Cerpen MS. Arif: Sapu Tangan Hirang wan Sapu Tangan Putih

18.28 Zian 0 Comments

Kisah bamula matan kakanak bangaran Burhan, anak saikunganannya nang ditinggal umanya mahadap nang kuasa rahatan maranakakan inya. Burhan tamasuk anak orang ba'ada, Inya hidup lawan abahnya wan tukang ingu nang di siwa abahnya. Abahnya tamasuk urang sugih nang ujar urang duit balabih. limbah kamatian umanya Burhan, abahnya Burhan jadi urang nang marasa kahilangan jua. Atanapi maut kada kawa ditangguh apalagi ditampik baindah.
Mulai imbah kuitan bini maninggal, kuitan laki Burhan jadi urang nang kada sing ampihan bagawi siang malam bacari duit. Niat panambaiannya jadi kaya itu asalnya supaya kada taganang umanya lagi jar, tapi lawas-kalawasan pampihannya jadi kabiasaan nang kada kawa diampihi abahnya Burhan lagi. Abahnya Burhan kaasikan bagawi hampai kada ingat lagi lawan Burhan nang masih halus nang sabujurnya masih handak baupang baungah lawan kuitan nang masih ada. Burhan nang parigal baik lamah limambut nitu, hari-hari digaduh lawan diganalakan lawan si tukang ingu.

Pagat kisah sambung carita. Burhan nang sudah baumur 6 tahun masuk sakulah SD. Hari-hari Burhan tulak sakulah bajalan batis, padahal kakanakan nang saumuran inya sudah rami basapidaan.
Tukang ingu nang manggaduh Burhan kada purun malihat Burhan. Paarahatan Burhan lagi sakulah si tukang ingu mandatangi abahnya Burhan gasan mangisahakan Burhan nang mambari maras banar.
"Uy abahnya burhan, pian kada kasian kah lawan Burhan? tulak sakulah bajalan batis, padahal kakawanannya sudah basapidaan barataan. kada supan kah pian, baisi duit banyak, tapi anak tulak sakulah bajalan, damhati urang pian kaina pamalar banar lawan anak". ujar tukang ingu mamandiri abahnya Burhan.
Abahnya Burhan nang mandangar kisah tkajut mandangar kisah matan tukang ingu burhan nitu. Muhanya asa ditapas. duit bakabat-kabat kada kawa nukarakan anak sapida rasa bilang kaliliwaran. Pas rahatan malam, Burhan nang sudah handak guring, di kiyau abahnya nang hanyar datang bagawi. marasa kuitan nang mangiyau Burhan langsung mandatangi. Imbah Burhan bahadap lawan abahnya, kada banyak pamandiran Abahnya langsung manakuni handak sapida nang kaya apa,balang apa, wan mirik apa.
Burhan nang ditawari abahnya sapida takurihing haja sambil baucap "Kada usah gin bah ai. Tukarakan un sapu tangan warna hirang lawan warna putih haja gin pian". Ujar Burhan.
Naah... napanya? ujar Abahnya bingung.
"Kada papa ai bah ai, mun pian ada duit tukarakan itu haja gin" ujar Burhan lamah limambut manyahuti abahnya.
Abahnya nang bingung lawan kada handak ngalih pampihannya mahi'ihakan kahandak Burhan. Isuknya jua di palatar sudah baandak sapida hanyar nang paling baik diantara sapida kakawanan Burhan, di kamar Burhan jua ba'andak sapu tangan warna putih lawan warna hirang.

***

Parahatan kalas 4 SD kakanakan mulai musim pulang basapatu ruda. Si tukang ingu lawas sudah maliatakan Burhan nang kada biasa batatagih macam-macam lawan abahnya. saban kamarian duduk di palatar haja, sapidanya ba'andak di higa palatar, kada tapi di pakainya. Asa kada purun pulang tukang ingu ni malihat Burhan nang kijip-kijip matanya malihatakan kakanakan saumuran inya rami bakulilingan basapatu ruda. Lalu ai pulang ba'adu-adu lawan nang abah.
Nang abah mandangar kisah si tukang ingu langsung mamadiri Burhan pulang pas malam imbah datang bagawi parahatan Burhan handak guring pulang.
"Nak, kam handak sapatu ruda nang kaya kakawanan kam itu kah? kanapa kada bepadah lawan abah nak? kada papa haja nak ai. mun handak apa haja bapadah ha, apalagi baya sapatu ruda nitu ha, sapuluh gin pariannya abah tukarakan". Ujar abahnya Burhan nang asa tasupani tarus malihat anaknya balum baisi kaya ampun kakawanannya.
Sambil takurihing Burhan manyahuti abahnya"kada bah ai, sapu tangan un nang hirang lawan nang putih samalam sudah rusak, tukarakan sapu tangan hirang lawan putih tu haja pulang bah ai, kada usah sapatu ruda. haraganya sapu tangan tu tamurah jua kalu bah". ujar burhan.
Nang abah bingung, nangapa maksud anaknya ngini. mulai nang tadahulu minta tukarakan sapu tangan warna hirang wan warna putih ha. Ayungannya abahnya kada batatakun lagi, isuknya ditukarakan pulang Burhan sapatu ruda lawan sapu tangan warna hirang wan putih nang hanyar.

