Cerpen Farid Ma'ruf: Baayun
Isah kada kawa mambayangakan apa nang kaina pacang diucap umanya malihat inya bulik. Kada kawa inya tatarawang kayapa muha abahnya malihat inya di muhara lawang. Mambariakankah anaknya nia manjajak lantai rumah, atawa langsung mambanting ka lawang. Hakunkah masih umanya manyurung tangan gasan dicium, atawa langsung mahimpatakan ka pipinya. Dasar talalu pang nang hudah digawinya lima tahun nang liwat. Dasar habis akalnya wayahitu, dasar kada kawa inya nang kaya urang-urang, nang kaya kahandak uma abahnya.***
Manujuh hari hudah, Diang bagana di rumah sakit. Ujar duktur, si Diang kana DBD. Awak panas, naik turun. Makan lawan minum kada tapi hakun. Sabalumannya hudah ka sana ka mari Isah mambawa baubat anaknya nang masih baluman ganap ampat tahun itu tih; ka bidan, ka mantri, ka puskismas, hampai kaputingannya dibawa ka rumah sakit. Nia hudah samingguan di rumah sakit, kadada jua tagasnya pacang bawigas. Kadada angkuh bawaras.
Damhatinya, lakun kada baampihan musibah nang baparak. Amun disalajurakan, bilang asa kada sanggup lagi inya hidup. Tagal damhatinya pulang, nang ngaran Allah handak mambari cubaan, bapasrah ai hudah.
Baluman sawat satahun, lakinya ditangkap pulisi. Sadang haja hudah Isah manasihati, sakira lakinya ampih bamamabukan wan bakikinum ubat nang kada-kada, tagal kadada sasadikit pandir nang diasinya. Laki Isah nia bagawi di palabuhan. Panambayan bagawi di situ tih pina waras-waras haja. Kalalawasan sakalinya taumpat-umpat jua lawan kalakuan urang. Bulik ka rumah bisa haja kada mambawa napa-napa lain pada mata habang lawan pandir mahayabang. Tuhuk inya mamadahi, matan balamahan, sampai bakuriak, kada jua hakun maasi. Nang ada bamamai kada baampihan sampai kancang urat gulu, uyuh bamamai manampiling, uyuh manampiling bamamai pulang.
Kaputingannya, ditangkap pulisi jua ai. Mau kada mau tapaksa inya nang bacari saurangan sakira padapuran tatap bakukus. Apa haja ada kabisaan, digawinya. Kada bagaduh, asal halal.
Amun maingatakan wayah bapacaran bahari, bilang kadada haja lakinya Isah nia kalihatan pacang bakalakuan nang kada-kada. Urangnya liwar baikan, pandirnya lamahan, babakti lawan kuitan. Itu jua am nang maulah Isah sawat karindangan. Tagal sasain inya mangganang wayah bahari tu tih, sasain ganal jua panyasalannya lawan apa nang hudah digawinya.
***
Apa nang salah amun inya sama-sama handak lawan lalakian kampung Gadung? Amun baik haja parangainya, baik haja agamanya, kanapa maka kada bulih inya mahabisakan umur lawan lalakian itu tih pahibar marga inya urang Gadung?
Kada masuk di akal Isah kanapa kampungnya, Parigi lawan kampung Gadung kada sing ampihan tapahual, maka basubalahan haja. Bapuluh-puluh tahun hudah, dua kampung nia bamusuhan. Kada kahitungan lagi hudah barapa ikung nang mati tabunuh. Bilang saban bulan, ada haja nang parut bungkas, atawa balukuk rabit. Ada nang mati di rumah sakit. Rancak jua nang mati di pahumaan atawa di tangah timbuk landung malam, pas isuknya hanyar katahuan. Ngaran sama pada balading, kada jarang jua nang mati badudua.
Amun ada nang mati, musti tu pang nang kula mambalas, ka alah siapakah, nang nyata ka urang kampung subalah. Urang nang kada tatahu kisah bisa haja takana suduk, pahibar marga inya urang kampung Parigi atawa Gadung. Amun pas lagi panas-panasnya, kadada tu pang nang wani kaluar pada rumah amunnya hudah limpat malam. Kada mangarti Isah, kanapa maka bubuhan dua kampung itu tih tahakun mambalas saurang pada malapur ka pulisi haja.
“Kaitu pang hudah, Isah ai, bujur haja kita kada suah tahual lawan urang Gadung, tagal ngaran kita urang Parigi, hakun atawa kada, kita nia dianggap musuh jua ulih buhannya,” ujar abahnya wayah inya mangisahakan lalakian nang pacang mangawininya.
“Kami nia manangati gasan kita jua Sah ai, gasan ikam jua kaputingannya,” umanya mahimpali. “Maasi ha ikam jar kuitan, kadanya tasalah pang. Banyak haja lagi lalakian lain. Kada ingat kah ikam, barapa ikung hudah nang badatang?”
