Cerpen Muhammad Noor Irvan: Lumba Karoke (Kisah Palui)
Nah, jadi pas tanggal 17 Agustus, banyak kalo urang-urang nang maadaakan lumba-lumba. Nah, dikampungnya si Palui nang ngarannya kampung Haliling, ada jua maadaakan lumba 17an. Ada lumba karung, lumba naik pinang, lumba makan gabin, lumba kaliring, lumba bajugit, banyak tu pang lumbanya. Tapi nang lumbanya paling rami tuh lumba karoke. Handak sakampungan umpatan lumbanya nih. Garbus wan Tulamak, umpatan jua lumbanya, tahu am bagus jua kah suara buhannya badua tuh. Kena ay kita dangar akan buhannya banyanyi. Juri lumbanya nih Palui panuntun ay, Palui nih dahulu sakulah banyanyi di Purwacaraka. Harat wan bagus-bagusnya tu pang suara Palui nih, kada kalah wan Haji Rhoma Irama.Ampai ariannya, jadi jua lumbanya nih. Lumbanya nih mulai baisukan tahu pang sampai pabila ampihannya, sampai tuntung tu pang ujar Palui. Jadi kena sistimnya nih nang lumba naik kaatas panggung nang andakkannya di higa pasar, mambawaakan lagu babarang ja. Nah, mulai sudah lumbanya nih. Si Amang Tukacil sakalinya jadi MCnya. Gagah pang Amang Tukacil nih mirip lawan John Tralala tu pang.
“Uki,kiki..” nya mikrufunnya baheho.
“kita mulai haja lumbanya nih, kita kiau pasarta nomor urut 1, Garbus!”
Naik Garbus nih ka panggung. Gugup pang pinanya Garbus nih, napang hanyar naik panggung, limbui sudah paluh. Maambil mikrufun si Garbus lalu ay banyanyi.
“Seraut wajah cantik, yang kau sembunyikan, di balik kerudung putih.. Di balik kerudung wajahmu tersembunyi, kau cantik alami kehadirat ilahi, tapi bukan karena itu aku cinta pada…......(tediam)”
Tasatup si Garbus banyanyi, mancincing turun panggung. Uuuuuu.. Rupanya si Garbus aturannya banyanyi lagu Bagadang lagunya Haji Rhoma Irama, tapi pas Garbus malihat babinian bakakamban putih nang nukar iwak bapanggang di higa panggung, lalu ay Garbus banyanyi Kerudung Putih. Sakalinya haratan Garbus banyanyi, bapaling si babinian nang bakakamban putih tadi, sambil malihati Garbus banyanyi. Uuuuuu.. sakalinya nang bakakamban putih tuh nininya si Garbus, apa ah lagi Garbus bukah mancincing, bah tuh ampih banyanyi. Kada bamuha lagi tu pang si Garbus. Si Palui nih tanganga, inya kada tahu napa Garbus ampih banyanyi. Limbah tuh di dis si Garbus. Naik si Amang Tukacil.
“Pasarta nomor 1 sudah banyanyi tadi, tapi lagunya tapanggal banyak banar. Uki, kita langsung haja kiau pasarta nomor 2. Tulamak!!!!”
Naik si Tulamak ka panggung sambil mambawa awak nang kaya gajah bangkak. Maambil ka mikrufun, lalu ay banyanyi.
“Ulun handak banyanyi nang judulnya..............” Taceleng si Tulamak malihat babinian barambut pirang ba tatu pulang kaya urang bule tu pang nang lagi batatawaran lawan acil bajualan gagalang gatah di higa panggung. Lanjut pulang lawan Si Tulamak.
“Nang judulnya Hai orang Asing…"
"Hai orang asing, darimana darimana asalmu, Hai orang Asing, siapakah siapa namamu, sejak pertama berjumpa simpati padamu, sejak pandangan pertama jatuh hati pada….........(tagana sakaligus tabincalak)” Tagana si Tulamak nih. Bukah jua nang kaya si Garbus. Uuuuuu.. si Tulamak tagana banyanyi karana malihat nang babinian rambut pirang tadi tu pang, pas bapaling ka arah si Tulamak nang lagi banyanyi, Uuuuu.. sakalinya babinian nang dilihat Tulamak tuh lain babinian tapi si Udin wadam nang baisi salon karimbat, pidikur wan midikur di muka gang Haliling. Tanganga pulang si Palui, dalam hatinya ni lah.
“Kanapa kakawanan unda nil ah banyanyi kada mau tuntung-tuntung, hiran jua unda malihat” Palui nih kada tahu kisah lalu, ngarannya inya jadi juri di muka, jadi kada tahu napa-napa. Jadi di dis Palui ay si Tulamak karana kada tuntung banyanyi.
Naik pulang si Amang Tukacil. Lalu ay bapander.
“Pinanya ari ni, pasarta kita bukahan tarus, tapi kada apa-apa, pasarta kita masih banyak jua lagi. Langsung ja pasarta nomor 3, Acil Ijum!!!!”
Acil Ijum naik kapanggung, tatawaan urang, Napa nah bubuhannya tatawaan.. Acil Ijum banyanyi ka panggung babaju dastar, maka muha pina hibak lawan sisik iwak. Acil Ijum nih gawiannya manyiangi akan iwak urang di pasar tiap hari, wajar haja di muha Acil Ijum bahambur sisik iwak, napang urang haratan manyiangi iwak dikiau Amang Tukacil. Bamaju Acil Ijum maambil ka mikrufun, langsung ay Acil Ijum banyanyi.
