Cerpen Hamberan Syahbana: Rindu di Banua Jaring Bakambang

06.01 Zian 0 Comments

Kambang-kambang di Kampung Jaring, Kecamatan Banua Jaring Bakambang nang dahulunya kambang mangambang sigar mahabang manguning mambigi ramania wayah ini layuan bahabis hilang sumangat. Langit muru kundum mangadap sa-alaman. Kilat sambar-manyambar manyasahi guntur nang galuguran mangguncang langit. Ini gara-gara urang kampung basakit hati lantaran si Rindu Diang Wardah alias Ririn galuh langkar nang pambungasnya pamintarnya di SMA Banua Jaring Bakambang habarnya lamas tinggalam dalam lautan asmara. Sandaga kanapa jua si Ririn kahahakunan malalawani urang nang pantas jadi abahnya. Lawan kanapa jua Kai Ibas Jagau nang dimalu-i urang sa banuaan kada kawa baungal sahama-hama. Dingin kaya siput bapais malihatakan cucu saurang tagulagai.

Sakula barjamu ya’i, wayah dipawayah tata dipatata harap-harap parcaya jangan. Kanapa? Sabapi jar habar sasainsahari sasain babangat, sasain sahari sasain kada katulungan lagi. Kanapa? Marganya Guru kapala nitu iya kandang iya babi, pagar makan tanaman.  Habarnya tu liwar kada katulungan lagi. Sudah kada rahasia lagi saban hari baduduaan bajam-jam di dalam kamar guru kapala. Saban minggu kada kaliwatan tulakan ka pasar batutukar saraba macam. Wayah-wayah piknikan ka Tangkisung, Batakan atawa ka Pagat atawa kamana kah? Kada tahu disupan, biar satangguk mata nang maitihi kadanya hiran. Pambulikannya kada tatinggal tutukaran baju hanyar, sapatu hanyar saraba hanyar. Utas amas, galang amas, kalung barlian, giwang barlian. Kada kawa dikisahakan lagi kaciratan si Ririn sa-awakan. Kada katinggalan HP nang paling hanyar kaluarannya. Sampai kandaraan bibik kaluaran nang pahanyarnya jua gasan si Ririn. Kada katinggalan sabuting dua buting tutukaran gasan manyukai Kai Ibas Jagau. Kalupang sidin sarik malihat cucu saurang tagulagai? Janang hidin sarik lihan himung Sidin. Padahal ibarat hambawang Ririn ini pas nang rahatan mantingur-malingit. Kada kawa disambat-sambat lagi kada ada lagi mangit-mangitnya.
Hari ini kaya masi jua ai si Sidin ngitu tulak ka gawian sarawa-rawa ka urang sambil lihum bapair. Umai lahlihumnya ai paribasanya bapair tumatan Banua Hanyar sampai ka Muhara Kuin. Ngalih banar bubuhannya mambalas mangurihingi, ayu ai takurihing jua lawan kurihingsimpak.

Manukar  bilungka  ka Banua hanyar
Manukar gumbili ka Palampitan
Sapintas lalu urangnya pina baik banar.
Sakalinya parangainya buruk saling jahatan

Bayam sakacak dibagi-bagi
Limbah dibagi di-ikat pulang
Kisah Sidin tu sudah kada rahasia lagi
Sudah manjadi kamuaran urang sakampungan.