Tagal nang ngaran hati, handak kayapa lagi? jarujutnya dalam hati. Sadidikit, kadada inya asa manyasal.
Wayahitu jua, hudah kawa inya mambayangakan damintu jua nang pacang diucap kuitan pacarnya. Rahat inya batamuan, dasar bujur apa nang hudah ditangguhnya. Imbah inya badua baakur pandir, bulat hudah kaputusan: tulak, kawin di banua urang, kada lagi babulikan.
Diganggam pacarnya tangan inya. “Kadada jalan lain lagi hudah Ding ai, ngini pang hudah.”
***
Jaka kadada parawat nang mangatuk lawang kamarnya, kada ampih Isah manggaganang kisah bahari. Parawat tu tih baijin mamariksa panas anaknya.
“Kayapa?”
“Panasnya naik pulang Bu ai nah, tiga sambilan kuma ampat,” ujar parawat. “Kaina satumat lagi kita suntikakan pulang ubat gasan manurunakan panasnya. Parmisi dahulu Bu lah…”
Dijanakinya si Diang nang wayahitu rahatan taguring. Maras banar inya. Kada marasa, titik banyu mata. Imbahitu panjanaknya baalih ka luar jandila. Ari hudah mangadap. Didangarinya azan matan masigit di higa rumah sakit. Bahancap inya baudu imbahitu sumbahyang.
Tuntung sumbahyang, kada sabarapa lawas, tadangar urang bamulutan di masigit. Hanyar ingat inya pada bulan nia hudah masuk bulan mulut. Kaya nang hudah-hudah, saban kalian inya mandangar urang babacaan mulut, musti haja ingatannya sasak lawan wayah bamulutan di kampungnya.
Nang kaya manuntun pilim, jalas banar inya mangganang wayah bamulutan di kampung. Dua hari badahulu datangan hudah kula warga nang jauh. Dangsanak-dangsanaknya nang hudah balaki atawa babini, atawa nang madam, musti tu pang bulikan. Hari raya ayuha kada bulik, amun bamulutan bilang wajib tu pang hudah bulik. Matan dua hari tu jua hudah aur Uma, Acil Sitah, lawan bubuhan babinian mambuati baras ka dalam gulungan daun pisang gasan diulah wadai lupis. Imbahitu maanyam daun nyiur gasan katupat. Baluman lagi basisiang iwak haruan lawan hayam. Hudahnya amun bakukuyak bawang lawan bapapirik sambal. Ada nang buhan lakian pas sahari sabaluman harinya batatajak sarubung, imbahitu basubuhan aur mangawah. Buhan kakanakan dipalar jua gasan tukang gantungi kambang, gula batu, lawan duit kartas di tangah rumah. Kada bakatuntungan tu pang gawian. Tagal ngaran tagarumutan, jadi gawian tu tih asa hampul haja barataan.
Pas hudah harinya, ubui, liwar raminya tu pang kampung. Sasak jalanan dapatnya mutur pikap nang mahangkut bubuhan pamulutan matan kampung-kampung subalah. Kayapa kada sasak, nang bamulutan kada sabuah rumah haja, paling kada mandua puluhan, labihnya ha lagi. Tambahnya pulang buhan nang bajualan is kiru, gulali, atawa mainan. Bah, kada kisah tu pang raminya.
Jadi saban datang urang balajuran haja disurungi wadai lupis gasan manapal parut. Imbahnya hanyar mulai bamulutan di rumah masing-masing. Asing-asingnya tu pang lagi banyanyaringan sapikar. Hudahnya pas basyair, mandarau tu pang, rami basasahutan. Mun hudah hampai asrakal, bamakin rami lagi. Barabutan manjuhuti duit, kambang, wan gula batu nang bagantungan. Nang kakanakan baluncatan sakira hampai jua manjuhut. Ada jua nang tukang bagiakan minyak harum atawa daun pudak nang hudah dihiris hahalus. Ujar Tuan Guru di kampung, pas asrakal tu tih pang Nabi Muhammad datang bailang, jadi badirian manyambut hidin wan baharum-harum sakira hidin hakun baparak.
Tuntung pambacaan Maulid Al Habsyi, disurung pulang katupat karau iwak haruan babanam. Kada kasambutan tu pang parut dapatnya. Tuntung bamakanan, lalu bajurut tulakan ka langgar. Di langgar tu tih takumpulan jadinya sabarataan, sakampungan, tamasuk bubuhan pamulutan nang diundang. Tagal kada itu haja nang maulah rami, nang paling maulah rami tu ayunan nang bajurut sing banyakan bahias-hias kambang, di bawahnya baandak gula habang sakira kakanakan nang diayun di atasnya kaina bakalakuan manis, ada jua caramin sakira bungas wan nyaman dilihat, ada baras sakira rajaki bakacukupan salawasan, lawan nyiur sabiji sakira hidup bamanpaat gasan urang banyak. Baras, gula habang, lawan nyiur tu tih kaina imbahnya disadakahakan ka urang nang pina tasakit. Siapa haja nang baranakan tahun nitu musti tu pang batampah umpat manggantung ayunan.