***

Limbah itu tasambung kisah pas Burhan masuk SMP pulang. Kisah sama tabulik pulang. Kakawanannya rami main pidiu gim di rumah masing-masing atawa manyiwa di panyiwaan pidiu gim. Abahnya nang hanyar bulik pulau Jawa, manakuni kamana Burhan wadah si tukang ingu.
"Di rumah subalah malihat urang main pidiu gim" ujar tukang ingu mamadahakan lawan Abahnya Burhan.
Hancap mancicing bajalan karumah subalah mandatangi salajur ma'ambili Burhan. Pas parahatan talihat Burhan duduk manyaurangan tatungak maitihi urang nang lagi main pidiu gim. asa tacaragal hati nang abah malihat anaknya nang mambari maras, duduk ma'itihi urang main haja. Asa supan jua abahnya nang racak tulak-tulak bagawi kamana-mana tapi anaknya tadudi tarus baisi papainan kaya urang.
Isuknya pas Burhan bulik sakulah dilihatnya di kamarnya sudah baandak pidiu gim paling harat langkap lawan tipi nang ganal. di kaca tipi batikap karatas nang batulisan "biar ikam kada supan".
Imbah malamnya parahatan abahnya bulik bagawi, taitihi jua karatas di atas mija dalam kamar abahnya nang batulisan "Bah kanapa kada manukarakan sapu tangan warna hirang lawan warna putih? padahal ulun katuju itu".
Abahnya nang uyuh datang bagawi asa di ulu-ulu wan tambah bingung malihat tulisan nitu. Sambil bapikir, abahnya bapandir dalam hati "napa garang baiknya sapu tangan warna hirang lawan putih nitu lah? jakanya kawa maulah inya haratkah ada jua". ujar abahnya bagarunum saurangan.
Isuk-isuknya abahnya dapat karatas nang batulisan itu-itu tarus matan Burhan. Di dapur ada karatas batulisan bah tukarakan sapu tangan hirang lawan putih. di mija ada jua, di muka tipi rancak, di kamar abahnya hibak, hampai dalam kakus gin ada jua karatas nang batulisan bah tukarakan sapu tangan hirang lawan putih nitu. saban hari tulisan tuh ada wan batambah tarus, hampai puputingannya abahnya manulusakan kahandak Burhan, hanyar ampih Burhan batangsa jua.
Tamat SMP Burhan manyambung sakulah ka SMA. Sakulahannya tajauh pada rumahnya. Saban hari Burhannya tulak bataksi angkutan umum, kakawanannya disakulahan sudah banyak nang basapida mutur wan mutur saurang.
Parahatan hari nitu Abahnya Burhan ada dirumah lagi duduk di palatar. Burhan datang sakulah di antar kawannya basapida mutur. Abahnya nang duduk dipalatar ma'itihi Burhan asa supan banar. gasan anak nang saikung ne haja kada kawa manukarakan mutur lah asa kada mambadai jar abahnya bagarunum. Balum sampai manjajak palatar Burhan langsung di tawari abahnya handak mutur nang kayapa, nyaman langsung wahinin jua tulak manukar jar abahnya. Atanapi Burhan kada hakun ditukarakan mutur, inya handak di tukarakan sapu tangan warna hirang lawan warna putih haja jar.
Abahnya Burhan pa'ampihannya mambujuki Burhan supaya abahnya kada supan lawan urang kalu-kalu di sambati urang pamalar lawan anak jar. paampihannya Burhan di tukarakan sapida mutur lawan sapu tangan warna hirang lawan putih nang hanyar pulang.

***

Hampai tamat sakulah SMA Burhan manyambung kuliah pulang. Abahnya nang himung anaknya lulus masuk kuliah langsung manukarakan mutur, hadiah gasan burhan.
Barapa bulanan muturnya kada dipakai Burhan, saban hari Burhan tulak kuliah, bapacaran, bajalanan lawan baurusan nang lain pakai sapida mutur haja, mutur batakaian haja di higa rumah bakulat kada sing pakaian. Hampai paampihannya ditakuni nang pacar, napa kada mamakai mutur.
Di jawab Burhanai "abah pang kada manukarakan aku sapu tangan warna hirang lawan warna putih". jar burhan mamadahakan lawan pacarnya alasan kanapa inya kada mamakai mutur.
Pas rahatan takumpulan bamakanan dirumah Burhan, nang pacar ada jua datang, imbahtu bapandir lawan abahnya Burhan.
"Paman, kanapa pian jadi kada manukarakan sapu tangan warna hirang lawan putih gasan Burhan?, bila pian kada manukarakan sapu tangan nitu, mutur nang pian tukar gasan Burhan tuh saumuran kada harapan di pakai Burhan" Ujar pacar Burhan manakuni salajur mamadahi abahnya Burhan.
Abahnya bingung handak kayapa, manjawab apa. di kamar Burhan parak hibak hudah lamarinya baisi sapu tangan warna hirang lawan putih haja. Puputingannya bakalah pulang nang abah manukarakan Burhan sapu tangan warna hirang lawan putih.

***

Mutur sudah dipakai Burhan, saban hari Burhan bajalan pakai mutur pulang. sampai inya piknik bajalanan ampah kagunung lawan pacarnya bamutur jua. Ngarannya kakanakan anum, Burhan nang hahanyaran bisa manyupir takajut rahatan pacarnya bakajutan mancium inya di pipi. Ciuman pacarnya lawan takajutnya itu sakalinya mambawa musibah ganal. Burhan lawan pacarnya kacalakaan. Nang pacar mati di sisituan jua, Burhan nang ma'antara sawat di tulungi urang dibawa karumah sakit.
Di rumah sakit, Burhan nang sudah ma'antara di hadapi abahnya nang basisigan tatangis kada purun malihat anaknya nang saikungan itu ma'antara hidup atawa mati.
"Baaah... maapi ulun laah nang kada hati-hati mambawa mutur". Ujar Burhan nang suaranya babayanya kadangaran.
Nang abah basisigan manahani tangis, sambil mambisai wan mamusuti anaknya jua. Kalihatan hudah nang badua itu dasar anak lawan kuitan, nang asal jarang bataguran dirumah, jarang talihat kasih sayang, maka pas parahatan saikung diantara badua ini handak mahadaplah hanyar dilihatakan kasih nang sabujurnya sudah digarisakan tuhan.
"Nak, maapi abah jua. yang kadada waktu maurus ikam, auran tarus lawan gawian. jadi ikam kasunyian, maapi abah jua nak lah. maapi abah naang kada kawa jadi abah nang kaya ikam kahandaki". ujar nang abah barat managuk liur. Matanya kakarujut maningat kanangan anaknya mulai halus sampai ini, maingat Burhan rancak batagih sapu tangan warna hirang lawan warna putih jua.

***

"Kada papa bah ai, ulun mangarti haja, ulun tahu haja jua pian pasti bingung lawan ulun nang batagih sapu tangan warna hirang lawan putih tarus". ujar Burhan mulai tasandat-sandat bapandir tanda parak banar malaikat maut maambili.
Abahnya nang kada tahu matan Burhan halus sampai parak ajalnya ini kanapa Burhan batagih sapu tangan warna hirang lawan putih tarus pa'ampihannya manakuni bujur-bujur lawan Burhan.
"Han, sabujurnya kanapa garang kam jadi minta sapu tangan warna hirang lawan putih tarus. Ada apa lawan sapu tangan nitu?
Burhan nang bamakin sasak pahinakannya jarujutan handak manjawab tatakunan abahnya. Parahatan banganga handak ba'ucap sakalinya lain jawapan tatakunan abahnya nang kaluar matan muntung Burhan, atanapi suara karuh tandak habis pahinakan Burhan. Awaknya lamah, muhanya nang asalnya badarah jadi pucat, awaknya ang panas jadi dingin. Burhan di ambili nang kuasa, pas handak manjawap tatakunan kuitannya nang sing lawasan kadada nang tahu apa jawapan…

Sumber:
https://www.facebook.com/notes/constantin-arif/sapu-tangan-hirang-wan-sapu-tangan-putih/10151108396049747