Apalagi nang bangaran si Darman. sapupu Ririn nang kasasahangan lawan si Ririn, sakit hatinya rasa dikarukut bidawangampat puluh. Padih kaya disayat sambilu diuyahi bacampur cuka. Baisukan naya kaya nang masi-masi jua Ririn mangaluarakan bibiknya handak tulak sakulah,sakalinya si Darman sudah mahadang bakurihingan di atas bibik. Kai Ibas Jagau matan jandila rumah ba-angkat tu pina mandam kapiu malihatakan kalakuan cucunyanang badua basapupu nitu.
“Ding Ririn, hadangi dahulu, ada nang handak aku pandirakan lawan ikam. Panting banar ni nah.“
“U kaya itu kah? Lakasi nah Kaina  ulun talambat.“
“Rin, ikam pina baubah banar wayah naya lah, kanapa?“
“Ah, napanya garang nang baubah?  Ulun asa kaya nang masi-masi jua ai!“
“Lain tu pang pada nang masi. Mudahan ai ikam kada limir badahulu.“
“Ka Darman jangan kaya itu pian! Banganga badahulu hanyar pian baucap. Apa garang maksud pian nang sabujurnya?“.
“Kada ai, banyak banar ubahnya ikam salawas  .....”
“Salawas napang ?” Ririn sasain manyalingit
“Ah ikam ni daun kalakai bapadah paku. Asam balahan matan pandahan. Ikam ini bapiragah kada mangaku, padahal urang gin sudahtahuan sabarataan.”
“Sudah tahuan napang? “ Si Ririn sasain manyalingit.
“Ah asam janar marasa laus. Kada usah gin disambat. Pukuknya ikam sudah kada ingat lagi lawan diaku. Pada hal kitaini sudah saling cucukan.”
“Kita?“
“Ya pas banar! Kanapa ikam kadahiran-hiran lagi? Kada sayang lagi kalu? Marasa haja kalu?
“Ujar siapa? Ah pian ni! Ulun masihai sayang lawan pian. Tumatan dahulu, sampai ka wayahini, sampai kaina ba-anakbacucu ulun tatap ai sayang lawan pian. Apalagi Pian ini kaka ulun saurang. Paribasanya biar kaka sapupu, ulun kada marasa basapupu tapi ulun marasabadangsanak. Amun sual judu biar ai kita sarahakan haja lawan Nang Ampunnya.”
“Han kaya itu sakalinya jawabannya.Sayang, sayang. Padahal ikam tu tarus-tarusan lamas lawan satua ngitu! Amunaku? Jangankan maragap, manjapai sadikit haja gin ikam sudah manyimbah! Kaya apa itu? Cubalah!”
“Ai, ai. jangan kaya itu, Ka Darman. Supan kalihatan urang! Badusa, tahulah? Awas pian!“ Ririn manyatatar  bibiknya.
“Hadangi dahulu, Rin. Satumat haja.Rin. Ikam itu sudah tapalit minyak si nyungnyung, kana guna-guna. Tapi lah,ibaratnya tu lah, ikam tu hampalan nang sudah kada mangit lagi tatap ai aku sayang lawan ikam. Han kaya apa lagi? Aku ikhlas manarima ikam kaya dahulu.”
“Cah, rayuan pulau kalapa nih. Pian kabanyakan mambaca buku jadul nih. Rayuan pian kada payu ka Darman ai! Ajin ai pian manimburu nih?”
“Kaya apa aku kada manimburu? Sakampungan urang sudah tahu bahwa ikam ini ampunku! Apa garang kurangnya aku ni? Jahat banarkah palihat ikam?Maka ikam kahahakunan  lawan satua bangsat nangitu?”
“Bujur jua”, ujar Rindu di dalam hati sambil maniring si Darman.“ Urangnya dasar bungas salagi pintar samana calon sarjana tihnik wan dikatujui babinian bujang-bujangan sakampungan ha pulang, tapi aku kada manaruh cinta. Aku marasa badangsanak tu pang. Kaya apa yu rasanya bahahandakan lawan dangsanak saurang?,” ujarnya hatinya pulang.
“Mimang ulun akui, sidin wayah-wayah sidin ma-anu-i.“
“Nah, iya kalu? Bujur kalu apa ujarku,kada salah kalu? Bangsat! Kubunuh ikam bangsat ai!“
“Sabar, ka Darman, jangan balaluan sarik.Pian tahu lah, kaya apa kajadiannya waktu sidin ma-anu-i ulun?”
“Apalagi lain pada baituan? Sandaga ikam ini jua pina ganyir banar!“
“Kada kaya itu pang nang sabujurnya! Handak lah pian tahu?”
“Kada parlu! Aku sudah tahu! Ikam ini sudah kaliwaran. Kupadahakan ikam lawan Kai bahwa ikam......” Habang hirang muha si Darman kasasarikan.
Manggurak jua pang hati si Ririn, muar lawan si Darman. Badadas inya tulak ka sakulahan bakulibian bacampur muyung bibirnya. Lain lagi si Darman bagagas inya manaiki tangga rumah Banjar bubungan tinggi nang matan tadi Kainya maitihi banar matan jandila. Langsung inya mendatangi kainya, pas kaya tantara mahadap kumandan.
“Kai! Tahulah pian kalakuan cucu pian si Ririn ngitu? Nang sudah kana minyak kukang Guru kapala nitu. Mambari supan! Urang itu sudah ma-anggap inting lawan kaluarga kita. Ini bujur-bujur saling liwaran. Apa ujar urang wayah ini palicihan kah? Kawawanian inya malicihakan  martabat kaluarga kita! Najis!“
Kainya mandam kada saling bunyian maitihi cucunya nang pina ka-agasan. Makinannya ai si  Darman sasain maharungut.
“Kai jangan badiam haja! Tahu lah pian apa ujar bubuhannya? Kai Ibas Jagau nang kaya macan umpung kada sing gigian lagi.Saban kalian batamuan lawan urang ngitu pasti Kai baliung, basimpang jalan. Biasa sakali kajadian bakakajutan kada katahuan Kai sudah bahahadapan ba-antaradua mitir haja lawan urang itu, kaya apa kajadiannya? Pina landap banar mata bacacangangan kada sing kijipan. Pada hal wayah itu banyak banar orang nangmalihat. Bubuhannya manyangka pasti tu pang ada prang tanding barantayuda saking balabar kawat. Harau sakalinya timbul Kai batundukan supan mundur basimpang ka lain Sebujurnya ulun supan banar Kai ai. Kamana ma-andak muha? Kai sudah kada baharaga lagi.”
“Cakah banar ikam lah! Kawawanian ikam ma-ujari aku. Tahu apa ikam sual martabat harga diri?“ Kai Ibas Jagau mulai mambarangas manggarangsang.
“Dasar! Kai kada baharaga jua ai! Kada ada lagi urang takutan lawan Kai. Bubuhannya itu maharapakan cucu pian ini nang mamimpin manapas kasupanan kampung kita. Kalu parlu handak kami bantai satua nitu!“
“Hus! Badiam ikan! Jangan manjawab! Sabujurnya ikam itu manimburu ma-anggap guru kapala nitu sudah ma-ambil urang nang ikam kahandaki. Iya kalu? Darman-darman. Dangarakan nah lah! Sakali haja ikam manggawi nang kada-kada lawan guru kapala itu, ikam cagaran manyasalsaumuran! Parasa ikam, ikam tu  pahlawan ah? Kada! Ikam itu sabujurnya paruvukator nang marugiakan urang banyak. Jangan kadaingat lah nagara kita nagara hukum.”
“Mimang kaya itu gawian urang nang sudah kada baiman  Badudua sudah kada ingat lagi bahwa itu dusa ganal. Jaka manurut hukum syariat pasti tu pang badudua dirajam sampai mati.”
“Hus, bajauh jin! Kada rigi aku malihat muha ikam tu.“ Kai Ibas Jagau sudah kada sabaran lagi mata mancilinghandak tapacul kasasarikan.
“Ah, mau lah Kai kaya itu? Manyariki cucu saurang jua, urang tu si bangsat ngitu nang disariki. Ini tabalik! Dasar dunia parak kiamat kalu?“
Darman badadas  bajauh maninggalkan kainya. Kada balanggarmanit mamparapas bunyi kanalput bibiknya. Kai Ibas Jagau manciling maniring cucunya mamparapas saling lajuan hilang di bilukan jalan. Kada sa-apa Kai Jagau takijat mandangar kuciak saling nyaringan manyalingit matan di dalam. Badadas sidin manuju ka dalam. Kaya nang masi-masi jua itu pasti tangisan mamanya si Rindu nang kurang ingatan. Babinian nitu bangaran Nirmala Hayati umanya si Rindu nang dikurung Kai Ibas supaya jangan mangganggu orang lain lawan jangan sampai galuyuran di jalanan manyupanakan kaluarga.
Kai Ibas Jagau marista malihat naknya maragap guguling saling pisitan, mata mancirat kaya papaci pacahan cangkir. “Ka, Ka Iyun, u Ka Iyun. Lihati Ka ai. Ini anak kita, matanya mata pian. Hidungnya mancung kaya hidung pian pian, tapi muhanya pun ulun. Langkar banar kalu?”
Rambut maumbak laut saling kusutan manukupi sisa-sisa kabungasannya. Hidung mancung, kulit mangulit langsat. Kaya kambaran Rindu sama pada bungas. Kada karasaan banyu mata  Kai Ibas manggalunyur lilihan di pipi.
“Ui, jangan, jangan! Jangan diambil anakku! Ka Iyun lakasi bulik, bubuhannya handak ma-ambil anak kita,“ ujarnya sambil ma-andak gaguling ka dalam ayunan.
Rasa padih hati Kai Ibas. Dada sidin asa manyasak. Kada karasa-an banyu mata lilihan ka pipi, kaya banyu ba’ah nang salinglandasan kada katabatan lagi.

***

Pas wayah kamariannya Kacamatan Banua Jaring Bakambang sasain manggurak. Kancahungan halulungan takumpul bubuhan muha nang karau-karau sangar mamakan ka taradak. Langit kundum mangadap manyalingar. Bakilat baguntur mambalah mamacah langit. Bubuhannya pas harimau lapar mangaum-ngaum mancari mangsa. Parang bungkul, parang lais,mandau, pisau, karis, badik, tumbak, sarapang, acung-acung lawan saraba macam gagaman. Tandanya kamuaran sudah kada katahanan lagi marasuk ka dalam raragabadan. Kapala ahuinya panjang basar muha karau sisingut mamanting suaranya manggaruhung.
Bubuhannya itu kada tarima balalu ma-ambilakan hati lawan Kai Ibas.Jagau. Bubuhannya itu gair kalu-kalu gadis-gadisan kaluarganya taumpat tagulung kaya si Ririn. Bubuhannya pina malupa mancarancang kancahungan halulungan kaya anjing rahatan bagarit. Ancap bubuhannya batarus manuju rumah mangsanya, langsung masuk. Sakalinya urangnya sudah lari.Tadatangi rumah puang. Babungkal-bungkal dada kasasangkalan. Jaka batamuan barangkali cancang saribu, pasti sudah urang itu kada batagas manusia lagi.Liwar sangkalnya marga kada batamuan lawan nang dicari. Balalu asing-asingnya bulikan ka rumah masing-masing.  Imbah Isya kaina disambung lagi jar.

***

Ba’da magrib, mamparapas Darman manggas bibiknya saling kancangan ampah ka hulu. Kada balanggar manit inya sudah sampai di halaman Kai Ibas. Langsung naik ka rumah. Sunyi kadada-an urangnya kacawali umanya Rindu nang dikurung di kamar. Badadas inya ka luar mamparapas pulang. Tarus inya mancari-i Rindu.
“Dimana ikam Ririn? Ajin ai sudah dibawa tajun satua ngitu? Kakaya apakah, aku cari-i sampai tatamu. Aku wajib manyalamatakan jangan sampai inya digumpal si satua nitu,” ujarnya babisik didalam hati.
Dicari-inya tarus, tarus mamparapas saling nyahingan. Kada sa-apa Darman batamuan lawan jurut-jurutan urang nang kamarian tadi, masing-masing lawan gagaman. Bubuhannya pina karau-karau sariklawan muar-muarnya. Darman maitihi babanar kaya mata kucing mancari-i si Rindu kalu pina ada di sana, sakalinya kada ada. Kai Ibas kadada jua. Wah, gawatbanar! Bisa-bisa sudah tajunan lawan si tuha kaladi ngitu. Darman sasain galugupan dadanya mambayangakan kalu-kalu sudah bakajadian nang kada-kada.Batarus inya mancarii Ririn ka ujung-ujung kampung. Kada sa-apa malidup dadanya malihat ada nang mancicing saling lajuan di jauh sana. Ancap inya manggasmanyasah urang ngitu, sakalinya hilang di pulau gatah. Tarus disasahinya du’ur-du’ur mahaluki ka sana ka mari, kada batamuan jua. Umailah mahalimunan kalu.Dimasukinya pulau gatah cirat-cirat lampu bibiknya. Inya kada malihat lagi. Dicari-inya buncu-mambuncu sampai ba jam-jam, kada batamuan jua.
Nang bukah mancicing nitu sakalinya guru kapala katakutanan dihaluki urang sakampungan. Jaru’up-jaru’up bukah ka pulau gatah tambus ka pulau nyiur basimpang ka kabun kupi. Kaluar kabun kupi manuju ka pulau paring, manyubarangi pulau pisang. Tahuhumpating tahuhumbalang-tahuhumbaling pahabisannya manggarabau tacabur ka sumur karing.Takajut saling liwaran si Sidin katakutanan, untung kada siup. Bahinak basar sidin sambil manalinga suara nang kancahungan tadi, pina kada tadangar lagi.
“Alhamdulillah, salamaaaaat, salamaaaaat,” kasukaan banar hatinya. Kikih-kikih sa-awakan mancari HP maksudnya handak manalipun polisi, atawa kakawanannya kah? Sakalinya tatingal di rumah. Apa bulih buat sajajadinya ai. Bagamat inya bakayukut-bagayuhut naik. Pas babaya sampai di atas kada sawat badiri tangannya tahahar batis nang basandal kulit.Babaya diitihinya babanar, sakali pulang inya takijat. Dadanya turun naik galugupan, rasa kada bajajak ditanah lagi, rasa tarabang sumangat. Sakalinyakada lain kada bukan nang badiri dihadapannya ngitu adalah Kai Ibas Jagau. Guru kapala nitu takijat kada sakira. Kada mangira sahama-hama cagar batamuan lawanurang nang tatarusan baliung basimpang jalan amun batamuan. Urang nang kada mambariakan inya batamuan lawan bininya. Sakalinya urangnya ada dihadapan. Takibar sumangat rasa kawa ba-aling-aling lagi. Kada disangka kada dikira, ngalih ditangguh. Kai Ibas jagau manangkap ka tangan Guru kapala, balalubagamat manarik mangaluarakan matan sumur karing.
Kai Ibas Jagau itu urangnya panjang basar, babaju hirang, balaung hirang, saraba hirang, parang bungkul baikat dipinggang. Kada biasanya sidin bapakaian karajaan nang kaya itu. Sidin mamakai baju datu sidin nang dahulunya adalah tumangung karajaan Banjar. Apabila sidin marasuk baju nangitu ba-arti ka-adaan bujur-bujur gawat. Sabab kabiasaannya apabila turun parang bungkul lawan baju pusaka nang dipakai sidin itu sa pal sagi ampat kada ada saikung-ikung nang sanggup mahadapinya.