Jadi di langgar tu tih bamulutan pulang sakali lagi, pas asrakal langsung haja dibuat kakanak halus ka dalam ayunan, maambil barakat Nabi Muhammad. Imbah bamulutan, sambung caramah. Tuntung itu barataan, hanyar babulikan pulang ka masing-masing rumah nang manyaru. Nah, di rumah tu bamakanan pulang sakali lagi sabaluman bulikan. Han, kanyang liwar tu pang. Kada bataha lagi. Rami saharian.
Imbah mangganang tu tih, asa tasintak dada Isah. Taingat inya papadah kainya bahari wayah sidin masih hidup, ajin barataan kakanakan urang Rantau baisi hak gasan diayun. Taingat inya, ajin Si Diang, tumatan diranakakan, baluman suah sakali-kali diayun mulut.
***
Busiah garingnya Diang nia marga kada suah diayun mulut, damhati Isah batagur. Tang asa badusa banar inya jadi kuitan. Hak anaknya kada ditunaiakan, hampai garing kada bawawigasan. Maka bilang pas banar ha pulang anaknya ni tih garing pas datang bulan mulut. Bisa itu tih taguran kalu garingnya Diang nia kadada ubatnya salain pada baayun mulut. Mana pulang, di rumah sakit nia bilang mahabisi banar ka duit. Bujur haja biaya parawatan ditanggung pamarintah, tagal tatap haja jua banyak kaparluan lain nang kada tamasuk jaminan. Kada kahitungan lagi hudah inya bahutang ka sana ka mari.
Baribisan banyu mata Isah mamikirakan kaputusan nang bahari inya pilih sakalinya tabanyak pahit pada manisnya. Jauh banar pada nang dibayangakannya. Supannya pang inya amun bulik lawan kaadaan nang kaya nia. Hudah tajun pada banua kada sing padahan, pandir kuitan kada didangarakan, tang handak bulik imbah asa kada tahan. Di mana inya maandak muha di hadapan kuitan wan urang kampung. Musti haja urang pacang manumpalak parbuatannya.
Amun baya supan ha, aku kawa haja maarit. Salawas laki ditangkap pulisi, apa haja kugawi asal halal. Asa kada baisi lagi hudah aku ni nang ngarannya supan. Nang jadi pungkala nia, apa nang pacang diucap Uma malihat aku bulik? Kayapa muha Abah malihat aku di muhara lawang? Mambariakan juakah aku nia manjajak lantai rumah, atawa langsung mambanting ka lawang? Hakunkah masih Uma manyurung tangan gasan dicium, atawa langsung mahimpatakan ka pipi?
Satangah jam hudah imbah parawat manyuntikakan ubat panurun panas. Dijapainya dahi wan pagalangan tangan Diang, kadada jua panas pina bakurang. Bunyi urang bamulutan di masigit masih haja kadangaran. Bahanu gimit bahanu banyaring. Kaluntang-kaluntung tarbang dicatuk. Suara tukang syairnya liwar nyaman didangar. Hudah hampai asrakal pinanya. Dipajamakan Isah matanya. Tabayang pulang ayunan-ayunan bagantung kakambangan, urang basusurung makanan, mutur-mutur pikap, kakanakan baluncatan barabut duit pacah wan gula batu.
Imbah mambuka mata, dijanakinya anaknya nang guring basalimput kain tipis bagaris-garis. Manjanaki muha anaknya, Isah asa kaya bacaramin. Nangkaya bapandir lawan inya saurang, dibisikinya Diang, “Nak, isuk kita kaluar haja pada rumah sakit nia lah. Kita bulikan ka kampung mama. Amunnya sampat, kita baayun mulut.”
Barito Kuala, 2-10-2016
Gasan pian tahu:
Tanggal 31 Januari 2012 M nang tabarungan tanggal 8 Rabiul Awal 1433 H (bulan mulut), hudah dilaksanaakan islah gasan Disa Parigi lawan Disa Gadung, bawadah di kantur kacamataan Bakarangan. Islah dimaksudakan gasan mandamaiakan kadua kampung nang hudah batahun-tahun bamusuhan. Acara panandatanganan islah itu tih disaksiakan Wakil Bupati Kab. Tapin, Kapolres Tapin, Dandim 1010 Rantau, Camat Bakarangan, Kapolsek wan Warga Disa Gadung/Parigi.
Sumber:
Rahmiyati, dkk. 2016. Umbayang Wayang Balarut Jukung Rumbis: Kisdap wan Puisi Banjar Pilihan ASKS XIII Pelaihari 2016. Banjarmasin: Tahura Media
0 komentar: