lawas sabulan, dua bulan, ganap talu bulan. Kadada tadangar Marpuah wan Aman takalahi. Imbahanu pas kamarian ari kalihatan Aman manunggang sapida mutur mambawa Dina wan Riski bajalanan. Mun takana pasar malam baampat baranak basasakan di sapida mutur tulakan ka pasar sahibar manukar apam dangkak atawa cincin talipuk.
Rasidi makaam, amun pas taitihi Marpuah tulakan wan Aman, asa mambukut di dada, asa dikuracak bidawang, liwar sakitnya. Ajinai Aman kada ingat wan janji, Marpuah hudah jua bapaling hati.
Malam ngitu, bulan salau-salau, Rasidi kada katahanan hati. Inya mangincang mandatangi rumah mintuhanya. Handak batamuan wan Marpuah wan Aman. Kadada mangatuk ka lawang, Rasidi salajur manggandah. Takajutan nang di rumah, Aman mambukai lawang. Rasidi mancigir badiri di muhara lawang. Kada sawat baaling, malapau Rasidi manampar Aman. Takuriak Aman, inya takajut ditampiling Rasidi.
Mandangar urang pina baributan di muhara lawang, hancap abah Marpuah manunti. Sakalinya Aman wan Rasidi bakalahi, bapuntal, batindak, bakuntau.
“Kau ngini Man ai bahianat wan janji. Jar hakun imbah kawin mamunahakan wan Marpuah, ngini hudah balanggar talu bulan, tatap haja.” Rasidi bamamai. Aman kada manyahut, inya mamusut bibirnya nang badarah bakas kana kuntauan Rasidi.
“Rasidi, bulik kau matan rumahku, bila kau kada bulik kuhiyauwakan pambakal, nyaman kau ditangkap.” Abah Marpuah manarik gulu baju Rasidi nang tabingsai.
‘Abah, andika jua kada babujuran bajanji. Jar Andika hakun mangawinakan Marpuah sagan sarat inya bamantukan wan ulun. Ngini nangapa jua, kada habar buriniknya lagi.”
“Aku Rasidi ai kada kawa manyuruh Aman mamunahakan anakku. Aman wan anakku, kada suah tapahual. Baikan wan anak-anakmu, baikan wan mintuha. Ikam bacaramin hulu bubujur, disusuri sisi tapih saurang.”
“Marpuah, kaluar kau Marpuah!” Rasidi bahalulung mahiyau Marpuah.
“Ma, kayapa Ma, kaluarkah ulun?” Marpuah batakun wan umanya.
“Kada sarana Marpuah ai, maraha Rasidi hahalulung nang kaya urang gila. Tamaha bakalakuan nang kada sampuraka. Kada rigi aku lagi baminantu nang kaya diinya.” Marpuah tadiam.
“Napang, kau handak hajakah magun wan bakas lakimu ngitu?” Umanya Marpuah batakun, pas malihati anaknya pina mandam.
“Kada Ma ai.”
“Han mun kada lagi tu, maraha inya bakuriak di luar. Adaha lakimu wan abahmu. Tu urang higa-mahiga gin pina tumbur jua hudah.”
“Marpuah, kau hudah bajanji kawin satumat haja wan Aman! Manang janjimu Marpuah?” Rasidi bakuriak pulang.
Kapipijaannya kaluar jua Marpuah. Malihat lakinya badarah dikuntau bakas lakinya lakas Marpuah maragap Aman.
“Purunnya manyakiti Aman. Aku kada rila!” Marpuah bakuriak jua.
“Buhanmu nang purun, badusta badudua. Jar imbah kawinan salajur basarakan!” Rasidi mambalas bakuriak.
“Dimapang handak bamantukan amun kalakuan saurang tatap haja kada sampuraka. Aman baikan wan ulun wan anak-anak ulun. Amun rajin, kakanakan haja takutan wan saurang, inya aci disariki haja, ngini inya katuju wan Aman jadi abahnya.” Marpuah umpat babamai.
Urang higa-mahiga hudah tumbur kaluaran mandangar Rasidi wan Marpuah kuriak-kuriak. Sapalih urang takurihing maitihi Rasidi, sapalih ada jua nang maras kasihan. Talu ikung lalakian mahalat salajur marimpung Rasidi nang manggasing handak marungkau Aman wan mintuhanya.
Kada lawas, pambakal datang, “napang kisahnya ngini, batangah malaman ari bakalahian. Mambari supan.” Pambakal maitihi Rasidi.
“Pambakal, Marpuah wan Aman badusta wan ulun. Jar kawin satumat haja, nyaman ulun bamantukan wan Marpuah. Ngini kada Pambakalai, buhanmnya ngini salajur sakalinya. Bajanji tagal badusta.” Rasidi maingui manangis. Pambakal nang maniring Rasidi manangis asa kada asap. Nang asalnya handak sarik, kada jadi sarik. Mambari marma kalakuan Rasidi.
“Rasidi, basabar kau. Pamali batumbaran marga bakas bini haja. Judu ngitu Rasidi ai kada kita nang ampun aturan. Ada Allah Ta’ala. Kau babanyak basabar. Mun kau magun bajudu wan Marpuah, kaina ada haja tu jalannya. Dimapakah takawin haja tu pulang.” Pambakal mamadahi Rasidi yang tajalupuk taduduk di tanah. Basingguguk manangis.
Aman mamaraki Rasidi, manarik tangannya manyuruh badiri. Rasidi badiri, salajur baragap wan Aman, manangis pulang, nang kaya bibinian, basisigan.
Tangah malam ari. Bulikan urang, Rasidi dibawa pambakal ka rumah sidin. Pambakal ngini paranah mamarina. Sidin basapupu sakali wan uma Rasidi nang hudah mati.
Marpuah maubati lakinya nang bakas kana kuntauan Rasidi. Asa kadada manangguh amun bakas lakinya pacangan bahamuk nang kaya urang kasasahangan. Liwar supannya Marpuah dua laki bini, asa kada bamuha urang tahuan mun asalnya buhanya kawinan ngini marga handak bamantukan haja wan Rasidi.
“Ding, bubujur bapadah nah wan kaka, kau magun hajakah handak wan Rasidi. Amun magun haja handak Ding ai, kaka rila haja malapas kau malam ngini jua. Nyaman buhanmu bamantukan.” Aman bapandir sambil mahuringis kasakitan pas bakas luka dibarasihi nang bini.
“Kada Ka ai. Hudah jua ulun bubulatakan, lulunjungakan, tagal asa kada sanggup jua amun babulikan wan abahnya Dina. Talu kali sidin Ka ai mamunakahakan ulun. Mayu haja pinanya hudah ulun wan sidin.” Marpuah manyahut.
“Kaka ni Ding ai kaluku ai kau kada nyaman nangaran hudah tajanji wan Rasidi.”
“Ulun Ka ai, amun pian handak mamunahakan malam ngini, tasarah pian haja, tagal ulun kada pacangan jua bamantukan wan Rasidi. Ulun talanjur sakit hati. Amun dasar judu wan pian ni habis, maraha ulun balu, bakurinah manggaduh anak haja.” Marpuah manyahut pulang. Ranai Aman mandangar pandiran nang bini. Pina nahap bangat pang Marpuah ngini kada hakun lagi wan Rasidi, asa bungah dada Aman.
Sasain bakisut malam nuju ka subuh. Kampung Marpuah hinip, kadada tadangar suara manusia. Burung bilatuk haja nang babunyi latuk-latuk maulahakan rumah sagan bulan nang salau-salau hidup ampat walas.***

Amuntai, 9 Februari 2017