Guru kapala ngitu bagamat badiri, apa bulih buat tahalang-tabujur musti dihadapi. Balalu bahahadapan lawan Kai Ibas Jagau. Jaka siang kalihatan banar kaya apa badudua bacacangangan? Lawan kalihatan jua badudua balilihan banyu mata. Sakalinya si Rindu umpat juamancari-i ju’uk-ju’uk sasarusup masuk ka pulau pisang. Pas batitiga batamuan kada jauh pada sumur karing, bungkam kada sing bunyian. Kada sawat lawas balilihatan manggasut batitiga takajutan mandangar kancahungan halulungan lawan kaciratan lampu sintar matan pulau pisang. Kada sa-apa bubuhan nang halulungan tadi manyagi mangulilingi bubuhannya. Makinannya ai pina maradang ka’agasan bubuhannya kancahungan handak mamangsa. Babaya baparak kada disangka kada dikira mancapil Kai Ibas Jagau mahadang, bacabutan parang bungkul. Balalu takajutan barataan. Kada sing bunyian dingin kaya siput bapais sambil mangira-ngira di dalam hati “Siapa garang nang handak ditimpas Kai Ibas?” Padahal di balakang sidin pina ranai si Rindu baduduaan lawan binuhung karing nitu. Pas kandaraan Darman datang batahan. Manggurak kada kasangga-an lagi hati si Darman malihat nang badua ngitu. Bahancap inya maluncat pada kandaraannya mancabut parang handak manimpas.
“Kubunuh ikam bangsat ai!“
Babaya Darman handak manimpas langsung mancapil si Rindu badiri saling wanian badapa-an tangan mahalangi si Darman. “Darman! Amun pian handak mambunuh Sidin, bunuh ha ulun badahulu”
“Umailah pina manantang banar. Aku sudah mangira pasti ikam ada disini. Rindu ikam ini sudah gilakah?  Kai, kaya apa pian ini? Sakalinya Kai awan cucu sudah kana guna-guna! Ayu kita mati-i bangsat ngitu!”
“Awas! Siapa nang wani ma-apa-apai lawan minantuku ini, nih parang bungkulku nang angkat bicara! Salangkah haja maju, kukibang Tuh ai! Ayu Tuh! Maju Tuh!” Ujar Kai Ibas suaranya garang manggaruhung sing garauan. Sasain bingung barata-an. Kanapa jua Kai Ibas ma-akui minantu lawan si bangsat ngitu. Nang paling bingung si Darman. Asa kada mambadai. Kanapa hanyar haja Sidin ma-akui? Sakalinya bakakajutan bubuhannya mandangar pistul malatui. Balalu bubuhannya tapancai asing-asingnya basambunyi ka higa puhun manyalamatan diri. Ada jua nang barabah batiharap kaya tantara di dalam pilim.
Kada sa-apa datangan bubuhan pulisi awan katua RT mambawa babinian tuha nang kada lain adalah umanya si Yunus guru kapala nitu, lawan babarapa urang guru sapakawanan di SMA Banua Jaring Bakambang.
“Maaf lah barataan, si Yunus ini anakku, Kai Ibas nangini waranganku, wan si Rindu ini cucuku. Aku tahu ai inya pindah ka Banua Jaring Bakambang ngini marga mandangar habar bahwa bininya itu ada disini. Tapi rupanya Kai Ibas ini sakalinya pisit banar lawan janji. Dalas bungkas di landau amun mambuka rahasia kada. Jadinya kaya ini pang kasudahannya, parak banar bamatian. Samunyaan ini adalah kasalahanku marga aku kada katuju baminantu Nirmala Hayati. Wahini aku sadar banar. Bahwa aku nang sudah manapal Kai Ibas gasan manjauhakan minantuku nang wayah batianan, itu salah banar! Aku manyasal.”
Imbah bubuhannya mandangar balalu takajutan barataan. Mambadai Kai Ibas Jagau badiaman haja kada ma-apa-apai lawan guru kapala ngitu. Kada biasanya Sidin nang kaya itu. Sakalinya minantu Sidin. Parak banar sudah Banua Jaring Bakambang basimbah darah. Untung kada sawat bamatian.

Sumber:
https://www.facebook.com/notes/hamberan-syahbana/cerpen-hamberan-syahbana-dalam-bahasa-banjar/10152519922957442