“Diayak mang..!!!!"
"Hitam orangnya hitam tetapi manis senyumnya, itulah pilihan saya.. Entah mengapa sebabnya warna hitam aku suka, hingga gendayan tubuhnya banyak yang hitam warnanya.....(tesetop)"
“Uuuuuyyyyy,,,, bini kada pintar nyawa nih, manyambati unda hirang kah nyawa, bulik kada nyawa, bulik……!!!!” Si Tuhirang bakuriak di balakang memamai Acil Ijum. Uuuuuu.. sakalinya Acil Ijum nih bininya Tuhirang, rupanya si Tuhirang kada tarima bininya banyanyi lagu ngitu, napang ada manyambat hirang, tau ja kalo si Tuhirang awaknya hirang banar, nang kaya urang Negro tagugur di aspal. Kahandak si Tuhirang nih tadi tuh nyanyinya badua lagunya Kamandulan. Lagunya tuh cucuk karana Si tuhirang wan Acil Ijum ni kada baisian anak lagi. Turun Acil Ijum pina marangut pang muhanya tuh, napang muha Amang Tukacil diranguti wayah basalisihan di panggung.
Singkat carita, malam sudah arinya, sakitar jam 11 san sudah. Pina taungutan panuntunnya, napang dari baisukan sampai malam arinya kadada dapat kunsumsi, kada usah nasi kutak, banyu Aqua galas ja gin kada dibari. Ada nang taguring panuntunnya, ada nang tanganga, ada nang manguap, ada jua nang lagi mancari hartu karun takapit. Tahu lah apa Harta karun takapit? tuh karak hidung tuh harta karun takapit, pina ngalih lo maambil.
Naaahh.... Amang Tukacil naik baraarti pasarta tarakhir handak banyanyi.
“Baiklah, kita kiau akan aja langsung, pasarta nang kita hadangi, pasarta tarakhir, nomor 65. Acil Irus……!!!!”
Naik Acil Irus ka panggung. Lalu ay mahancap maambil mikrufun.
“Uluuuu…uuulunnnn… haaandaakk baannyyaannyi… muuuussiiik mannng…"
"Kalau sudah tiada baru terasa, bahwa kehadirannya sungguh berharga, sungguh berat aku rasa kehilangan dia, sungguh berat aku rasa hidup tanpa dia… Ku tau rumus dunia semua harus berpisah tetapi ku mohon tangguhkan tangguhkanlah”
Ummma si Acil Irus banyanyi sambil tatangis, rupanya Acil Irus nih hanyar basarakan lawan lakinya. Jadi pas ja lagu nang dibawa akan acil Irus. Pas habis turun Acil Ijum, naik Amang Tukacil.
“Akhirnya, habis jua sudah pasartanya, wahini jua kita umum kan siapa nang manang lumba karoke nginih.”
Pina gadagupan pang jantung buhannya, nang muha pina manggitir tuh lah Amang Utuh, Paman Anang, Amang Supi, Amang Johan, Kai Sabran, amang Ijul, Nini tunggih, Acil Siti, Acil Irus, Tulamak wan Garbus gugup jua.
“Ulun bacakan lah pamanangnya” Ujar Amang Tukacil nang handak-handak lakas bulik jua.
“Lumba karoke tingkat se-kampung haliling, lawan ini mangumumakan pangumuman ngini gesan umum supaya umum tahu pengumuman nang diumumakan ngini. Mamutuskan wan masahkan pamanang lumba karoke tingkat se-kampung Haliling adalah DI BALAKANG. Kaputusan ngini kada kawa di ganggu gugat wan kada kawa diapa-apai apalagi ditapal-tapal, tapal sorang pakai dampul. Banjarmasin,17 Agustus 2010, Diwan juri lumba Karoke, Palui......
“Juara katiga, hadiahnya duit 500.000, pamanangnya Kai Sabran wan Nini tunggih nang lagunya Gadis atau Janda.
"Juara kadua, hadiahnya duit sajuta, pamanangnya Amang Ijul nang lagunya Zulfikar."
"Juara partama… dreeeeengggg.. Hadiahnya tivi 14 inci warna hirang-putih antena nukar sorang wan duit sajuta lima ratus… Aciiiilllllllll Iruuuuussssss…!!!!!!!”
Uuuuuuuuuuuuu…!!! Bakuriakan urang, kada satuju mun acil Irus pamanangnya, Tulamak wan Gabrus hiran kanapa jar inya kada manang, maka bagus banar sudah lagunya tadi tuh, tapi tapanggal pang lagunya.
Uuuuu.. Ujar si Palui nang jadi Juri, Acil Irus nih banyanyi mahayati banar lawan lagunya. Ujar Acil Irus… “Aku tadi tuh kaingatan banar wan lakiku pas maingkut mikrufun tuh, rasa tejapai apa ngituh”....
Akkkaaaayyy paham ja kalo? hahahaa
Sumber:
http://irvannisme.blogspot.co.id/2011/08/cerita-banjar-ii_27.html
0 komentar: